Aposol 22:1 - Pijin Bible

¹ “!Olketa wantok blong Israel, plis yufala lisin fastaem, mekem mi save ansarem olketa toktok blong yufala!”

Pijin Deuterocanon

¹ “!Olketa wantok blong Israel, plis yufala lisin fastaem, mekem mi save ansarem olketa toktok blong yufala!”

Aposol 22:1 Iomraidhean Croise

Gudnius abaotem Jisas Kraes wea Luk hemi raetem 12:11

“Bae olketa tekem yufala go long kot long olketa preahaos, an long frant blong olketa primia an long olketa nara man hu i rulim yufala. Bat long taem ya, yufala no wari abaotem wanem nao fo talem an hao nao fo ansarem toktok blong olketa.

Gudnius abaotem Jisas Kraes wea Luk hemi raetem 21:14

An wanfala samting nao yufala mas tingim, yufala no wari tumas long wanem nao bae yufala talem fo sevem yufala.

Aposol 13:26

“Yufala olketa wantok long laen blong Ebraham, an yufala olketa nara pipol hu i kam fo wosipim God, long yumi nao God hemi givim kam disfala mesij wea bae hemi sevem yumi evriwan.

Aposol 19:33

Nao olketa Jiu olketa pusum wanfala long olketa fo goap long frant blong evri pipol, so samfala long olketa pipol i tingse hem nao hemi mekem disfala raoa fo stat. Man ya, nem blong hem Aleksanda, an hemi mekem saen fo olketa lisin gudfala bikos hemi laek fo ansarem olketa toktok blong olketa.

Aposol 23:1

Pol hemi luk stret go long olketa man long Kansol an hemi sei, “Olketa wantok blong Israel, mi nating filsem long ae blong God, bikos olowe nomoa kam kasem tude, mi bin duim kam evrisamting wea God hemi talem yumi fo duim.”

Aposol 23:6

Nao Pol hemi luksave dat wanfala haf long Kansol olketa Sadiusi, an nara haf olketa Farasi. So hemi tok bikfala long olketa olsem, “Olketa wantok blong Israel, mi ya mi wanfala Farasi, an olketa olo blong mi tu olketa Farasi ya. An mi barava biliv wea bae God hemi mekem olketa hu i dae finis fo olketa laefbaek moa. !An bikos long diswan nao yufala kotem mi distaem!”

Aposol 24:10

Nao Filiks hemi mekem saen long Pol fo hemi save toktok, an Pol hemi tok olsem, “Mi save dat long plande yia nao yu bin jajem olketa kes blong mifala blong Israel, so mi hapi tumas fo ansarem olketa toktok blong olketa insaet long disfala kot.

Aposol 25:16

Bat mi talem olketa dat hemi no falom kastom blong mifala blong Rom ya fo letem olketa fo panisim man ya nating. Hemi mas garem sans fastaem fo stanap long frant blong olketa pipol hu i agensim hem, mekem hemi save ansarem olketa toktok olketa talem agensim hem.

Aposol 25:8

Bihaen, Pol hemi stat fo ansarem olketa toktok ya, an hemi sei, “Mi nating duim enisamting wea hemi agensim Lo blong olketa Jiu, o agensim Tambuhaos ya, o agensim bikfala King long Rom.”

Aposol 26:24

Nao taem Pol hemi gohed fo talem diswan, Festas hemi singaot bikfala olsem, “!Pol, yu toktok krangge tumas ya! !Yu bin stadim olketa buk olowe an dastawe yu kamap krangge finis!”

Aposol 28:17

Nao trifala de bihaen Pol hemi kasem Rom, hemi talem olketa bikman blong Jiu fo olketa kam hipap tugeta. Taem evriwan olketa hipap finis, Pol hemi tok olsem long olketa, “Olketa wantok blong Israel, mi no bin duim enisamting agensim olketa pipol blong yumi o agensim olketa kastom blong olketa olo blong yumi. Bat olketa long Jerusalem olketa kasholem mi an givim mi go long han blong olketa man blong Rom.

Aposol 7:2

Nao Stivin hemi tok olsem, “Olketa dadi an olketa brata, yufala lisin fastaem. Taem olo blong yumi Ebraham hemi no go yet long taon long Haran bat hemi stap nomoa long Mesopotemia, disfala God blong paoa hemi som hem seleva long hem.

Leta wea Pol hemi raetem go long sios long Rom 2:15

Diswan hemi somaot wanem Lo hemi talem, hemi stap finis insaet long haat blong olketa. An gudfala tingting blong olketa ya hemi somaot diswan tu. Tingting blong olketa hemi mekem olketa save wanem olketa duim hemi stret o hemi no stret.

1 Korin 9:3

Nao sapos pipol i tok agensim mi, mi save ansarem olketa olsem.

2 Korin 12:19

Maet yufala tingse mifala raetem olketa samting ya fo somaot dat mifala no duim enisamting rong. !Nomoa ya! Mifala talem olketa samting long wei wea Kraes hemi laekem mifala fo duim long ae blong God. Olketa fren, evrisamting wea mifala bin raetem, mifala raetem fo strongim biliv blong yufala.

2 Korin 7:11

Yufala lukim nao wanem hemi hapen from yufala filnogud long wei wea God hemi laekem. Yufala tinghevi long stretfala wei long disfala trabol, an yufala traehad fo somaot dat yufala no rong. Yufala somaot kros long man hu hemi mekem trabol, an yufala fraetem God tu. Yufala laekem tumas fo lukim mi moa. Yufala tingting strong long God, an wiling fo panisim eniwan hu hemi rong. Long evrisamting yufala duim, yufala somaot finis dat yufala no rong long disfala trabol.

Filipae 1:17

Olketa nara pipol ya olketa no garem eni stretfala tingting, olketa laekem olketa seleva nomoa fo kamap bikfala, an olketa laek fo mekem evrisamting had go moa long mi, taem mi stap insaet long prisin.

Filipae 1:7

Yufala stap olowe long maen blong mi, so hemi fitim fo mi tingim yufala olsem. Yufala evriwan nao i joen wetem mi long disfala waka wea God hemi givim kam long yumi. An diswan hemi tru nomata mi stap insaet long prisin. An hemi tru tu taem mi stap fri fo somaot long olketa pipol dat Gudnius hemi truwan an mi helpem olketa fo biliv long hem.

2 Timoti 4:16

Fastaem mi tok long kot, no eniwan hemi helpem mi. Evriwan i lusim mi, bat mi prea fo olketa, mekem God hemi fogivim disfala rong blong olketa.

1 Pita 3:15

Bat hemi gud fo yufala mekem Kraes hemi Masta long laef blong yufala. An evritaem, yufala mas redi fo givim gudfala ansa long olketa pipol hu i ask abaotem disfala wei blong yufala fo trastem Kraes.