Jeremaea 25:10 - Pijin Bible

¹⁰ Bae mi mekem wea yufala no save herem moa olketa singsing fo hapi, olsem hapi voes blong boe an gele taem tufala ya i marit. Bae yufala no garem moa sid blong wit fo mekem bred, an yufala no garem moa oliv oel fo laet blong yufala.

Pijin Deuterocanon

¹⁰ Bae mi mekem wea yufala no save herem moa olketa singsing fo hapi, olsem hapi voes blong boe an gele taem tufala ya i marit. Bae yufala no garem moa sid blong wit fo mekem bred, an yufala no garem moa oliv oel fo laet blong yufala.

Jeremaea 25:10 Iomraidhean Croise

Esta 3:13

Olketa man fo karim mesij i tekem go olketa leta ya nao long evri provins. Toktok wea hemi stap insaet long olketa leta ya hemi olsem, “Long mektetin de blong mektuel mans ya, evri pipol blong Jiu hu i stap long olketa provins blong yufala, bae yufala mas kilim olketa dae evriwan. Yufala mas kilim dae evri yanga wetem evri olo, an evri woman wetem evri pikinini. Bae yufala mas kilim dae evriwan long datfala de. An yufala mas tekem tu evrisamting blong olketa.

Esta 7:4

Wanfala man bin peimaot finis olketa pipol blong mi mekem hemi save kilim mifala evriwan dae. Sapos hemi bin peimaot mifala fo waka olsem slev nomoa, bae mi save stap kuaet, an mi no save mekem trabol fo yu olsem. Bat hemi planem fo kilim mifala evriwan dae.”

Esta 8:11

Toktok ya hemi talem dat olketa Jiu hu i stap long evri taon olsem, bae olketa evriwan mas kam tugeta long de ya wea Haman hemi putum fo olketa man fo kam an kilim dae olketa Jiu. So, olketa mas redim olketa seleva long datfala de fo faet fo sevem laef blong olketa. Leta ya hemi tok olsem, “Long mektetin de blong mektuel mans ya long datfala yia, bae yufala mas redi fo faet. Nomata yufala stap long olketa provins insaet long kingdom blong mi, sapos eniwan hemi tekem kam olketa samting fo faet, an kam fo kilim yufala dae wetem olketa pikinini an olketa waef blong yufala, bae yufala mas faetem olketa. Long datfala de, bae yufala garem raet fo kilim dae olketa pipol hu i kam fo faetem yufala, an bae yufala save tekem evrisamting wea olketa bin onam. Hem nao toktok blong mi fo yufala evriwan, long olketa provins insaet long kingdom blong mi.”

Aesaea 47:2

Yu mas go fo tanem bikfala ston ya fo krasim wit mekem hem kamap flaoa. Yu mas tekemaot kaleko ya wea hemi satem fes blong yu. An yu mas tekemaot olketa gudfala kaleko ya blong yu. Ya, yu mas liftimap kaleko blong yu fo katkros long olketa riva.

Jeremaea 16:9

Hem nao mi Yawe hu mi garem evri paoa, an hu mi God blong Israel, mi talem yufala: Barava long ae blong yufala long disfala ples an long taem wea yufala save lukim, bae mi barava finisim noes blong olketa pipol wea i hapi, an olketa hapi voes blong olketa boe an gele long fist blong marit.

Jeremaea 48:33

Olketa gaden an frut tri blong Moab i nambawan, bat no eniwan hemi stap moa long hem hu hemi save singaot fo hapi. Mi mekem finis wea no eniwan save wakem waen. No eniwan nao hemi stap fo singsing long taem olketa waka. Pipol i singaot bikfala, bat i no fo hapi.

Jeremaea 7:34

Disfala lan bae hemi kamap drae eria nomoa. Long olketa taon long Jiuda, an long olketa bikrod long Jerusalem, bae mi mekem man hemi no save herem moa noes blong olketa pipol wea i stap hapi, an olketa noes blong olketa fist fo marit. Ya, bae mi mekem no eniwan save stap long disfala lan moa.”

Lamentesin 5:15

Mifala no save hapi. Bifoa, mifala save dans fo hapi, bat distaem mifala gohed fo sore an krae nomoa.

Esikiel 26:13

An bae mi finisim evri singsing wea yufala gohed fo singim, an no eniwan save herem moa saon long olketa gita olketa pleim.

Hosia 2:11

An evri bikde long yia, olsem olketa Fist blong Niumun, an olketa Sabat, an olketa narafala fist moa olsem fo mekem wosip long hem, bae mi barava finisim from hem.