1 Korin 3:12 - Pijin Bible

¹² An taem olketa pipol i bildim disfala haos ya, bae olketa yusim olketa gudfala samting olsem gol an silva an olketa naesfala ston o maet olketa yusim olketa samting olsem stik an gras an lif nomoa.

Pijin Deuterocanon

¹² An taem olketa pipol i bildim disfala haos ya, bae olketa yusim olketa gudfala samting olsem gol an silva an olketa naesfala ston o maet olketa yusim olketa samting olsem stik an gras an lif nomoa.

1 Korin 3:12 Iomraidhean Croise

Sams 119:72

Mi laekem tumas disfala gudfala tising blong yu winim evri seleni long disfala wol.

Sams 19:10

Mi laekem tumas olketa toktok blong Yawe bikos hemi moabeta long staka seleni, an hemi suit moa winim hani.

Eksodas 5:12

So olketa go fo lukaotem drae gras long evri ples long Ijip.

Provebs 16:16

Gol hemi gud, waes hemi moabeta. Silva hemi gud, save hemi moabeta.

Provebs 30:6

Yu no sensim toktok blong hem, nogud hemi tokstrong long yu an som dat yu laea.

Provebs 8:10

Siusim tising blong mi, no siusim silva. Siusim save blong mi, no siusim gol.

Aesaea 60:17

“Fastaem yufala gohed fo yusim bras fo wakem olketa samting, bat bae mi givim gol long yufala fo yusim. Fastaem yufala gohed fo yusim aean an stik, bat bae mi givim silva an bras long yufala. Fastaem yufala gohed fo yusim ston, bat bae mi givim aean long yufala. Fastaem olketa bikman blong yufala i mekem yufala safa, bat bae mi mekem olketa fo rul long stretfala wei an long piis.

Jeremaea 23:28

Sapos wanfala laea profet hemi laek fo tokabaotem drim blong hem, oraet, hemi save duim nao. Bat man hu hemi herem barava toktok blong mi, hemi mas talemaot stret, olsem wea mi givim long hem. Olketa drim blong olketa ya an barava toktok blong mi i deferen tumas, barava olsem ravis blong wit an gudfala kaikai blong hem i deferen.

Aposol 20:30

An bae samfala long yufala tu, bae olketa stat fo talemaot olketa laea tising an traehad fo pulum olketa Kristin fo go falom olketa.

Leta wea Pol hemi raetem go long sios long Rom 16:17

Mi talem strong long yufala olketa Kristin fren, yufala mas lukaot long olketa pipol hu i wande splitim sios an spoelem biliv blong yufala wetem tising wea hemi deferen long olketa tising wea yufala lanem finis. Yufala mas no lisin long olketa.

1 Korin 3:11

Jisas Kraes nao hemi stap olsem faondesin finis, an no eni nara faondesin moa eniwan i save putum.

1 Korin 3:13

An long Lasde bae waka blong evriwan hemi kamaot klia nao. Bikos long de ya, faea nao bae hemi somaot olketa kaen waka, wea faea bae hemi traem evri waka ya, mekem hemi kamaot klia sapos hemi gud o nomoa.

2 Korin 2:17

Mifala no olsem plande nara pipol wea olketa talemaot toktok blong God bikos olketa laek fo winim seleni. Nomoa. God nao hemi siusim mifala, an mifala toktru olowe long ae blong hem. Bikos mifala stap joen wetem Kraes, mifala talemaot toktok blong hem olsem wakaman blong God.

2 Korin 4:2

Mifala lusim go olketa ravis wei wea hemi staphaed, an no save laea, an no save sensim toktok blong God. Nomoa nao. Mifala talemaot nomoa tru toktok olowe, mekem God an olketa pipol i luksave long gudfala wei blong mifala.

Kolosi 2:8

An yufala mas lukaot gud, nogud eniwan hemi kam an trikim yufala long ravis stori ya wea hemi barava tingting blong man nomoa. Olketa toktok olsem, olketa no kamaot long Kraes ya, bat olketa kamaot nomoa long olketa stori blong olketa olo an long olketa enikaen paoa long wol.

1 Timoti 6:3

Samfala pipol stat fo tisim samting wea hemi deferen, an olketa no save falom barava tru tising blong Masta blong yumi Jisas Kraes wetem olketa tising blong sios.

2 Timoti 2:20

Samfala dis insaet long bikfala haos olketa wakem long gol an silva, an samfala dis olketa wakem long stik o long graon. Samfala long olketa dis ya olketa save yusim nomoa long spesol taem, bat samfala olketa save yusim long enitaem nomoa.

2 Timoti 3:13

An olketa ravis pipol olsem olketa laea profet, bae olketa gohed fo laea long olketa pipol. Seitan tu bae hemi laea moa long olketa, mekem wei blong olketa hemi barava wos moa.

2 Timoti 3:7

an olketa traehad oltaem fo lanem plande samting bat olketa no save minim wanem hemi tru.

2 Timoti 4:3

Bikos bae yumi kasem taem olketa pipol no wande lisin long tru tising, bae olketa falom tingting blong olketa seleva nomoa. Bae olketa lukaotem olketa tisa olobaot, mekem olketa save herem nomoa tising wea olketa seleva laekem tumas fo herem.

Hibrus 13:9

Yufala no letem enikaen tising fo mekem yufala lusim disfala rod wea hemi stret gudfala. Hemi gud fo God hemi mekem tingting blong yumi i strong long kaenfala lav blong hem. Bat olketa enikaen rul blong kaikai ya, olketa no save mekem tingting blong yumi i strong, an olketa no duim eni gudfala samting tu fo helpem olketa pipol hu i gohed fo falom olketa.

1 Pita 1:7

Olketa save putum gol insaet long faea fo testem an mekem klin gudfala, nomata gol ya hemi save lus nomoa. Nao biliv blong yufala hemi bikfala samting winim gol. An olketa samting wea yufala safa long hem, hemi kam fo testem biliv blong yufala an mekem hem strong gudfala. Long de wea Jisas Kraes bae hemi kambaek moa, bae hemi preisim yufala an liftimap nem blong yufala an tokhae long yufala.

Revelesin 2:14

‘Bat samfala samting nomoa mi no laekem long yufala. Samfala pipol long yufala, olketa gohed fo falom nomoa tising blong profet Balam, wea bifoa hemi tisim King Balak abaotem wei fo trikim pipol blong Israel fo foldaon long sin. Hemi mekem olketa kaikaim mit wea olketa bin sakrifaesim finis long laea god, an hemi mekem olketa fo durong wetem olketa woman.

Revelesin 21:18

Wolston ya, olketa mekem long naesfala ston jaspa, an taon ya olketa mekem long nambawan gol, wea hemi saen olsem glas.

Revelesin 3:18

Bat mi talem yufala stret, yufala mas peim barava gudfala gol long mi, mekem yufala kamap ris. An yufala mas peim waet kaleko long mi fo yufala werem, mekem yufala no save filsem moa long neket bodi blong yufala. An yufala mas peim tu samfala meresin long mi fo putum long ae blong yufala, mekem yufala save lukluk gud moa.