Efesas 4:16 - Pijin Bible

¹⁶ An bikos Kraes hemi hed long disfala bodi, evri deferen pat long bodi hemi barava joen gud tugeta, wea hemi stap joen tugeta wetem olketa string wea Kraes hemi givim kam. So taem evri pat hemi waka stret, disfala bodi hemi gohed fo grouap moa, wea olketa deferen pat olketa lavem olketa seleva evriwan.

Pijin Deuterocanon

¹⁶ An bikos Kraes hemi hed long disfala bodi, evri deferen pat long bodi hemi barava joen gud tugeta, wea hemi stap joen tugeta wetem olketa string wea Kraes hemi givim kam. So taem evri pat hemi waka stret, disfala bodi hemi gohed fo grouap moa, wea olketa deferen pat olketa lavem olketa seleva evriwan.

Efesas 4:16 Iomraidhean Croise

Gudnius abaotem Jisas Kraes wea Jon hemi raetem 15:5

“Mi nao disfala grep tri ya an yufala nao olketa brans blong hem. Man hu hemi joen olowe long mi an mi joen olowe long hem, hem nao bae hemi garem plande frut. Bat sapos yufala no joen long mi, bae yufala no save duim enisamting nomoa.

Leta wea Pol hemi raetem go long sios long Rom 12:4

Yumi evriwan i garem wanfala bodi nomoa wea hemi garem plande pat long hem, an olketa pat ya garem deferen kaen waka fo duim.

1 Korin 10:17

An hemi wanfala bred nomoa ya. So nomata yumi plande, yumi wanfala bodi nomoa bikos yumi evriwan kaikaim haf long disfala wanfala bred.

1 Korin 13:13

So trifala samting ya nao hemi stap olowe, wei fo biliv an wei fo trastem promis blong God an wei fo lavem evriwan. Bat lav nao hemi barava nambawan long trifala ya.

1 Korin 8:1

Nao mi laek toktok abaotem mit wea olketa bin sakrifaesim go long olketa laea god. Hemi tru wea samfala pipol olketa sei, “Yumi evriwan garem save.” Bat diskaen save hemi mekem man fo praod nomoa, bat lav nao hemi save mekem biliv blong yumi fo kamap strong.

Galesia 5:22

Bat olketa gudfala wei blong Holi Spirit nao hemi mekem man fo lavem evriwan, an fo barava hapi, an fo garem piis, an fo stap wiling fo weit nomoa, an fo kaen long pipol, an fo somaot gudfala wei, an fo kipim promis olowe,

Galesia 5:6

Bikos taem eniwan hemi joen finis wetem Jisas Kraes, sapos man hemi kate o hemi no kate hemi samting nating nomoa ya. Bat bikfala samting nao hemi wei blong biliv wea hemi soaot long lav.

Efesas 1:4

Nomata taem God hemi no mekem yet disfala wol, hemi siusim yumi finis nao fo kamap pipol blong hem bikos yumi joen wetem Kraes. Hemi siusim yumi fo mekem yumi kamap holi an fo mekem yumi no garem eni rong samting long ae blong hem.

Efesas 3:17

An mi prea dat Kraes bae hemi stap long laef blong yufala hu i biliv long hem. Mi prea wea evrisamting yufala duim hemi mas kamaot long lav blong God,

Efesas 3:7

God hemi yusim paoa long kaenfala lav blong hem fo givim disfala waka long mi fo talemaot disfala Gudnius.

Efesas 4:12

Hemi duim olsem fo mekem evri pipol blong God olketa fit fo duim gudfala waka blong hem, mekem olketa helpem bodi blong Kraes fo grouap.

Efesas 4:15

Nomoa ya. Yumi mas lavem evriwan an talem wanem hemi tru nomoa, mekem yumi save grouap long evri wei fo joen go wetem Kraes hu hemi hed blong sios.

Filipae 1:9

Mi prea dat lav blong yufala hemi mas gohed fo grou moa, mekem yufala garem gudfala save an evri stretfala tingting.

Kolosi 2:19

bat hemi no stap strong long Kraes. Kraes nao hemi hed blong sios, an sios nao hemi olsem bodi blong hem. An hed ya nao hemi save mekem evri haf long bodi fo olketa grou strong an joen gud tugeta wetem olketa bon an string blong hem. An long wei ya nao, bodi blong Kraes ya hemi grouap gudfala olsem God hemi laekem.

Kolosi 2:2

Mi duim waka ya fo mekem tingting blong yufala evriwan fo stanap strong an fo mekem yufala lavem gud evriwan long yufala. Long wei ya, tingting blong yufala hemi barava savegud moa long disfala gudfala save abaotem Kraes, wea God hemi mekem fo staphaed bifoa.

1 Tesalonaeka 1:3

Evritaem mifala prea long God Dadi blong yumi, mifala tingim olketa gudfala wei wea yufala bin falom bikos yufala biliv long Jisas, an hadwaka wea yufala bin duim bikos yufala lavem God tumas. An mifala tingim tu hao yufala stanap strong olowe from yufala trastem Jisas Kraes Masta blong yumi.

1 Tesalonaeka 2:13

An narasamting moa, oltaem mifala talem tengkiu long God, bikos taem yufala herem mifala talemaot toktok blong God, yufala no herem olsem toktok blong man nomoa, bat yufala biliv wea hemi barava toktok blong God. Diswan hemi tru tumas, bikos God hemi gohed nao fo duim olketa gudfala samting long laef blong yufala hu biliv long hem.

1 Tesalonaeka 3:12

An letem Masta blong yumi hemi strongim lav blong yufala fo evriwan an fo evri narafala pipol, olsem wea mifala lavem yufala tu.

2 Tesalonaeka 1:3

Olketa Kristin fren, oltaem nomoa mifala talem tengkiu long God fo yufala evriwan. An hemi gud fo mifala duim olsem, bikos oltaem nomoa biliv blong yufala hemi gohed fo grou strong moa, an lav wea yufala garem fo evriwan hemi gohed fo bikfala moa.

1 Timoti 1:5

Nao sapos olketa falom disfala toktok blong mi ya, bae olketa save garem lav wea hemi kamaot long klin an stretfala laef an long barava trufala biliv.

1 Pita 1:22

Bikos yufala bin obeim disfala tru toktok, yufala bin mekem laef blong yufala klin from sin, an yufala save lavem olketa Kristin. An distaem, yufala mas lavem yufala evriwan long ful maen blong yufala.

1 Jon 4:16

So yumi barava save nao dat God hemi lavem yumi, an yumi biliv wea diswan hemi tru. Lav hemi stat kam from God. So eniwan hu hemi somaot lav olowe, hemi man hu hemi stap joen wetem God, an God hemi stap joen wetem hem.