Aesaea 11:12 - Pijin Bible

¹² Bae Yawe hemi putumap flag ya fo somaot long olketa pipol long olketa narafala kantri, wea bae hemi tekembaek olketa pipol blong Israel wea olketa enemi i fosim olketa aot from ples blong olketa. Ya, bae hemi tekembaek moa olketa pipol blong Jiuda hu i stap olobaot long evri ples long wol.

Pijin Deuterocanon

¹² Bae Yawe hemi putumap flag ya fo somaot long olketa pipol long olketa narafala kantri, wea bae hemi tekembaek olketa pipol blong Israel wea olketa enemi i fosim olketa aot from ples blong olketa. Ya, bae hemi tekembaek moa olketa pipol blong Jiuda hu i stap olobaot long evri ples long wol.

Aesaea 11:12 Iomraidhean Croise

Sams 107:3

Hemi tekem yumi kambaek from olketa narafala kantri long ist an long west an long not an long saot, fo kambaek moa long lan blong yumi.

Sams 147:2

Yawe hemi gohed fo bildimap moa Jerusalem. Ya, hemi gohed fo tekem kambaek olketa pipol blong yumi hu i slev long narafala kantri.

Sams 60:4

Yu bin givim kam long mifala hu i tinghae long yu, wanfala saen olsem flag fo wonem pipol, mekem mifala save ranawe long hem, fo kamap sef from olketa enemi.

Sams 68:22

Masta blong yumi, hemi bin tok olsem, “Bae mi kasholem an tekem kambaek olketa enemi wea i stap long evri ples long wol.

Aesaea 11:10

Long taem ya, disfala king hu hemi olsem rut long laen blong King Deved, bae hemi olsem wanfala flag, mekem olketa pipol long olketa narafala kantri save kam long hem. An evriwan bae i barava tinghae long ples blong hem.

Aesaea 18:3

!Olketa pipol long wol! !Yufala lukluk! Bae olketa pipol i putumap flag antap long olketa maonten mekem yufala save lukim. !An yufala mas redi an luk go long samting ya! Bae olketa bloum trampet fo mekem saen. !So yufala mas redi fo herem samting ya!

Aesaea 24:16

Bae yumi herem olketa pipol long farawe kantri narasaet long wol i singsing fo preisim God hu hemi stret olowe. Bat mi tok olsem, “!Man! !Mi dae finis nao! !An bodi blong mi hemi bon nating tu! Olketa fren blong mi i laea nomoa long mi, an letem mi go long han blong olketa enemi blong mi. Oltaem, wei blong olketa fo laea, hemi kamap wos fogud.”

Aesaea 27:13

An long taem ya, bae wanfala man hemi bloum trampet fo kolem evriwan long laen blong yumi wea olketa enemi i fosim olketa fo stap long Asiria an long Ijip, fo kam an wosipim Yawe long Tambu Maonten long Jerusalem.

Aesaea 43:6

Bae mi talem olketa long not fo letem olketa pikinini blong mi fo kambaek long mi, an olketa long saot fo no stopem olketa from mi. Bae olketa ya mas lidim olketa san an dota blong mi hu i stap farawe kam long olketa ples long wol fo kambaek hom long mi.

Aesaea 49:22

Lod Yawe nao hemi tok moa olsem, “Bae mi givim saen fo olketa pipol blong olketa narafala kantri, mekem olketa tekem kam olketa pikinini blong yufala fo kam hom nao.

Aesaea 49:5

Bifoa, taem mi no bon yet, Yawe hemi siusim mi finis fo mi kamap wakaman blong hem, mekem mi tekem kambaek olketa blong Israel hu i stap kam olobaot long olketa narafala ples. Hem nao hemi mekhae long nem blong mi, an hemi givim paoa long mi,

Aesaea 54:7

Fo lelebet taem nomoa mi bin lusim yufala. Bat bae mi tekem yufala fo kambaek moa long mi bikos mi sore tumas long yufala.

Aesaea 56:8

Mi promis dat bae mi tekem kam olketa narafala pipol moa fo joenem yufala hu i joen finis wetem olketa pipol blong mi.” Hem nao mesij blong Lod Yawe hu hemi tekem yufala blong Israel fo kamaot from olketa narafala kantri wea olketa bin fosim yufala fo stap long hem.

Aesaea 59:19

Bae Yawe hemi kam olsem wanfala bikfala flad long taem blong saekloun. An stat long ist go-go kasem west, bae evri pipol i tinghae long biknem blong hem an long bikfala paoa blong hem.

Aesaea 60:4

!Yufala luklukraon an lukim wanem hemi gohed fo hapen! Olketa evriwan i hipap nao fo kam long yufala. Olketa hu i bon kam long laen blong yufala bae i kambaek from olketa farawe ples, nomata olketa pipol mas karim olketa kam, olsem olketa smolfala pikinini nomoa.

Aesaea 62:10

(Profet) !Yufala pipol blong Jerusalem, yufala mas kamaot from taon ya an redim wanfala bikfala rod. Taem olketa pipol blong yufala i kam hom, bae olketa save wakabaot kam falom. Yufala mas wakem rod ya fo hemi stret gudfala, an yufala mas aotem evri ston from hem. An yufala mas putumap wanfala flag olsem saen, mekem evri pipol blong olketa narafala kantri i save lukim.

