Aesaea 27:12 - Pijin Bible

¹² Long datfala taem, bae Yawe hemi panisim olketa pipol stat long Yufretis Riva long not, go-go kasem spialaen blong Ijip long saot. Bae hemi olsem wea man hemi bitim wit fo aotem skin blong hem, mekem hemi hipimap olketa gudfala sid blong wit. Bae Yawe hemi hipimap evri pipol blong Israel from olketa ples ya.

Pijin Deuterocanon

¹² Long datfala taem, bae Yawe hemi panisim olketa pipol stat long Yufretis Riva long not, go-go kasem spialaen blong Ijip long saot. Bae hemi olsem wea man hemi bitim wit fo aotem skin blong hem, mekem hemi hipimap olketa gudfala sid blong wit. Bae Yawe hemi hipimap evri pipol blong Israel from olketa ples ya.

Aesaea 27:12 Iomraidhean Croise

Jenesis 15:18

An long de ya nao, Yawe hemi mekem promis wetem Ebram an hemi tok olsem, “Bae mi givim olketa graon ya, go long pipol wea bae olketa gohed fo bon kam long laen blong yu. Graon ya hemi stat long smol riva ya long saot wea i mak blong graon blong olketa ya long Ijip, go-go kasem Yufretis Riva long not.

1 Kings 8:65

So King Solomon wetem staka pipol blong Israel i mekem fist blong Bikde fo Stap long Smolfala Lif Haos, an olketa gohed long fist ya fo sevenfala de. Den olketa gohed fo sevenfala de moa. Long taem ya, staka pipol tumas i kam from olketa ples, stat long Lebo-Hamat long not, go kasem smolfala wata long spialaen long lan blong Ijip long saot.

Nehemaea 1:9

Bat sapos yufala tanem kambaek moa long mi, an yufala obeim olketa toktok blong mi, bae mi tekem yufala kambaek moa. Nomata yufala stap olobaot farawe tumas long wol, bae mi tekem yufala kamaot from olketa ples ya an tekem yufala kambaek long ples wea mi bin siusim fastaem fo yufala mekem wosip long mi.’

Sams 68:22

Masta blong yumi, hemi bin tok olsem, “Bae mi kasholem an tekem kambaek olketa enemi wea i stap long evri ples long wol.

Sams 72:8

Hemi gud tumas sapos hemi king long evri kantri, stat long ist go-go kasem long west. Ya, stat long Yufretis riva, go kasem evri ples long wol.

Aesaea 17:6

Ya, bae no plande pipol i laef long disfala kantri. Bae hemi olsem wanfala oliv tri wea olketa pipol i aotem kolsap evri frut from hem, an tu-tri frut nomoa hemi stap long brans long antap an tu-tri long brans long daon.” Hem nao mesij blong Yawe, God blong Israel.

Aesaea 49:5

Bifoa, taem mi no bon yet, Yawe hemi siusim mi finis fo mi kamap wakaman blong hem, mekem mi tekem kambaek olketa blong Israel hu i stap kam olobaot long olketa narafala ples. Hem nao hemi mekhae long nem blong mi, an hemi givim paoa long mi,

Aesaea 56:8

Mi promis dat bae mi tekem kam olketa narafala pipol moa fo joenem yufala hu i joen finis wetem olketa pipol blong mi.” Hem nao mesij blong Lod Yawe hu hemi tekem yufala blong Israel fo kamaot from olketa narafala kantri wea olketa bin fosim yufala fo stap long hem.

Jeremaea 3:14

Hem ya nao mesij blong Yawe. Hemi tok olsem, “!Kambaek, yufala hu i lusim mi! Mi laekem yufala fo kambaek long mi bikos mi olsem hasban blong yu. Long evri taon blong yufala, bae mi tekemaot wanfala man from wanfala taon, an long evri laen blong yufala, bae mi tekemaot tufala man long wanfala laen fo kambaek long maonten long Saeon.

Jeremaea 44:28

Bat barava smolfala haf nomoa bae olketa save goaot from Ijip an ranawe gobaek long Jiuda. Nao olketa ya bae i jes save dat toktok blong hu nao hemi stret, blong mi, o blong olketa.

Esikiel 20:34

Ya, bae mi barava kros tumas long yufala, an mi tekem yufala kambaek long bikfala paoa blong mi, from olketa narafala kantri wea mi bin ronem yufala aot long hem an wea yufala bin stap olobaot kam long hem.

Esikiel 20:41

Taem mi tekem yufala kambaek finis from olketa narafala kantri wea yufala bin stap olobaot kam long hem, bae mi hapi long yufala barava olsem mi hapi taem yufala bonem kam nambawan insens fo wosipim mi. An bae pipol long olketa kantri i lukim dat mi nao mi holi.

Esikiel 39:25

“Dastawe nao mi Lod Yawe, mi tok olsem: Distaem, bae mi sore long olketa pipol blong mi wea i bon kam bihaen long Jekob, an bae mi mekem olketa fo stap gudfala moa olsem bifoa. An bae mi no letem olketa fo tokspoelem moa holi nem blong mi.

Esikiel 47:19

“Long saot saet, baondri ya bae hemi stat long taon long Tama long saot an hemi gotru long drae eria go-go kasem Meribat-Kades, wea hemi garem wata long hem. Baondri ya hemi ran go long not west, falom smolfala wata long baondri long lan blong Ijip long saot, go-go kasem Mediterenian Si. Hem nao baondri long lan long saot saet.

Emos 9:9

Yawe hemi tok moa olsem, ?Bae mi tokstrong long olketa enemi fo panisim olketa nogud pipol blong Israel, olsem wea man hemi kapsaetem sanbis fo gotru long netwaea fo aotem olketa ston from hem. Olsem wea no eni ston save gotru long netwaea, bae no eniwan long olketa nogud pipol save mis from disfala panis.

Sekaraea 8:7

?Mi talem yufala tru nao: Long olketa ples wea olketa enemi i fosim pipol blong mi fo go stap olobaot long hem, long ist an long west, bae mi sevem olketa ya.

Gudnius abaotem Jisas Kraes wea Luk hemi raetem 15:4

“?Sapos wanfala long yufala hemi garem 100 sipsip, an go-go wanfala long olketa hemi lus, waswe, wanem nao bae man ya hemi duim? Bae hemi lusim olketa nara 99 sipsip ya long ples wea olketa kaikai, an bae hemi go an lukaotem sipsip wea hemi lus ya, go-go hemi faendem.

Gudnius abaotem Jisas Kraes wea Jon hemi raetem 10:16

Mi garem samfala sipsip tu wea olketa no stap yet insaet long disfala fens. Bae mi mas tekem olketa fo kam insaet tu, an bae olketa heremsave toktok blong mi. Long wei ya nao, bae olketa evri sipsip olketa stap tugeta long wanfala seksin nomoa, an wanfala man nomoa hemi lukaftarem olketa.

Gudnius abaotem Jisas Kraes wea Jon hemi raetem 6:37

Evriwan wea Dadi blong mi hemi givim kam long mi, bae olketa kam falom mi. An eniwan hu hemi kam long mi, mi bae nating raosim hem gobaek moa.

Josua 15:4

an hemi go kasem taon long Asmon. Spialaen ya hemi falom smolfala wata long spialaen long lan blong olketa pipol blong Ijip, an hemi go moa kasem Mediterenian Si. Hem nao en long spialaen blong olketa long saot.