Jajis 4:16 - Pijin Bible

¹⁶ Olketa narafala man blong Sisera i ranawe, bat Barak an olketa soldia blong hem i gohed fo ronem olketa go-go kasem taon long Haroset-Ha-Goeim. Olketa kilim dae evri soldia blong Sisera an no eniwan hemi laef.

Pijin Deuterocanon

¹⁶ Olketa narafala man blong Sisera i ranawe, bat Barak an olketa soldia blong hem i gohed fo ronem olketa go-go kasem taon long Haroset-Ha-Goeim. Olketa kilim dae evri soldia blong Sisera an no eniwan hemi laef.

Jajis 4:16 Iomraidhean Croise

Sams 104:35

Hemi gud tumas sapos hemi spoelem finis olketa nogud pipol from disfala wol, an no eniwan long olketa nao bae hemi stap. !Mi laekem tumas fo preisim Yawe olowe nao! !Ya, yumi mas preisim hem!

Sams 83:10

Yu bin kilim dae tufala ya long taon long Endoa, an bodi blong tufala hemi roten long ples ya nao.

Sams 83:9

Plis yu winim olketa long faet olsem wea yu bin winim olketa pipol blong Midian bifoa, an olsem wea yu bin duim long tufala man ya Sisera an Jabin, long faet ya long Kison Riva.

Eksodas 14:28

an hemi draonem finis olketa kaat fo faet, wetem olketa draeva blong olketa, an evri soldia blong olketa wea i bin aftarem pipol blong Israel insaet long si. An no eniwan long olketa hemi laef.

Leta wea Pol hemi raetem go long sios long Rom 2:12

Evri pipol hu i garem Lo blong Mosis, Lo nao bae hemi jajem olketa from sin blong olketa. An evri pipol hu i no garem Lo blong Mosis, olketa tu bae i barava lus from sin blong olketa, nomata olketa no garem Lo ya.

Jemes 2:13

Sapos yufala no sore an kaen long eniwan, God bae hemi no sore an kaen long yufala tu. Bat man hu hemi save sore an kaen long olketa nara pipol, hemi no nid fo fraetem panis blong God.

Josua 10:10

Yawe hemi mekem olketa soldia blong Amoa i sek fogud an fraet tumas long ami blong Israel, so olketa ranawe krangge olobaot nao. Josua wetem ami blong hem i kilim dae plande long olketa long ples ya, an ronem evri narawan falom rod wea hemi go long olketa hil fo goap long taon long Bet-Horon. An olketa gohed fo ronem olketa an kilim olketa dae go-go kasem tufala taon long Aseka an Makeda long saot.

Josua 11:8

Yawe hemi mekem Josua an ami blong Israel fo winim olketa enemi. Samfala long ami blong Josua i ronem olketa enemi ya an faetem olketa go-go kasem olketa farawe ples olsem taon long Misrefotomaem, an long taon long Saedon long not. Olketa narafala long ami blong Josua i gohed fo ronem tu narafala haf long olketa enemi ya go-go kasem vali long Mispa long ist. Olketa gohed fo faet go-go olketa kilim dae evriwan long olketa enemi.

Jajis 4:17

Sisera hemi fraet tumas, so hemi ranawe baelek fo haed long haostent blong Jael hu hemi waef blong Heba. Hemi save go long ples ya bikos Sif Jabin hemi agri wetem laen blong Heba fo stap gudfala tugeta.

Jajis 4:2

So, Yawe hemi mekem Sif Jabin fo rul ovarem olketa. Sif ya hemi wanfala sif long Kenan. Taon blong hem nao Hasoa, an nem blong lida blong olketa soldia blong hem nao Sisera. Lida ya hemi kam from Haroset-Ha-Goeim.