Aesaea 53:6 - Pijin Bible

⁶ Yumi evriwan i olsem olketa sipsip wea i lus olobaot. Yumi evriwan i gohed fo falom nomoa olketa wei blong yumi seleva. Bat Yawe hemi mekem disfala wakaman blong hem fo safa fo olketa sin blong yumi wea yumi evriwan nao sud safa fo hem.

Pijin Deuterocanon

⁶ Yumi evriwan i olsem olketa sipsip wea i lus olobaot. Yumi evriwan i gohed fo falom nomoa olketa wei blong yumi seleva. Bat Yawe hemi mekem disfala wakaman blong hem fo safa fo olketa sin blong yumi wea yumi evriwan nao sud safa fo hem.

Aesaea 53:6 Iomraidhean Croise

Jenesis 22:6

Ebraham hemi holem naef an faea, an hemi givim faeawud go long Aesak fo hemi karim, an tufala go nao.

Sams 119:176

Mi liu olobaot nomoa olsem wanfala sipsip wea hemi lus. So plis yu kam lukaotem mi wakaman blong yu, bikos mi no fogetem olketa strongfala toktok blong yu.

Sams 69:4

Olketa wea i heitem mi fo nating, olketa plande tumas, olketa staka fogud winim olketa hea long hed blong mi. Olketa enemi blong mi i gohed fo laea nomoa agensim mi. Olketa strong tumas, an olketa wande fo kilim mi dae. Olketa fosim mi fo givim go olketa samting wea mi nating stilim nomoa.

Aesaea 40:2

Tok isi long olketa blong Jerusalem, an talemaot long olketa dat disfala hadtaem wea hemi kasem olketa hemi finis nao. Mi nao Yawe, an mi panisim olketa finis from evri sin blong olketa. Ya, mi bin givim barava had panis long olketa, bat hemi finis nao.”

Aesaea 53:10

Yawe hemi tok moa olsem, “Plan blong mi nao, fo disfala man mas safa an dae. Dae blong hem ya, hemi wanfala sakrifaes fo mekem kompensesin, mekem hemi save lukim olketa hu bae i bon kam bihaen long hem. Bae laef blong hem hemi longfala, an from olketa samting wea hemi duim, bae plan blong mi hemi kamap tru nao.

Aesaea 53:11

Bihaen taem wea hemi safa, bae hemi hapi moa, bikos hemi save tu wea hemi no safa fo nating. Disfala Wakaman blong mi wea wei blong hem hemi stret fogud, bae hemi mekem staka pipol fo kamap stret tu, an hemi tekem panis fo evri sin blong olketa.

Aesaea 53:12

Dastawe nao bae mi mekhae long hem wetem olketa bikman hu i garem paoa. Hem seleva nao hemi wiling fo dae long sem wei wea olketa nogud man i dae. Hemi tekem ples blong staka pipol hu i sin, an hemi askem mi fo fogivim olketa.”

Aesaea 53:5

Bat olketa kilim hem fo olketa sin blong yumi, an olketa spoelem hem fo olketa nogud wei blong yumi. Hemi safa long disfala panis, hem nao yumi garem piis. An from olketa kil blong hem, hem nao yumi gudbaek moa.

Aesaea 53:7

“Nomata olketa mekem hem safa, hemi no talem eni toktok. Hemi gohed fo hambol nomoa. Olketa tekem hem go olsem yangfala sipsip wea olketa tekem fo busarem. An olsem sipsip hemi stap kuaet nomoa taem olketa katemaot hea blong hem, hemi no talem eni toktok.

Aesaea 55:7

Yufala hu i falom olketa nogud wei, yufala mas lusim olketa wei ya. Yufala mas lusim olketa ravis tingting blong yufala. Yufala mas kambaek long Yawe hu hemi God blong yumi, mekem hemi sore long yufala an fogivim olketa sin blong yufala.

Aesaea 55:8

Hem ya mesij blong Yawe. Hemi tok olsem, “Tingting blong mi hemi no olsem tingting blong yufala, an wei blong mi hemi no olsem wei blong yufala.

Aesaea 56:11

Oltaem olketa i olsem nomoa olketa dog wea i hanggre tumas, an nomata olketa kaikai, bat olketa nating save fulap. Olketa lida ya i nating save long gudfala wei blong Yawe. Olketa evriwan i falom nomoa olketa tingting blong olketa seleva mekem olketa save kasem olketa gudfala samting.

Aesaea 6:7

Hemi tasim kam maos blong mi long hot sakol ya, an hemi tok olsem, “Yu save nao dat God hemi tekemaot finis sin blong yu bikos hot sakol ya hemi tasim maos blong yu. Ya, hemi fogivim finis olketa sin blong yu.”

Aesaea 66:3

!Bat wei blong yufala hemi barava nogud tumas! !Yufala gohed fo duim nomoa wanem yufala seleva i laekem, falom tingting blong yufala seleva! Yufala tingse, fo kilim dae wanfala man fo sakrifaesim go long laea god, hemi semsem nomoa olsem man buluka wea yufala kilim dae fo sakrifaesim kam long mi. Yufala tingse, fo brekem nek blong wanfala dog fo givim go long laea god, hemi semsem nomoa olsem smolfala sipsip wea yufala kilim dae fo sakrifaesim kam long mi. Yufala tingse, fo tekem blad blong pikpik an givim go long laea god, hemi semsem nomoa olsem kaikai wea yufala ofarem kam long mi antap long olta. Yufala tingse, fo prea go long olketa laea god, hemi semsem nomoa olsem insens wea yufala ofarem kam long mi.

Jeremaea 50:6

“Olketa pipol blong mi bin lus finis, olsem olketa sipsip wea man fo lukaftarem olketa hemi lidim olketa go long rong wei, mekem olketa gohed fo wakabaot olobaot antap long olketa hil, an no save wea nao stret ples blong olketa.

Esikiel 3:18

Sapos mi talemaot dat wanfala nogud man bae hemi dae, bat yu nating tok long hem fo sensim ravis wei blong hem, mekem hemi save sevem laef blong hem, bae man ya hemi dae long sin blong hem. Bat bae mi panisim yu nao from dae blong hem.

Daniel 9:5

“Mifala sin an mifala kamap nogud tumas. Mifala duim olketa ravis samting, an mifala gohed fo agensim yu. Mifala no falom olketa strongfala toktok blong yu an olketa lo blong yu.

Leta wea Pol hemi raetem go long sios long Rom 4:25

God hemi givim kam Jisas fo dae fo finisim olketa sin blong yumi, an hemi mekem hem laefbaek moa fo mekem yumi stret long ae blong God.

Jemes 5:20

Hemi tru, taem yufala helpem eniwan fo lusim disfala nogud wei blong hem, bae God hemi fogivim hem from enikaen sin an sevem hem from dae.

1 Pita 2:25

Bifoa, yufala olsem olketa sipsip wea i lus finis. Bat distaem, yufala kambaek moa long Man Fo Lukaftarem Sipsip, hu hemi save lukaftarem laef blong yufala.

1 Pita 3:18

Bikos Kraes hu hemi stret long ae blong God, hemi dae fo tekem ples blong olketa pipol hu i nogud tumas. Dae blong hem nao hemi tekemaot evri sin blong yufala finis, an hemi mekem yufala kambaek moa long God. Taem hemi stap long disfala wol, olketa pipol kilim hem dae, bat Spirit blong God hemi mekem hem fo laefbaek moa long tru laef.

Jajis 21:25

Long datfala taem, pipol blong Israel i no garem king yet, so evriwan i gohed fo duim olketa samting wea hemi stret long tingting blong olketa seleva nomoa.