1 Samuel 3:19 - Pijin Bible

¹⁹ Taem Samuel hemi gohed fo kamap bikfala, oltaem Yawe hemi stap wetem hem. An hemi gohed fo mekem evrisamting wea Samuel hemi talemaot fo kamap tru.

Pijin Deuterocanon

¹⁹ Taem Samuel hemi gohed fo kamap bikfala, oltaem Yawe hemi stap wetem hem. An hemi gohed fo mekem evrisamting wea Samuel hemi talemaot fo kamap tru.

1 Samuel 3:19 Iomraidhean Croise

Jenesis 21:22

Nao long taem ya, King Abimelek wetem Fikol, bos blong olketa soldia blong hem, tufala kam fo lukim Ebraham. Nao king ya hemi tok olsem long hem, “Mi lukim finis dat God hemi stap wetem yu long evrisamting wea yu duim.

Jenesis 28:15

Yu mas rimemba dat bae mi stap wetem yu fo lukaftarem yu long evri ples yu go, an bae mi tekem yu kambaek long disfala ples ya moa. Bae mi no lego long yu, bae mi duim evrisamting ya wea mi bin promisim long yu.”

Jenesis 39:2

Yawe hemi stap wetem Josef, an olketa samting wea hemi duim, hemi gohed gudfala tumas. Josef hemi stap long haos blong Potifa, disfala man ya blong Ijip hu hemi masta blong hem.

Jenesis 39:3

Potifa hemi lukim dat Yawe hemi gohed fo stap wetem Josef, hemi gohed fo mekem olketa waka blong hem fo hemi gohed gudfala tumas.

1 Kings 8:56

Hemi tok olsem, “Yumi preisim Yawe, bikos hemi bin mekem yumi pipol blong hem fo garem piis, olsem wea hemi bin promis fo duim. Hemi barava kipim evri gudfala promis blong hem wea hemi bin talemaot long Mosis, wakaman blong hem bifoa.

2 Kings 10:10

Yufala mas save, evrisamting wea Mesij blong Yawe hemi bin talem agensim laen blong King Ehab hemi kamap nao. Wakaman blong hem bifoa, Profet Elaeja, hemi talemaot toktok ya, an Yawe hemi duim olketa samting olsem hemi bin talem.”

2 Kings 15:12

So long disfala wei, Mesij blong Yawe hemi bin talem long King Jehu bifoa hemi kam tru. Hemi bin sei, “Mi promisim yu olsem, olketa long laen blong yu long fofala jeneresin bae i kamap king blong Israel.”

2 Kings 22:16

“Yawe nao hemi tok olsem, ‘Bae mi spoelem Jerusalem, an bae mi panisim olketa pipol blong hem olsem olketa toktok blong trabol i talem long buk wea king blong Jiuda hemi ridim.

Aesaea 43:2

Taem trabol hemi kasem yufala olsem wea yufala gotru long dipsi, bae mi stap wetem yufala. An taem yufala garem hadtaem olsem wea yufala gotru long riva wea hemi ran bikfala, bae hemi no save draonem yufala. Ya, taem trabol hemi kasem yufala olsem wea yufala gotru long faea, bae hemi no save bonem yufala.

Aesaea 44:26

Bat taem wakaman blong mi hemi talem dat bae wanfala samting hemi hapen, o mi sendem wanfala man blong mi fo talemaot olketa plan blong mi, bae mi mekem olketa samting ya fo hapen tru olsem nao. Mi nao mi talem dat bae pipol i stap moa long Jerusalem, an bae olketa stanemap moa olketa taon long Jiuda. Ya, olketa taon ya wea olketa enemi i spoelem finis, bae i stanap moa from graon.

Aesaea 55:11

Toktok blong mi bae hemi olsem tu. Bae evrisamting wea mi talem mas hapen nao olsem wea mi bin planem. An wanem mi talem, hemi no save mis. Ya, bae evrisamting wea mi talem mas hapen nao olsem wea mi laekem.

Matiu 1:23

“Wanfala yang gele hu no eni man hemi stap wetem hem yet, bae hemi babule an bae hemi bonem wanfala pikinini boe. An bae olketa kolem boe ya, Imanuel.” Disfala nem ya hemi minim, “God hemi stap wetem yumi.”

Gudnius abaotem Jisas Kraes wea Luk hemi raetem 1:28

So taem enjel ya hemi go kasem Meri, hemi sei, “Piis blong God hemi stap wetem yu. God hemi stap wetem yu an hemi blesim yu.”

