Efesas 2:10 - Pijin Bible

¹⁰ God nao hemi sevem yumi olsem, an bikos yumi stap joen wetem Jisas Kraes, hemi mekem yumi fo duim evri gudfala waka wea hemi mekredi long hem finis.

Pijin Deuterocanon

¹⁰ God nao hemi sevem yumi olsem, an bikos yumi stap joen wetem Jisas Kraes, hemi mekem yumi fo duim evri gudfala waka wea hemi mekredi long hem finis.

Efesas 2:10 Iomraidhean Croise

Sams 100:3

Yufala mas luksave dat Yawe nao hemi God. Yumi i blong hem ya bikos hem nao hemi mekem yumi. Ya, yumi nao olketa pipol blong hem wea hemi lukaftarem.

Sams 119:3

Olketa ya i nating duim enisamting rong, an oltaem nomoa olketa falom trufala wei blong yu.

Sams 138:8

Lod Yawe, mi save dat bae yu duim evrisamting wea yu bin promisim long mi, bikos lav blong yu fo mifala hemi no save finis. Plis yu no lusim mifala olketa pipol blong yu wea yu bin mekem. (Singsing blong Deved.)

Sams 51:10

God, plis yu mekem tingting blong mi fo hemi klin finis. Plis yu mekem mi fo kamap niu an stap strong olowe long yu.

Sams 81:13

Mi laekem tumas sapos olketa pipol blong mi i lisin long mi. Ya, mi laekem tumas sapos olketa falom wei blong mi.

Aesaea 19:25

Yawe hu hemi garem evri paoa bae hemi blesim olketa pipol blong trifala kantri ya. Bae hemi tok olsem, “Olketa pipol blong Ijip. Yufala pipol blong mi. An mi nao mi mekem yufala pipol blong Asiria fo kamap olketa pipol blong mi. An mi tu mi siusim yufala long laen blong Israel from evri narafala pipol long wol fo kamap olketa spesol pipol blong mi. An bae mi blesim yufala evriwan.”

Aesaea 29:23

Taem yufala lukim olketa pikinini wea bae mi givim go long yufala, bae yufala i talemaot dat mi nao mi Holi God blong yufala long laen blong Jekob, an wei blong mi hemi stret fogud. An bae yufala tinghae long mi, God blong yufala long Israel.

Aesaea 43:21

Olketa pipol blong mi ya, mi nao mi mekem olketa fo preisim mi.”

Aesaea 43:7

Ya, evriwan long olketa spesol pipol blong mi wea mi bin mekem olketa fo liftimap nem blong mi, bae i kambaek long mi.”

Aesaea 44:21

Yawe hemi tok moa olsem, “Pipol blong Israel, yufala mas tingim olketa toktok ya wea mi bin talem. Yufala olketa wakaman blong mi ya. Mi nao mi mekem yufala, an mi no save fogetem yufala.

Aesaea 60:21

Yufala evriwan bae i kamap stret fogud, an bae yufala onam disfala kantri olowe nao. Mi nao mi putum yufala long disfala ples olsem tri wea mi bin plantem, an bae evriwan i preisim mi, fo olketa gudfala samting wea mi duim.

Aesaea 61:3

an fo lukaftarem olketa ya long Saeon. Fastaem olketa putum asis blong faea long hed fo somaot olketa sore, bat bae olketa hapi tumas, olsem wea olketa werem nambawan kraon. Fastaem olketa sore an krae, bat bae olketa singsing fo preisim Yawe. Bae olketa i olsem olketa strongfala ok tri wea Yawe seleva nao hemi plantem. An bae olketa evriwan i duim nomoa olketa samting wea hemi stret, an bae evriwan i preisim Yawe, fo olketa gudfala samting wea hemi duim.

Jeremaea 31:33

Hem ya nao disfala niufala spesol agrimen wea bae mi mekem wetem olketa pipol blong Israel. Bae mi putum lo blong mi insaet long maen blong olketa, an bae mi raetemdaon long haat blong olketa. Bae mi nao God blong olketa, an bae olketa kamap moa spesol pipol blong mi.

Matiu 5:16

Long sem wei tu, laet blong yufala hemi mas saen go long olketa pipol, mekem olketa luksave long olketa gudfala samting wea yufala duim, an mekem olketa mekhae long Dadi blong yufala long heven.”

Gudnius abaotem Jisas Kraes wea Jon hemi raetem 3:21

Bat eniwan hu hemi duim evrisamting wea hemi tru, hem nao hemi kam long laet ya, bikos hemi laekem laet ya fo somaot klia dat evrisamting hemi duim, hemi duim bikos hemi obeim God.

Aposol 9:31

Nao long taem ya, olketa pipol blong sios insaet long olketa provins long Jiudia an Galili an Samaria, no eniwan hemi faetem olketa moa. Holi Spirit hemi gohed fo helpem olketa, an hemi mekem sios fo ka-kamap strong moa, an hemi mekem namba blong olketa pipol fo kamap plande moa. An olketa gohed fo mekhae long Masta oltaem.

