1 Samuel 8:9 - Pijin Bible

⁹ Yu go, yu duim olsem wea olketa laekem, bat fastaem yu mas talemgud long olketa abaotem wei wea king bae rulim olketa.”

Pijin Deuterocanon

⁹ Yu go, yu duim olsem wea olketa laekem, bat fastaem yu mas talemgud long olketa abaotem wei wea king bae rulim olketa.”

1 Samuel 8:9 Iomraidhean Croise

Jeremaea 11:7

Stat long taem wea mi tekem olketa grani blong yufala aot from Ijip, kam kasem tude, oltaem mi gohed fo talemaot disfala woning long olketa, ‘!Obeim mi!’

Esikiel 3:18

Sapos mi talemaot dat wanfala nogud man bae hemi dae, bat yu nating tok long hem fo sensim ravis wei blong hem, mekem hemi save sevem laef blong hem, bae man ya hemi dae long sin blong hem. Bat bae mi panisim yu nao from dae blong hem.

Esikiel 46:18

King mas no tekem eni lan wea hemi blong olketa pipol. Hemi save givim nomoa lan blong hem seleva fo olketa pikinini blong hem. Mi laekem olketa pipol blong mi fo save kipim lan blong olketa fo evritaem olowe.”

1 Samuel 10:25

Den, Samuel hemi talemaot olketa waka blong king wetem olketa samting wea hemi garem raet fo duim. An hemi raetemdaon olketa samting ya long wanfala buk. Bihaen, hemi putum gud disfala buk long tambuhaos blong Yawe. An hemi sendem gobaek olketa evriwan long olketa ples blong olketa.

1 Samuel 12:1

Den Profet Samuel hemi tok olsem long olketa, “Distaem, mi mektambu finis long king blong yufala olsem yufala bin askem long mi.

1 Samuel 14:52

Oltaem long laef blong King Sol, hemi save faet strong tumas agensim pipol blong Filistia. Dastawe taem hemi lukim eni man wea hemi strong an hemi no save fraet, hemi tekem hem kam fo joenem olketa soldia blong hem.

1 Samuel 2:13

So tufala no falom stretfala wei long olketa sakrifaes blong olketa pipol. Oltaem, taem pipol blong Israel i kam long Saelo fo mekem sakrifaes, olketa kukim haf long mit blong sakrifaes wea hemi blong olketa long wanfala bikfala sospen. An oltaem, tufala ya i sendem go wakaman blong tufala fo hemi tekem wanfala bikfala fok an pusum go insaet long sospen ya. Taem hemi liftimap fok ya moa, olketa mit wea i hang long fok ya, tufala nao i tekem. Oltaem, tufala ya i du-duim olsem fo ravem olketa pipol wea i kam fo mekem sakrifaes.

1 Samuel 8:8

Stat long bifoa kam long taem wea mi bin tekemaot olketa olo blong yufala from Ijip, oltaem olketa lusim mi an olketa gohed fo falom olketa narafala god. An distaem, olketa gohed fo lusim yu tu.