Gudnius abaotem Jisas Kraes wea Luk hemi raetem 1:80

Nao pikinini ya hemi grouap kam an tingting blong hem hemi kamap strong moa. An hemi stap long drae eria go-go kasem taem wea hemi statem waka blong hem long midol long olketa pipol blong Israel.

Gudnius abaotem Jisas Kraes wea Luk hemi raetem 2:40

An pikinini ya hemi grouap kam, an tingting blong hem hemi kamap strong an hemi kamap barava waes fogud tu. An oltaem nomoa God hemi barava blesim hem.

Gudnius abaotem Jisas Kraes wea Luk hemi raetem 2:52

An Jisas hemi gohed fo grouap moa, an hemi gohed fo kamap waes fogud tu. An God hemi barava hapi tumas wetem hem, an olketa pipol i hapi tumas long hem tu.

2 Korin 13:11

Nao olketa Kristin fren, mi sei gudbae long yufala. Yufala mas herem olketa toktok blong mi an traehad fo kamap barava nambawan. An yufala evriwan mas wanmaen an mas stap long piis. Long wei ya, bae God hu hemi givim lav an hu hemi givim piis, bae hemi stap wetem yufala.

2 Korin 13:14

Letem kaenfala lav blong Masta blong yumi Jisas Kraes, an lav blong God hemi stap wetem yufala. An letem Holi Spirit mekem yufala stapgud tugeta.

Diutronomi 18:22

Wei fo save long diskaen samting hemi olsem, sapos wanfala profet hemi toktok long nem blong Yawe, bat olketa samting wea hem bin talem i no hapen, hem nao hemi somaot dat toktok ya hemi no blong Yawe. Profet ya hemi bin toktok nating nomoa, so yufala mas no fraet long hem.’”

2 Timoti 4:22

Letem Masta hemi stap long laef blong yu. An letem kaenfala lav blong God hemi stap wetem yufala.

Josua 21:45

Yawe hemi kipim evri promis wea hemi bin mekem wetem olketa grani blong olketa bifoa. Evri gudfala promis blong hem long olketa hemi kamap tru nao.

Jajis 13:24

Bihaen, woman ya hemi bonem wanfala san, an kolem hem Samson. Pikinini ya hemi grouap an Yawe hemi blesim hem.

1 Samuel 10:7

Taem olketa samting ya i kasem yu, bae yu save duim enisamting yu tingting fo duim bikos Yawe hemi stap wetem yu.

1 Samuel 12:2

An distaem, hemi stap wetem yufala fo lidim yufala. !Bat yufala lukim nao! Mi olo finis. Hea blong mi hemi waet, an tufala san blong mi i bikfala finis. Mi bin lidim yufala longtaem, stat long taem wea mi yangfala, kam kasem tude.

1 Samuel 16:18

Wanfala long olketa hemi tok olsem, “Yufala save, wanfala yangman, san blong Jese long Betlehem, hemi save plei gud tumas. Hemi wanfala gudfala soldia wea hemi no save fraet. Fes blong hem hemi luknaes, an hemi save toktok gud tu, an Yawe hemi stap wetem hem.”

1 Samuel 18:12

Yawe hemi stap wetem Deved, bat hemi lusim Sol finis, dastawe Sol hemi fraet tumas long Deved.

1 Samuel 18:14

Oltaem nomoa hemi winim olketa faet bikos Yawe hemi stap wetem hem.

1 Samuel 18:5

Oraet, Deved hemi gohed fo win long evri ples wea king hemi sendem hem fo go faet. So king hemi mekem hem fo kamap wanfala komanda blong olketa soldia blong hem. Disfala samting hemi mekem olketa soldia wetem olketa narafala komanda long ami i hapi tumas.

1 Samuel 2:21

Nao Yawe hemi blesim Hana, go-go hemi bonem trifala boe moa an tufala gele. Bat boe ya Samuel hemi grouap long tambuhaos blong Yawe.

1 Samuel 2:26

Bat disfala boe Samuel hemi gohed fo kamap bikfala, an oltaem Yawe hemi hapi moa wetem hem, an olketa pipol tu i hapi moa wetem hem.

1 Samuel 9:6

Bat wakaman ya hemi tok olsem, “!Weit fastaem! Wanfala man blong God hemi stap long taon long hia. Olketa pipol tinghae tumas long hem bikos evrisamting wea hemi talem i barava tru tumas. Hemi moabeta fo yumitufala go lukim hem. Maet hemi save talemaot ples wea olketa dongki i stap.”