Aesaea 34:16 - Pijin Bible

¹⁶ Yufala luk insaet long disfala buk blong Yawe an ridim toktok blong hem. Evri animol an bed wea mi bin talem bae hemi stap long Idom olsem wea Yawe bin talem finis an hem nao bae hemi mekem olketa fo kam tugeta.

Pijin Deuterocanon

¹⁶ Yufala luk insaet long disfala buk blong Yawe an ridim toktok blong hem. Evri animol an bed wea mi bin talem bae hemi stap long Idom olsem wea Yawe bin talem finis an hem nao bae hemi mekem olketa fo kam tugeta.

Aesaea 34:16 Iomraidhean Croise

Jenesis 6:17

Bae mi sendem kam wanfala bikfala wata tumas fo kam long wol ya fo draonem evrisamting ya wea hemi laef, fo finisim olketa. Evrisamting long wol ya bae olketa dae.

Sams 33:6

Yawe nao hemi mekem evrisamting long skae, long toktok blong hem nomoa. Hemi tok nomoa, den san an mun an olketa sta i stap long skae nao.

Sams 33:9

Taem hemi tok nomoa, wol ya hemi kamap nao. Toktok blong hem hemi mekem evrisamting fo kamaot.

Provebs 23:12

Yu mas lisingud long tisa blong yu, an yu mas traehad fo lanem evrisamting.

Aesaea 1:20

Bat sapos yufala agensim mi, bae mi letem olketa enemi i kam faetem yufala an kilim yufala dae.” Yawe nao hemi tok.

Aesaea 14:31

“!Yufala pipol blong olketa bikfala taon ya long Filistia! !Yufala kraeaot long fraet! Bikos yufala bae lukim bikfala smok long not taem olketa enemi i bonem datfala lan, an olketa evriwan i redi kuiktaem fo kam spoelem yufala tu.”

Aesaea 21:17

Nomata olketa soldia blong Kedaa i strong moa long taem blong faet, an olketa save tumas hao fo sut long bou, bat tu-tri long olketa nomoa bae hemi laef. Yawe hu hemi God blong Israel nao, hemi talem.”

Aesaea 30:8

(Profet) Yawe hemi tok olsem moa long mi, “Yu raetemdaon stori abaotem laef blong olketa pipol ya long wanfala buk, mekem olketa save ridim long taem wea bae hemi kam, an fo evritaem olowe nao.

Aesaea 40:26

!Yufala lukap go long skae! ?Hu nao hemi mekem olketa sta? God nao hemi mekem an hemi putum olketa long barava ples blong olketa, an hem tu hemi givim olketa nem long olketa. An bikos hemi barava strong tumas an hemi garem evri paoa, no eni sta save lus from ples blong hem.

Aesaea 40:5

An long datfala taem, bikfala paoa blong Yawe bae hemi saen kamdaon, an evri pipol long wol bae i lukim. Yawe nao bin promisim diswan, an bae hemi duim.”

Aesaea 58:14

“Ya, sapos yufala duim olsem, bae yufala hapi tumas bikos yufala savegud long mi. An evriwan long wol bae i tinghae long yufala, an bae yufala save stap gudfala long kantri ya wea mi bin givim long grani blong yufala Jekob.”

Emos 3:7

Ya, Lod Yawe hemi no duim enisamting sapos hemi no somaot yet long olketa profet hu i wakaman blong hem.

Sekaraea 4:6

Oraet, enjel ya hemi tok olsem long mi, ?Hem ya nao Mesij blong Yawe long Serababel: I no long strong blong yufala. An i no long paoa blong yufala. Bat i long spirit blong mi nomoa. ?Hem nao toktok blong Yawe hu hemi garem evri paoa.

Malakae 3:16

(Profet) So olketa hu i tinghae long Yawe, i tok tugeta. An Yawe hemi herem evrisamting wea olketa talem, an hemi mekem nem blong olketa hu i tinghevi long hem hemi stap long wanfala buk fo rimembarem olketa.

Matiu 5:18

An mi talem yufala tru samting nao, bae no eni lelebet samting insaet long Lo hemi save lus ya. Bae Lo hemi stap nomoa, go-go kasem taem wea wol an skae bae i finis an evrisamting i kasem barava en blong hem.

Gudnius abaotem Jisas Kraes wea Luk hemi raetem 21:33

Skae wetem disfala wol bae hemi finis nomoa, bat toktok blong mi bae hemi nating save finis.”

Gudnius abaotem Jisas Kraes wea Jon hemi raetem 10:35

So olketa pipol wea God hemi toktok go long olketa ya, hemi sei olketa olsem hem nao, an yumi save dat enisamting Buktambu hemi talem, hemi tru olowe nao.

Gudnius abaotem Jisas Kraes wea Jon hemi raetem 5:39

Yufala ya, yufala tingse bae yufala kasem tru laef wea hemi no save finis bikos yufala save lukluk gud long olketa toktok insaet long Buktambu. !Olketa toktok ya, mi nao olketa tokabaotem ya!

Diutronomi 31:21

So taem plande bikfala trabol hemi kasem olketa, bae disfala singsing ya, hemi olsem wanfala witnes blong mi fo somaot olketa ravis wei blong olketa, bikos olketa long laen blong Israel i no save fogetem disfala singsing. Nomata mi no tekem olketa yet long lan wea mi promisim long olketa, bat mi save finis long wanem bae olketa save duim bihaen.”

Josua 1:8

Oltaem, yu mas ridim buk blong Lo an yu mas tisim olketa pipol abaotem olketa toktok wea hemi stap insaet. An long de an naet yu mas tingting gudfala falom olketa toktok ya, mekem yu save duim evrisamting wea Lo hemi talem. Sapos yu duim olsem, olketa waka blong yu bae hemi save gohed gudfala.

2 Pita 1:19

From olketa samting ya nao, mifala biliv strong moa long wanem olketa profet bin talem. So yufala mas holestrong long olketa toktok blong olketa profet, bikos olketa toktok ya i olsem lam wea hemi saen long ples wea hemi dak tumas. Laet ya bae hemi saen go-go delaet hemi kamap, an laet blong disfala sta blong eli moning bae hemi saen insaet long maen blong yufala.