Jajis 16:6 - Pijin Bible

⁶ So Dilaela hemi go tok olsem long Samson, “Plis talem mi wanem nao hemi mekem yu strong tumas olsem. ?Hao nao yu save kamap wik mekem man save taemapem yu?”

Pijin Deuterocanon

⁶ So Dilaela hemi go tok olsem long Samson, “Plis talem mi wanem nao hemi mekem yu strong tumas olsem. ?Hao nao yu save kamap wik mekem man save taemapem yu?”

Jajis 16:6 Iomraidhean Croise

Nehemaea 6:4

Fofala taem nao tufala sendem kam sem toktok ya long mi, bat evri taem, mi gohed fo sendem sem ansa nomoa gobaek long tufala.

Sams 12:2

Olketa evriwan i gohed fo laea long olketa seleva nomoa. An olketa evriwan i gohed fo suitim olketa seleva long evri laea toktok.

Provebs 22:14

Tok blong woman fo durong, hemi hol wea i dip tumas. Yawe bae kros long man hemi herem, an man bae foldaon long hem.

Provebs 26:28

Man fo laea, hemi heitem olketa hemi spoelem. Suit toktok save spoelem evrisamting.

Provebs 6:26

Durong wetem juri woman, bae yu lusim seleni. Bat durong wetem waef blong nara man, bae yu lusim laef.

Provebs 7:21

Toktok blong woman ya hemi tanem finis tingting blong yangman. Hemi drang finis long suit toktok blong hem.

Maeka 7:2

Long disfala kantri, no eniwan hemi falom stretfala wei blong God. No eniwan hemi tinghevi long God. Evriwan i weit nomoa fo kilim dae narafala man. Olketa gohed fo trikim pipol, nomata olketa i wantok blong olketa nomoa.

Maeka 7:5

Yufala mas no trastem olketa wantok an olketa fren blong yufala. Yufala mas keakea long olketa toktok wea yufala talem long waef o long hasban blong yufala wea yufala lavem tumas, bikos yufala no save trastem olketa tu.

Jajis 14:17

Nao woman ya hemi gohed fo krae olsem long hem go-go kasem mekseven de blong fist ya. An bikos hemi gohed fo krae tumas, an hemi gohed fo askem hem plande taem olsem, long mekseven de, Samson hemi talemaot mining blong tokhaed long hem. An hemi go talem long olketa wantok blong hem.

Jajis 16:5

Oraet, olketa sif blong olketa laen blong Filistia i go lukim disfala woman, an olketa tok olsem long hem, “Mifala laekem yu fo trikim Samson, mekem hemi talem yu wanem nao mekem hem fo strong tumas olsem. Yu mas faendemaot wanfala wei fo mifala taemapem hem mekem hemi no save duim enisamting. Sapos yu duim olsem, evri sif long mifala bae givim 1,100 silva seleni long yu, go-go yu garem staka seleni.”

Jajis 16:7

Samson hemi tok olsem, “Sapos olketa taemapem mi long sevenfala niu rop blong bou, bae mi no save duim enisamting nao. Long wei olsem bae mi wik nomoa olsem olketa narafala man.”