1 Timoti 4:7 - Pijin Bible

⁷ Yu no lisin go long olketa krangge stori wea olketa nating tru. Bat yu mas gohed fo mekem Kristin laef blong yu fo kamap strong moa.

Pijin Deuterocanon

⁷ Yu no lisin go long olketa krangge stori wea olketa nating tru. Bat yu mas gohed fo mekem Kristin laef blong yu fo kamap strong moa.

1 Timoti 4:7 Iomraidhean Croise

Aposol 24:16

So mi barava traehad oltaem nomoa fo mekem tingting blong mi fo no filsem long ae blong God o long ae blong olketa pipol.

1 Timoti 1:4

Yu mas talem olketa fo no westem taem fo tokabaotem olketa kastom stori wea i nating tru an olketa longfala stori abaotem olketa laen blong olketa olo long bifoa. Olketa samting ya i mekem pipol fo raoa nomoa long toktok ya, an hemi no mekem pipol fo duim wanem God hemi planem fo olketa duim. Wei blong biliv nomoa hemi save helpem yumi fo falom plan blong God.

1 Timoti 1:9

An yumi save tu dat olketa lo ya olketa no stap fo stretem olketa gudfala pipol ya, bat fo stretem olketa pipol hu i brekem olketa lo an olketa hu i mekem trabol olowe. Hemi fo stretem wei blong olketa pipol hu i no falom God, an olketa hu i stap long wei blong sin, an olketa hu i tokdaonem God an olketa narasamting moa wea hemi holi. Hemi fo stretem olketa hu i kilim dae mami o dadi blong olketa, an olketa hu i kilim dae eni nara man moa.

1 Timoti 2:10

Olketa woman hu i laek fo falom toktok blong God, olketa mas duim olketa gudfala waka wea hemi fitim fo olketa duim.

1 Timoti 3:16

An hemi tru nao, tru tising abaotem biliv long Kraes hemi barava bikfala samting tumas. An tising ya nao hemi olsem, Kraes hemi somaot hem seleva long bodi olsem man. An Holi Spirit hemi somaot dat wei blong Kraes hemi barava stret. An olketa enjel olketa lukim tu. Toktok abaotem hem hemi go-goraon long olketa kantri, an plande pipol long wol i biliv long hem. An God hemi tekem hem goap long heven.

1 Timoti 4:8

Hemi gud sapos yumi gohed fo mekem bodi blong yumi fo kamap strong moa. Bat hemi barava gudfala moa sapos yumi gohed fo mekem Kristin laef blong yumi fo kamap strong moa, bikos diswan hemi save helpem yumi long plande wei. Hemi givim gudfala samting long laef blong yumi distaem, an long laef wea bae hemi kam yet tu.

1 Timoti 6:11

Bat yu nao yu man blong God, an yu mas no duim enisamting olsem ya. Yu mas traehad oltaem fo duim nomoa olketa samting wea hemi stret long ae blong God. An yu mas stapgud long Kristin laef blong yu, an gohed fo holem biliv blong yu strong. Yu mas stanap strong long olketa hadtaem, an yu mas garem lav olowe, an yu mas kaen tumas long olketa nara pipol.

1 Timoti 6:20

Timoti, yu mas lukaftarem gud disfala Gudnius wea God hemi putum long han blong yu finis. Yu mas tanem baeksaet blong yu long disfala nogud toktok wea hemi agensim God.

1 Timoti 6:3

Samfala pipol stat fo tisim samting wea hemi deferen, an olketa no save falom barava tru tising blong Masta blong yumi Jisas Kraes wetem olketa tising blong sios.

1 Timoti 6:5

Olketa save raoa olowe nomoa, an olketa no garem eni stretfala tingting, an olketa no save luksave long wanem nao hemi barava tru samting. Olketa tingse wei fo biliv long God hemi wanfala gudfala wei fo kamap ris.

2 Timoti 2:16

Yu mas tanem baeksaet blong yu long enikaen ravis toktok, bikos olketa pipol hu i tok olsem, olketa mekem olketa nara pipol fo goawe from God.

2 Timoti 2:23

Bat yu mas no lisin long olketa krangge toktok wea hemi no garem eni mining, bikos yu save finis olketa toktok olsem ya save mekem pipol fo raoa tumas.

2 Timoti 3:12

Hemi tru tumas, evriwan hu i joen wetem Jisas Kraes an wande falom Kristin laef, bae olketa pipol save mekem hem safa.

2 Timoti 3:5

Bae olketa laek fo somaot olsem olketa i Kristin, bat olketa no laekem paoa blong God fo kontrolem laef blong olketa. Yu mas no joen wetem olketa kaen pipol olsem.

2 Timoti 4:4

An bae olketa lusim tru tising an tane go fo lisin nomoa long olketa laea stori.

Taetas 1:14

An tokhad long olketa mekem olketa no falom laea kastom stori blong olketa Jiu an toktok blong olketa hu i agensim finis tru toktok.

Taetas 2:12

Kaenfala lav blong God ya, hemi tisim yumi fo lusim olketa wei wea hemi no stret long ae blong God, an fo no falom olketa ravis tingting blong disfala wol. Yumi mas somaot barava gudfala wei long laef blong yumi, an yumi mas duim evrisamting wea hemi stret an hemi mekem God hapi long yumi.

Taetas 3:9

Bat yu mas tanem baeksaet long enikaen krangge toktok, an long olketa stori abaotem olketa laen blong olketa olo long bifoa, an long enikaen faet o raoa abaotem mining blong Lo blong Mosis. Olketa toktok olsem hemi no garem eni gud samting long hem, an hemi nating save helpem eniwan.

Hibrus 5:14

Bat eniwan hu i kaikaim strongfala kaikai, hemi bikman finis. Man olsem ya, hemi save finis hao fo luksave long wanem hemi gudfala an wanem hemi ravis.