Aposol 9:36

Nao long taon long Jopa, wanfala disaepol hemi stap nem blong hem Tabita, an long langguis long Grik nem blong hem Dokas. An disfala woman ya, evritaem nomoa hemi save duim olketa gudfala samting, an hemi save helpem olketa pua pipol.

Leta wea Pol hemi raetem go long sios long Rom 8:1

Nao yumi stap joen wetem Jisas Kraes finis, so no eniwan save jajem yumi moa an sei yumi rong.

Leta wea Pol hemi raetem go long sios long Rom 8:29

An olketa pipol God hemi siusim olketa bifoa kam, hemi planem fo olketa kamap wankaen wetem San blong hem. Long wei ya nao, San blong hem hemi fasbon long plande brata blong hem.

1 Korin 3:9

Mitufala nao i waka tugeta fo helpem God, an yufala nao olsem gaden blong hem. An yufala ya, yufala haos blong God tu ya.

2 Korin 5:17

Taem eniwan hemi joen wetem Kraes, God hemi mekem hem niufala moa. Olketa olfala samting i go finis, an olketa niufala samting nao i kam.

2 Korin 5:5

God nao hemi mekem yumi redi fo yumi sens olsem, an hemi givim finis Holi Spirit long yumi fo somaot dat bae hemi barava hapen.

2 Korin 9:8

An God hemi save givim plande samting long yufala go-go yufala barava naf nao. So yufala save garem evrisamting wea yufala nidim, an yufala save givim plande samting long narafala pipol.

Galesia 6:15

Nomata man hemi kate o hemi no kate, hemi samting nating nomoa ya. Bikfala samting nomoa, fo God hemi mekem yumi fo kamap niufala moa.

Efesas 1:1

Mi Pol, wea God seleva hemi siusim mi fo kamap aposol blong Jisas Kraes. Mi raet go long yufala olketa pipol blong God long Efesas, wea yufala gohed fo falom Jisas Kraes wea yufala joen wetem hem finis.

Efesas 1:4

Nomata taem God hemi no mekem yet disfala wol, hemi siusim yumi finis nao fo kamap pipol blong hem bikos yumi joen wetem Kraes. Hemi siusim yumi fo mekem yumi kamap holi an fo mekem yumi no garem eni rong samting long ae blong hem.

Efesas 2:13

Fastaem, yufala stap farawe long God, bat distaem nao, yufala joen wetem Jisas Kraes. An bikos Kraes hemi givim blad blong hem fo yufala olsem wanfala sakrifaes, God hemi tekem yufala kam kolsap long hem nao.

Efesas 2:15

Long dae blong hem, hemi bin finisim disfala Lo blong olketa Jiu wetem enikaen rul blong hem ya, mekem no eniwan hemi nid fo falom moa. An long wei ya nao, hemi mekem tufala kaen pipol fo kamap wanfala niu kaen pipol wea hemi joen wetem hem seleva, mekem tufala fo stap long piis.

Efesas 2:2

Long taem ya, yufala falom nomoa ravis wei blong disfala wol. Yufala obeim nomoa Seitan hu hemi bos blong olketa devol long skae, an wea hem nao hemi save bosim olketa pipol hu i no obei long God.

Efesas 2:6

Bikos yumi stap joen wetem Jisas Kraes, God hemi mekem yumi fo garem laef wetem Kraes, an hemi mekem yumi fo rul wetem hem long heven.

Efesas 4:1

So mi hu mi stap long prisin bikos mi blong Masta, mi talem strong long yufala, laef blong yufala hemi mas stap stret fitim wei blong God hu hemi kolem yufala kam.

Efesas 4:24

an fo stap long disfala niufala wei, wea God hemi mekem fo falom wei blong hem seleva. Sapos yufala stap olsem, bae yufala somaot tru laef wea hemi stret an hemi holi.

Diutronomi 32:6

?Waswe, hem nao gudfala wei fo talem tengkiu long Yawe? Nomoa. !Yufala krangge tumas! !Yufala no garem eni gudfala save! Yawe hemi dadi blong yufala, an hem nomoa hemi mekem yufala.

Diutronomi 5:33

Yufala mas obeim olketa evriwan ya. An sapos yufala duim olsem, laef blong yufala bae hemi save gud tumas, an bae yufala save stap longtaem long lan wea bae yufala tekova long hem.”

Filipae 1:6

An mi barava save dat God hu hemi bin statem disfala gudfala waka long laef blong yufala, bae hemi gohed fo finisim long datfala De blong Jisas Kraes.

Filipae 2:13

Yufala save, God nao hemi gohed fo waka insaet long yufala, mekem yufala save siusim an duim wanem hemi falom plan blong hem.

