Jeremaea 10:9 - Pijin Bible

⁹ Olketa hu i garem save, olketa dekoretem kaving long gudfala silva wea i tekem long Spen, an long nambawan gol wea i tekem long Ufas. Den olketa putum olketa nambawan kaleko long olketa kaving ya, wea hemi blu an papol olsem kaleko blong king.

Pijin Deuterocanon

⁹ Olketa hu i garem save, olketa dekoretem kaving long gudfala silva wea i tekem long Spen, an long nambawan gol wea i tekem long Ufas. Den olketa putum olketa nambawan kaleko long olketa kaving ya, wea hemi blu an papol olsem kaleko blong king.

Jeremaea 10:9 Iomraidhean Croise

1 Kings 10:22

An King Solomon hemi garem plande bikfala kago sip wea i waka tugeta wetem olketa kago sip blong King Haeram. Nao evri trifala yia, olketa sip ya i kambaek wetem gol, an silva, an bikfala tit blong elifan, an olketa animol olsem enikaen mangki.

2 Kronikols 9:21

An King Solomon hemi garem plande bikfala kago sip wea kru blong olketa i olketa man blong King Haeram. Nao evri trifala yia, olketa sip ya i kambaek wetem gol, an silva, an bikfala tit blong elifan, an olketa animol olsem enikaen mangki.

Sams 115:4

Bat olketa god blong olketa hiden pipol ya, olketa pipol nomoa i wakem long silva an gol.

Sams 72:10

Hemi gud tumas fo olketa king long Spen an long olketa aelan, bae i mas givim olketa presen long hem. Hemi gud tumas fo tufala king blong Arebia an Itiopia, tufala mas tekem kam olketa presen long hem.

Aesaea 23:6

!Olketa pipol blong Fonisia! !Yufala sore an krae bikfala! !Hemi moabeta fo yufala trae fo ranawe go farawe long Spen!

Aesaea 40:19

Olketa man nomoa i mekem olketa kaving ya long bras, an olketa narafala man nomoa i kavaremap long gol an wakem olketa sen long silva fo mekem olketa luknaes.

Esikiel 27:12

“Olketa blong kantri long Spen gohed fo mekem bisnis wetem yufala, bikos yufala garem plande gudfala samting fo salem long olketa. Olketa tekem kam silva, an aean, an tin, an led fo sensim long olketa gudfala samting blong yufala.

Esikiel 27:7

Olketa mekem olketa seil blong yu long nambawan waet kaleko wea olketa tekem kam from Ijip, an olketa somap olketa piksa long hem fo dekoretem. Hemi olsem flag blong yu, wea taem yu kam farawe yet, bat hemi isi nomoa fo luksave long yu. Olketa kaleko blong yu fo blokem san, olketa mekem long nambawan blu an papol kaleko wea olketa tekem kam from aelan long Saepras.

Daniel 10:5

Mi luk go nao mi lukim dat wanfala man wea hemi werem barava nambawan waet kaleko, an strap blong hem olketa wakem long barava nambawan gol.

Hosia 8:6

Wanfala man blong Israel nao bin wakem disfala kaving blong Samaria. !Hemi no god ya! Bae mi krasim an pisisim long smolfala pisis.

Jona 1:3

Bat Jona hemi les, an hemi trae fo ranawe from Yawe long lan ya Spen wea hemi farawe long west. So hemi go long taon long Jopa wea hemi stap long saet si, an hemi faendem wanfala sip wea hemi redi fo go long Spen. Hemi peim pasis blong hem, an hemi go insaet long sip ya mekem hemi ranawe from Yawe. So olketa lusim Jopa an go long Spen nao.

Habakuk 2:19

!Sore tumas long yufala! Yufala gohed fo kolaot olsem long wanfala hafstik nomoa, ?!Yu wekap!? O yufala gohed fo kolaot olsem long wanfala ston, ?!Yu stanap!? ?Waswe, kaving ya hemi save somaot enisamting long yufala? !Nomoa nao! Maet yufala kavarem long silva o long gol fo hemi lukflas, bat hemi nating garem eni laef.