Aesaea 66:19

Bae olketa save dat mi nao mi somaot olketa samting ya mekem olketa lukim. Bat olketa hu i laef yet, bae mi sendem olketa go long olketa farawe kantri olsem long Spen, an long Libia, an long Lidia wea olketa man long hem i save faet long bou, an long Tubal, an long Gris, wea olketa pipol i no herem yet nem blong mi, an i no lukim yet saen long bikfala paoa blong mi. An bae olketa talemaot abaotem bikfala paoa blong mi.

Jeremaea 23:3

“An olketa pipol blong mi wea mi letem olketa stap olobaot long olketa narafala kantri, olketa hu i laef yet, bae mi seleva mi tekem olketa kambaek moa long stret ples blong olketa. Bae i olsem wea wanfala gudfala man fo lukaftarem sipsip hemi hipimap kam olketa sipsip blong hem long ples wea hemi garem gudfala gras an wata, an olketa sipsip ya save stap gudfala an garem plande pikinini moa.

Jeremaea 30:17

Bat yufala, bae mi mekem yufala i gudbaek moa an hilim evri sik an soa blong yufala. Mi duim olsem, bikos olketa sei wea mi ronemaot yufala, an wea no eniwan hemi tinghevi long Saeon.” Hem nao mesij blong Yawe.

Jeremaea 50:4

Yawe hemi gohed fo tok olsem, “Long datfala taem, bae olketa blong Israel an olketa blong Jiuda i krae tumas fo somaot sore blong olketa, an bae olketa tane kambaek long mi Yawe hu mi God blong olketa.

Jeremaea 51:12

!Putumap flag fo somaot hemi taem fo go brekemdaon wolston blong datfala taon! !Hipimap olketa soldia raonem olketa, an putum plande long yumi fo gad! !Putum samfala soldia fo haed raonem, mekem olketa save holem eniwan hu i trae fo ranawe!” Yawe hemi mekem finis plan blong hem agensim Babilon, an bae hemi duim evrisamting ya barava olsem wea hemi talem.

Esikiel 28:25

Lod Yawe nao hemi tok olsem, “Taem mi tekem olketa pipol blong Israel fo kam tugeta from olketa narafala kantri, bae mi som dat mi holi. An bae olketa stap long lan wea mi bin givim long wakaman blong mi Jekob, hu hemi olo grani blong olketa.

Hosia 1:11

Long datfala taem, evri pipol blong Jiuda wetem evri pipol blong Israel, bae i joen tugeta moa, an siusim wanfala lida nomoa fo olketa. An pipol blong yumi bae hemi kamap strong moa long lan blong yumi, olsem wea God hemi plantem yumi long gudfala graon. !Ya, datfala de blong Jesreel, bae hemi barava gud tumas!

Hosia 2:2

Yawe hemi tok olsem, “Olketa pikinini blong mi. Yufala mas tokstrong long mami blong yufala bikos distaem hemi no waef blong mi nao an mi no hasban blong hem. Yufala mas tokstrong long hem fo hemi lusim olketa ravis wei blong hem, wea hemi gohed fo brekem lo blong marit, an hemi gohed fo salem hem seleva olobaot nomoa olsem juri.

Sefenaea 3:10

Olketa pipol blong mi wea i stap farawe long saet go long olketa riva long kantri long Kus, bae olketa kam fo givim olketa ofaring long mi.

Sekaraea 10:6

?Bae mi mekem olketa pipol blong Jiuda fo barava strong, an bae mi sevem olketa pipol blong Israel. Bae mi sore tumas long olketa, mekem mi tekem olketa evriwan kambaek long barava ples blong olketa. Bae olketa stap gudfala long ples ya, olsem wea mi nating bin les long olketa bifoa, bikos mi nao Yawe God blong olketa, an bae mi herem prea blong olketa.

Sekaraea 8:7

?Mi talem yufala tru nao: Long olketa ples wea olketa enemi i fosim pipol blong mi fo go stap olobaot long hem, long ist an long west, bae mi sevem olketa ya.

Gudnius abaotem Jisas Kraes wea Jon hemi raetem 7:35

Nao olketa bikman blong olketa Jiu ya, olketa stat fo tok olsem nao long olketa seleva, “?Wea nao man ya bae hemi go long hem, mekem yumi no save faendem hem ya? ?Waswe, bae hemi go stap wetem olketa wantok blong yumi wea olketa stap olobaot long kantri long Grik, mekem hemi tisim olketa Grik ya?

Diutronomi 32:26

Mi bin talem dat bae mi ronemaot yufala, an bae no eniwan long disfala wol hemi save tingabaotem yufala moa.

Jemes 1:1

Mi Jemes, wakaman blong God an blong Jisas Kraes Masta blong yumi. Mi sei halo long olketa pipol blong God wea yufala stap long evri ples long wol.

Revelesin 5:9

An olketa gohed fo singim wanfala niufala singsing wea hem sei olsem, “Yu nao man wea yu fit fo tekem skrol ya an brekem olketa tambu mak long hem. Bikos olketa bin kilim yu dae, an disfala blad blong dae blong yu hemi peimaot olketa pipol fo God. Olketa pipol ya i stap kam long evri traeb an long evri langguis an long evri laen long wol an long evri kantri.

Revelesin 7:1

Bihaen, mi lukim moa fofala enjel wea olketa gohed fo stanap long fofala kona blong wol ya. Olketa stanap fo satem fofala win long wol, mekem no eni win hemi save blou kam long graon an long olketa tri an long si.