Kolosi 1:10

Sapos olsem, bae laef blong yufala hemi save kamap stret long ae blong Masta. An bae yufala save mekem hem hapi tumas long wei blong yufala, wea yufala save go-gohed fo duim enikaen gudfala waka an yufala save gohed fo savegud moa abaotem God.

Kolosi 3:10

an yufala bin tekem moa disfala niufala laef. An God hu hemi mekem disfala niufala laef fo kamap, hemi gohed fo mekem yufala savegud moa abaotem hem an kamap wankaen olsem hem seleva.

2 Tesalonaeka 2:17

Mifala prea wea hemi mas mekem tingting blong yufala fo strong moa, an mekem yufala gohed olowe fo duim evri gudfala waka an fo talem evri gudfala toktok.

1 Timoti 2:10

Olketa woman hu i laek fo falom toktok blong God, olketa mas duim olketa gudfala waka wea hemi fitim fo olketa duim.

1 Timoti 5:10

Hemi mas wanfala woman wea olketa pipol luksave long hem from hemi save duim olketa gudfala waka. Olketa waka olsem fo lukaftarem gud olketa pikinini blong hem, an fo letem olketa pipol stap long haos blong hem, an fo welkamem olketa Kristin pipol long haos blong hem, an fo helpem olketa pipol hu i garem trabol long laef blong olketa. Ya, hemi mas woman wea hemi traehad olowe fo duim enikaen gudfala waka.

1 Timoti 5:25

Long sem wei tu, olketa gudfala waka i stap klia nomoa fo olketa pipol i luksave long olketa. An nomata olketa gudfala waka wea i staphaed fastaem, bae olketa no save staphaed olowe.

1 Timoti 6:18

Yu talem strong long olketa fo olketa mas duim olketa gudfala samting, an olketa mas wiling fo helpem olketa nara pipol an searemaot wanem olketa garem. Olketa gudfala waka olsem ya, hem nao olsem gudfala risis blong olketa,

2 Timoti 2:21

Sapos eniwan hemi mekem laef blong hem fo klin gud from olketa ravis samting mi tokabaotem ya, bae hemi stap olsem wanfala man hu hemi holi an fit fo duim olketa spesol waka fo Masta blong hem. Bae hemi stap redi nomoa fo duim eni gudfala waka.

2 Timoti 3:17

Long wei ya nao, bae hemi mekem yumi pipol blong God redi fo duim evri gudfala waka.

Taetas 2:14

Jisas Kraes hemi letem hem seleva fo dae fo sensim yumi an peimaot yumi evriwan from evri sin blong yumi. Hemi mekem laef blong yumi barava klin, mekem yumi kamap pipol blong hem an barava wande duim evri gud samting.

Taetas 2:7

Yu Taetas, yu mas somaot gudfala wei long olketa, mekem olketa save falom yu. An tising blong yu mas stret oltaem, mekem olketa pipol save tinghevi long hem.

Taetas 3:1

Yu mas talem gud long evri Kristin fo tinghae long olketa bikman long gavman an olketa narafala bikman moa. Olketa mas obeim olketa, an mas redi nomoa fo duim enikaen gudfala waka.

Taetas 3:14

Olketa Kristin fren blong yumi, olketa mas lanem wei fo duim gudfala waka, mekem olketa save helpem narafala pipol hu i sot long enisamting. Nogud olketa les fo duim olketa gudfala waka.

Taetas 3:8

Disfala toktok hemi barava tru tumas. Mi laekem yu fo gohed strong fo talemaot olketa tising olsem, mekem olketa pipol hu i biliv long God olketa save gohed olowe fo duim evri gud samting. Olketa samting wea hemi gud olsem, hemi save helpem evri pipol.

Hibrus 10:24

Yumi mas gohed fo tingting abaotem hao yumi save helpem yumi evriwan fo somaot lav an duim olketa gudfala waka.

Hibrus 13:21

Mi prea wea bae God ya hemi givim evri gudfala samting long yufala, mekem yufala save duim wanem hemi laekem. An mi prea tu wea long paoa blong Jisas Kraes, bae God hemi duim long yumi wanem hem seleva hemi hapi long hem. An bae yumi mekhae long Kraes olowe nao. Amen.

1 Pita 2:12

Distaem, olketa pipol hu i no biliv long God, olketa gohed fo tok nogud agensim yufala. So yufala mas mekem wei blong yufala stret gudfala long ae blong olketa, mekem olketa save lukim gudfala wei blong yufala. Sapos yufala duim olsem, bae olketa save preisim God from diswan, long taem wea bae hemi kam.

1 Jon 1:7

Bat sapos yumi falom wei blong laet olsem God hemi long laet, bae yumi save stapgud tugeta olowe. An bae blad blong Jisas San Blong God, hemi mekem yumi barava klin from evri sin blong yumi.

1 Jon 2:6

Eniwan hu hemi sei hemi joen tugeta wetem God, wei blong hem mas barava olsem wei blong Jisas Kraes nao.