Sikepaskro 8:1 - O Debleskro Drom 2021 (Sinte)

¹ Kai hi ko mensho, kai hi tchatchepah gosewo? Kai hi kowa, kai haiwell te penell, hoske tchomone jaake hi har kowa hi? Dik i menshes an i jaka, palle nai peneh, hi lo gosewo oder gar. Te hi lo gosewo, palle dikell lo latches ap i wawareste. Leskro goswepen lell leskri choli krik.

O Debleskro Lab 2024 (Sinte-Manouche)

¹ Kay hi ko mensho, kay hi čačepah gosevo? Kay hi kova, kay hayvell te penell, hoske čomone yaake hi har kova hi? Dik i menshes an i yaka, palle nay peneh, hi lo gosevo oder gar. Te hi lo gosevo, palle dikell lo lačes ap i vavareste. Leskro gosvepen lell leskri rholi krik.

Sikepaskro 8:1 Iomraidhean Croise

1. Mose 40:8

Penan jon ap leste: “Mer dam suni. Un kek hi koi, kai penell nashte, hoi mare sunja menge penenna.” Penas o Josef ap lende: “O Dewel penell nai, hoi kol sunja penenna. Penenn tumare sunja mange!”

Hiob 33:23

Te well palle i bolepaskres pash leste, kowa ap leskri rig hi, jek kol serjendar, kolen o Dewel win bitchrell, te penenn le menge, hoi menge mishto hi,

2. Mose 34:35

Har was lo win, te penell lo ap i Israelitarja, hoi o baro Dewel leske penas, dikan jon, har leskro mui hi har o kham. Palle khatras o Mose peskro mui pale tel ko diklo, bis te djas lo pale dren, te rakrell lo o baro Debleha.

Gosewe laba 1:6

Jon nai haiwenn gosewe laba, un rakepen, kai o tchatchepen dren khatedo hi, awa, laba, kai gosewe menshe penan, un sawe, kai hunte rodess, hoi jon kamenn te penell.

Gosewe laba 12:8

Kones gosewo koowa an o shero hi, kowa well sharedo. Kones dinelo koowa an o shero hi, ap koleste dikenn le tele.

Gosewe laba 17:24

Kowa, kai haiwell, hoi mishto un gar mishto hi, mukell pes gar tele te rikrell, te lell lo gomme budeder goswepen. I dinelo dikell kate te kote.

Gosewe laba 21:29

O tchilatcho stakrell soreles pre i baro mujeha. Kowa, kai o tchatchepaske tardo hi, mukell gar peskro drom.

Gosewe laba 24:5

I gosewo mursh hi har i sorelo, un jek, kai bud djinell, an koleste hi pherdi soor.

Daniel 2:22

Job tchakrella pre un sikrell, hoi khatedo hi, un djinell, hoi an o tamlepen hi; pash leste hi kek tamlepen.

Daniel 2:47

Un o baro rai penas ap o Daniel: “Tchatchepah tumaro Dewel hi o Dewel pral i tsele debla, un o rai pral i tsele bare raja ap kai phub. Job sikrell kowa, hoi khatedo his un kek djinas. Jaake nai penal tu menge, hoi koi suni kamas te penell.”

Mateo 17:2

Un glan lengre jaka las lo i bolepaskro railepen. Leskro mui was har o kham. Un leskro ripen was bijalo har i bari momeli.

Bičepangre 4:13

Har jon dikan, har o Petro un o Johanni rakran, kai kek traash an lende his, kran le bare jaka. Un jon haiwan, kai kolla kek bare rakepangre un gosewe mursha hi, un djinan ninna, kai jon o Jesuseha khetne his.

Bičepangre 4:29

Rai, shuneh tu, kai jon men kanna trad denna? Mer ham tire budepangre. De men koi soor, te nai rakras tutar!

Bičepangre 6:15

Un kol tsele pralstune dikan ap o Stefaneste, har leskro mui was jaake har i Debleskro bolepaskro.

Remarja 13:5

Doleske hunte shuness ap lende, gar kokres dran i daar glan i phagi, na-a, ninna dran tiro dji, hoi tuke penell, te kress tu o latchepen.

Efesarja 6:19

Mangenn mange ninna, te dell o Dewel man i tchatche laba, un te darap gar i menshendar, te sikrap lende o Debleskro drom un penap lenge kowa, hoi djinenn le gar.

5. Mose 28:50

Len hi kek dji tumenge. Ninna i phure un i tchawe khaitenn len gar.

2. Timoteo 4:17

O rai Jesus his ap miri rig, un das man i soor, te nai penap kote o tselo latcho lab lestar, jaake te shunan les ninna kolla, kai hi kek bibolde. Un job las man jaake dran lengre wasta win, har te woms dran i leweskro mui win lino.

2. Petro 1:20

Un kowa hunte djinenn tumer: Kek Debleskro rakepaskro rakras nai pestar Debleskre laba.