1 Samuel 13:6 - Pijin Bible

⁶ Den olketa faet long ami blong Israel. An taem ami blong Israel ya i filim olsem olketa barava trabol, olketa ranawe. Olketa go haed long olketa kev, an long olketa busis, an olobaot long olketa bikfala ston, an long olketa hol, an long olketa wel tu.

Pijin Deuterocanon

⁶ Den olketa faet long ami blong Israel. An taem ami blong Israel ya i filim olsem olketa barava trabol, olketa ranawe. Olketa go haed long olketa kev, an long olketa busis, an olobaot long olketa bikfala ston, an long olketa hol, an long olketa wel tu.

1 Samuel 13:6 Iomraidhean Croise

2 Samuel 24:14

Den Deved hemi tok olsem, “!Mi barava filnogud nao! Yawe hemi barava kaen tumas, so hemi moabeta fo hemi siusim panis fo mifala. !Bat plis, no letem olketa enemi i panisim mi!”

Aesaea 42:22

Bat olketa enemi i bin kam an stilim evrisamting blong olketa ya, an torowem olketa evriwan long hol insaet long graon, o lokem olketa insaet long prisin. Olketa enemi ya i ravem olketa, an spoelem olketa tumas, an no eniwan nao save sevem olketa o mekem olketa fri.

Jeremaea 41:9

Disfala ren tangk wea Ismael hemi torowem go ded bodi blong olketa man ya long hem, hemi bikwan tumas. King Asa bifoa hemi bin digim ren tangk ya fo fulumap long wata long taem wea King Baasa blong Israel, hemi bin kam fo faet agensim hem. Bat Ismael ya, hemi fulumapem ren tangk ya long ded bodi.

Esikiel 33:27

“Yu talem olketa dat mi Lod Yawe nao mi tok olsem: Mi mekem disfala strongfala promis long nem blong mi hu mi laef olowe: Yufala evriwan hu i laef yet long olketa taon, bae dae long faet. An yufala hu i stap aotsaet long taon, bae mi givim yufala long olketa wael animol fo kaikaim yufala. An yufala hu i gohed fo haed long olketa hil, an long olketa kev, bae yufala evriwan i dae long wanfala ravis sik.

Filipae 1:23

Mi barava stap long midol long tufala gudfala samting nao. Mi laekem tumas fo lusim laef an go stap wetem Kraes, bikos hem nao hemi barava nambawan samting.

Hibrus 11:38

From diswan nao, olketa pipol hu i biliv ya olketa goraon an staphaed olobaot nomoa long olketa drae eria, an antap long olketa hil, an insaet long olketa kev, an enikaen hol moa long graon. Olketa i gudfala pipol tumas, wea hemi no fit fo olketa stap tugeta wetem olketa pipol blong disfala wol ya.

Josua 8:20

Taem Josua an olketa soldia blong hem i lukim dat olketa long narafala ami blong Josua i kam insaet finis from bihaen an gohed fo bonem datfala taon, olketa taneraon an stat fo faet baek an kilim dae olketa man blong Ai. An taem olketa man blong Ai i lukgo bihaen long taon blong olketa, olketa lukim nao bikfala smok hemi goap long skae. Olketa blong Ai i nating garem nao eni ples fo ranawe long hem, bikos olketa soldia blong Israel wea i bin ran go fastaem long olketa long datfala drae eria, i taneraon kambaek finis fo faetem olketa an kilim olketa dae.

Jajis 10:9

An laen blong Amon i go akros long Jodan Riva tu fo faetem traeb blong Jiuda, wetem traeb blong Benjamin, an traeb blong Efrem. From disfala samting nao pipol blong Israel i safa tumas.

Jajis 20:41

Oraet, olketa hu i laea fo ranawe i taneraon fo faet. So ami blong Benjamin hemi fraet fogud an olketa no save nao wanem fo duim, bikos olketa luksave dat bae evriwan i dae.

Jajis 6:2

Olketa pipol blong Midian i strong tumas an hemi mekem pipol blong Israel i ranawe go antap long hil an haed long olketa kev an olketa narafala sef ples.

1 Samuel 13:15

Oraet, Samuel hemi lusim Gilgal. Bihaen, Sol hemi gobaek long Geba long distrik long Benjamin. An olketa soldia long Gilgal i falom go king ya, an joenem olketa soldia blong hem long ples ya. An long taem wea hemi sekemap olketa soldia blong hem, hemi faendemaot olsem 600 soldia nomoa i stap.

1 Samuel 14:11

So, tufala go. An taem olketa lukim tufala, olketa tok olsem, “!Ei, yufala luk go! Olketa Hibru i ka-kamaot long olketa hol wea i haed long hem.”

1 Samuel 14:22

Den olketa soldia blong Israel wea i bin haed olobaot long olketa hil blong Efrem i herem dat ami blong Filistia i ra-ranawei. So olketa tu i joenem ami blong Israel fo ronem olketa,

1 Samuel 23:19

Nao samfala man blong taon long Jif i go fo lukim King Sol long Gibea. Olketa tok olsem long hem, “Distaem Deved hemi stap long eria blong mifala. Hemi haed long olketa strongfala sefples long Hores wea hemi long hil long Hakila, saot long drae eria long Jesimon.

1 Samuel 24:3

Go-go, Sol hemi kam long wanfala kev kolsap long ples wea olketa sipsip i save stap long saet long rod. Nao bele blong hem nogud an hem laek go long bus, so hemi go insaet long kev. Bat wea, Deved wetem olketa man blong hem i haed barava insaet long datfala sem kev.

1 Samuel 31:7

Long datfala taem, olketa pipol blong Israel hu i stap kam long narasaet long Jesreel Vali, an long narasaet long Jodan Riva long ist, olketa herem nius wea ami blong Israel i ranawe finis, an Sol wetem trifala san blong hem i dae. So olketa ranawe an lusim olketa taon blong olketa. Den olketa blong Filistia i kam tekova long olketa taon ya.

1 Samuel 7:7

Taem olketa pipol blong Filistia i herem dat olketa pipol blong Israel i hipap long Mispa, olketa sif i tekem ami fo faetem olketa. An taem olketa pipol blong Israel i herem nius ya, olketa fraet tumas.