Aesaea 5:23 - Pijin Bible

²³ Long taem blong kot yufala mekem olketa pipol hu i duim olketa nogud samting fo go fri bikos olketa peim yufala fo duim diswan. An yufala mekem olketa stret pipol fo go long prisin taem yufala jajem olketa long kot.

Pijin Deuterocanon

²³ Long taem blong kot yufala mekem olketa pipol hu i duim olketa nogud samting fo go fri bikos olketa peim yufala fo duim diswan. An yufala mekem olketa stret pipol fo go long prisin taem yufala jajem olketa long kot.

Aesaea 5:23 Iomraidhean Croise

1 Kings 21:13

Den tufala man fo mekem trabol i sidaon kolsap long hem an tok agensim hem long frant long olketa bikman. Olketa sei wea hemi bin toknogud long God, an long king tu. Den olketa tekem hem go aotsaet from taon, an olketa sutim hem long ston go-go hemi dae.

2 Kronikols 19:7

Yufala mas tinghae long Yawe hu hemi God blong yumi. Yufala mas keakea fo jaj long stretfala wei, bikos hemi les long wei wea hemi no stret, an hemi les long jaj hu hemi saetem eni man, an hemi les long wei fo grisim jaj long seleni.”

Sams 94:21

Olketa ya i plan tugeta long nogud wei fo kilim dae olketa gudfala pipol.

Provebs 17:15

Sapos jaj hemi letem man nogud hemi gofri, o mekem gudfala man hemi panis, Yawe hemi les long tufala wei ya.

Provebs 17:23

Ravis man hemi save tekem nila wea hemi haed, an bae hemi spoelem stretfala wei blong kot.

Provebs 24:24

Maet jaj hemi tok olsem long man wea hemi fit fo panis, “Yu stret nomoa.” Sapos hemi duim, evriwan bae tokspoelem hem.

Aesaea 1:23

Olketa lida blong yufala i les fo obeim toktok blong mi an olketa fren wetem olketa man fo stil. Oltaem olketa barava hapi fo tekem seleni wea olketa nogud man i nilam olketa long hem. An olketa nating helpem olketa pikinini wea mami an dadi blong olketa i lus, wetem olketa wido tu.

Aesaea 10:1

!Sore tumas long olketa lida blong Israel! Olketa mekem olketa lo wea hemi no stret an olketa rul blong olketa hemi barava had tumas.

Aesaea 10:2

Olketa duim diswan mekem olketa hu i pua an olketa wea trabol hemi kasem olketa, fo no garem olketa samting wea hemi barava blong olketa. Oltaem, olketa gohed nomoa fo stilim evrisamting blong olketa wido, an olketa mekful nomoa long olketa pikinini wea mami an dadi blong olketa i dae finis.

Aesaea 28:7

Olketa profet an olketa prist tu i drang fogud long waen, an olketa nating save wakabaot stret nao. Olketa nating save tingting stret nao an nating save duim waka, bikos olketa drang fogud long bia. Olketa profet ya i drang tumas, an olketa nating save luksave nao long olketa spesol drim wea Yawe hemi somaot long olketa. Olketa prist tu i drang tumas, an olketa nating save stretem nao trabol blong olketa pipol hu i kam long olketa fo help.

Aesaea 29:21

olsem olketa hu i talem laea toktok agensim olketa narafala pipol long kot, an olketa hu i laea mekem stretfala man save lus long kot, olketa ya nao bae Yawe hemi barava panisim olketa.

Aesaea 32:7

Wei blong olketa man fo laea hemi barava ravis tu, an oltaem nomoa olketa planem fo spoelem olketa pua pipol, nomata olketa garem raet long olketa samting wea hemi barava blong olketa.

Aesaea 59:15

Distaem, no eniwan nao hemi stret. Bat sapos eniwan hemi lusim olketa ravis wei blong hem, bae olketa narafala pipol nao i spoelem hem.” (Profet) Yawe hemi lukim dat wei blong pipol hemi nating stret, an hemi no hapi long hem.

Emos 5:12

Mi savegud finis long yufala. Plande taem nomoa yufala gohed fo brekem olketa Lo, an olketa sin blong yufala hemi barava nogud tumas. Yufala tekem seleni long olketa nogud man fo saet wetem olketa long kot, so yufala spoelem olketa puaman an fo ravem olketa mekem olketa lus nomoa long kot nomata olketa tok tru.

Maeka 3:11

Yufala jaj letem olketa pipol fo nilam yufala long seleni. An yufala prist tu tisim nomoa olketa lo blong God fo pei. An yufala profet tu gohed fo talemaot mining blong olketa spesol drim, bat fo seleni nomoa. Bat oltaem, yufala tingse bae Yawe hemi lukaftarem yufala olowe. An yufala i gohed fo sei, “Yawe hemi stap wetem yumi. So no eni trabol bae hemi save kasem yumi.”

Maeka 7:3

Evri pipol i save tumas long hao fo duim olketa nogud samting. Olketa bikman i waka tugeta fo mekem olketa ravis plan. Oltaem olketa lida an olketa jaj i letem olketa pipol fo nilam olketa long seleni. Olketa bikman ya i fosim pipol fo duim nomoa wanem olketa laekem.

Matiu 23:35

So bikos hemi olsem, bae God hemi panisim yufala from dae blong olketa stretfala pipol blong hem, stat kam long dae blong stretfala man ya Ebol, go kasem dae blong Sekaraea san blong Barakaea, wea yufala kilim hem dae kolsap long olta long Tambuhaos blong God.

Diutronomi 16:19

Olketa mas no falom wei wea hemi no stret. Olketa mas no saet wetem samfala man nomoa. Olketa mas no letem eniwan nilam olketa, bikos olketa nila i save mekem jaj hemi blaen nomata hemi waes, an hemi mekem jaj fo no tok stret long olketa kes.

Jemes 5:6

Yufala ya, yufala bin jajem nogud olketa hu i no duim eni rong samting. An yufala bin kilim dae olketa tu, bat olketa no trae fo faet agensim yufala.