Aesaea 40:15 - Pijin Bible

¹⁵ Long God, evri kantri long wol hemi olsem samting nating nomoa. Ya, evri kantri hemi olsem wanfala drop long wata nomoa, an evri aelan hemi olsem dast nomoa.

Pijin Deuterocanon

¹⁵ Long God, evri kantri long wol hemi olsem samting nating nomoa. Ya, evri kantri hemi olsem wanfala drop long wata nomoa, an evri aelan hemi olsem dast nomoa.

Aesaea 40:15 Iomraidhean Croise

Jenesis 10:5

Hem nao olketa laen wea i kamaot bihaen long oloman Jafet ya blong bifoa. Olketa pipol ya i stap olobaot long olketa deferen aelan blong olketa, an graon blong olketa an falom olketa deferen laen blong olketa, an olketa garem olketa deferen langguis blong olketa tu.

Sams 62:10

Ravis wei fo fosim pipol fo givim olketa samting long yufala, datwan yufala mas no trastem. Nomata wea evrisamting blong yufala hemi kamap plande, yufala mas no trastem olketa samting ya.

Sams 62:9

Yu no save trastem olketa pipol bikos olketa save finis kuiktaem nomoa olsem lelebet win wea hem blou kam fo sot taem nomoa. Olketa risman an olketa puaman, evriwan i semsem nomoa. Ya, evriwan i samting nating nomoa. Sapos yu putum olketa long skel, olketa nating nomoa. Ya, olketa i olsem win nomoa.

Aesaea 11:11

Long taem ya, Lod God bae hemi yusim moa paoa blong hem fo tekem kambaek long mektu taem olketa pipol blong hem hu i laef yet from olketa narafala kantri, olsem from Asiria, an Ijip, an Patros, an Kus, an Elam, an Babilonia, an Hamat, an from olketa kantri kolsap long solwata, an from olketa aelan long solwata.

Aesaea 17:13

Bat nomata olketa ya i ran kam kuiktaem long yumi olsem bikfala solwata wea hemi brek kam long sanbis, taem Yawe hemi tok long olketa, bae olketa evriwan i taneraon an ranawe. Hemi ronemaot olketa an olketa i olsem wea olketa flae nomoa olsem asis long saet long hil, o olsem drae lif wea bikfala win hemi karim go.

Aesaea 2:22

Yufala mas no putum trast blong yufala wansaet long olketa pipol, bikos olketa save dae nomoa ya. Olketa i samting nating nomoa an no save helpem yufala.

Aesaea 29:5

“Bat bae hemi wos moa fo olketa enemi blong yufala. Bae olketa kamap olsem dast nomoa. Ya, bae olketa kamap olsem drae skin blong wit wea win hemi bloum go.

Aesaea 40:22

!Yawe nao hemi mekem evrisamting ya! Hem nao hemi rul ovarem disfala wol olsem king hu hemi sidaon long tron blong hem. An long ae blong hem olketa pipol i smol an wik olsem olketa grashopa nomoa. Ya, hemi mekem skae wea hemi waed tumas, olsem man hemi putumap wanfala haostent fo stap long hem.

Aesaea 41:5

“Taem evri pipol long olketa farawe ples i lukim olketa samting ya, olketa seksek an fraet fogud. So, olketa hipap tugeta,

Aesaea 59:18

Bae Yawe hemi sensimbaek long olketa enemi blong hem evri nogud samting wea olketa bin duim. Nomata olketa enemi blong hem wea i stap kam long olketa farawe kantri o long olketa aelan long si, bae hemi panisim olketa tu.

Aesaea 66:19

Bae olketa save dat mi nao mi somaot olketa samting ya mekem olketa lukim. Bat olketa hu i laef yet, bae mi sendem olketa go long olketa farawe kantri olsem long Spen, an long Libia, an long Lidia wea olketa man long hem i save faet long bou, an long Tubal, an long Gris, wea olketa pipol i no herem yet nem blong mi, an i no lukim yet saen long bikfala paoa blong mi. An bae olketa talemaot abaotem bikfala paoa blong mi.

Jeremaea 10:10

Bat yu Yawe, yu nomoa yu tru God. Yu God wea yu laef, an yu King wea yu stap fo evritaem olowe. Taem yu kros, evri ples long wol hemi seksek, an no eniwan long olketa narafala kantri hemi fitim fo stanap strong.

Daniel 11:18

Bihaen long taem ya, bae king ya blong Siria hemi faet agensim olketa kantri ya kolsap long solwata, an bae hemi tekova long plande long olketa. Bat wanfala lida blong narafala kantri bae hemi winim hem, nao praod blong hem bae hemi finis. Lida ya bae hemi daonem paoa blong hem, an bae hemi no save praod tumas moa.

Daniel 4:32

Bae olketa pipol i ronem yu aot from ples wea olketa pipol i stap long hem, an bae yu stap wetem olketa wael animol. An fo sevenfala yia, bae yu kaikaim gras olsem buluka. Bihaen long taem ya, bae yu jes save dat mi nao God hu hemi barava hae tumas, an mi nao mi gohed fo rul ovarem evri kingdom long disfala wol, an mi save givim paoa blong olketa king fo go long eniwan wea mi siusim.”

Daniel 4:35

Evri pipol long wol, i olsem nating nomoa long ae blong hem. Ya, evri enjel long heven an evri pipol long wol i stap nomoa andanit long paoa blong hem. No eniwan long wol save agensim hem, an no eniwan save askem hem olsem, ‘?Wanem nao yu duim ya?’

Sefenaea 2:11

Yawe bae hemi mekem olketa evriwan ya i barava fraet fogud taem hemi spoelem olketa god blong disfala wol. Den olketa pipol blong evri kantri bae i wosipim Yawe long ples blong olketa seleva.