Aesaea 13:21 - Pijin Bible

²¹ Taon ya long Babilon bae hemi kamap olsem ples blong olketa animol long drae eria. Bae hemi kamap nest blong olketa aol, an olketa bikfala bed tu. Bae olketa wael dog i mekem hom blong olketa long ples ya, an olketa wael nanigot bae i klaem olobaot long olketa olfala haos long ples ya.

Pijin Deuterocanon

²¹ Taon ya long Babilon bae hemi kamap olsem ples blong olketa animol long drae eria. Bae hemi kamap nest blong olketa aol, an olketa bikfala bed tu. Bae olketa wael dog i mekem hom blong olketa long ples ya, an olketa wael nanigot bae i klaem olobaot long olketa olfala haos long ples ya.

Aesaea 13:21 Iomraidhean Croise

Aesaea 14:23

Bae mi mekem taon ya fo kamap wanfala bikfala krik, an bae hemi kamap ples blong olketa aol tu. An bae mi tekem wanfala brum wea hemi naf fo brumum aot evrisamting, mekem ples ya hemi emti finis.” Hem nao mesij blong Yawe hu hemi garem evri paoa.

Aesaea 23:13

!Yufala lukim kantri blong Babilonia! Olketa pipol long lan ya i finis nao. Olketa pipol blong Asiria i barava spoelem ples ya an mekem hemi kamap ples blong olketa wael animol fo stap long hem. Olketa hipimap olketa ston an graon long botom blong wolston long taon ya, mekem hem isi fo klae go insaet an tekova long hem. An olketa brekemdaon evri strongfala sefples blong olketa. Ya, olketa spoelem ples ya finis.

Aesaea 25:2

Yu bin spoelem finis olketa bikfala taon an olketa i olsem nao hip ravis nomoa. Olketa strongfala sefples blong enemi yu bin brekemdaon evriwan, an olketa i olsem nao hip ston nomoa. An evri haos blong king blong olketa ya hemi nogud tumas nao, an bae olketa no save wakembaek moa.

Aesaea 32:14

Disfala haos blong king, an olketa strongfala sefples long ples ya, an olketa gadhaos blong olketa soldia bae i emti finis. An taon ya bae hemi kamap wanfala ples blong olketa wael dongki fo plei long hem an ples blong olketa sipsip fo kaikai long hem.

Jeremaea 50:39

“Hem nao lan ya bae hemi kamap emti, an olketa wael animol long drae eria, wetem olketa wael dog an olketa aol bae i stap long ples ya. Bae no eniwan hemi stap moa long datfala ples.

Maeka 1:8

(Profet) Olketa samting ya wea mi herem, bae hemi mekem mi fo sore an krae. An bae mi tekemaot kaleko blong mi an sandol blong mi, an wakabaot olsem man wea hemi gohed fo sore an krae fo man dae. Bae mi gohed fo krae bikfala olsem wael dog, an krae nogud olsem aol.

Sefenaea 2:14

Ples ya bae hemi kamap ples blong olketa sipsip, an buluka, an olketa narafala animol bae res long hem tu. Olketa aol bae i slip long olketa olfala haos blong taon ya, an sidaon long olketa windo an singaot. Olketa bikfala blak bed bae i sidaon long olketa lada blong olketa haos ya an krae. Olketa gudfala timba blong evri haos long ples ya, bae i kamap nogud.

Revelesin 18:2

Hemi singaot bikfala olsem, “Biktaon long Babilon wea hemi garem paoa tumas, hemi foldaon finis. Hemi barava nogud nao, an distaem hemi kamap ples blong olketa devol. Hemi ples blong olketa ravis devol an olketa ravis bed wea i nogud tumas.