Nehemia 9:6 - O Debleskro Drom 2021 (Sinte)

⁶ Tu, baro Dewel hal kokres o Dewel! Tu kral o bolepen un leskre tsele bolepangre momlia, un i phub un lauter, hoi ap late hi, ninna o baro pani un lauter, hoi an leste hi. Un tu kral, te djiwell kowa lauter. Un i tsele bolepangre an o bolepen witsrenn pen tele glan tute.

O Debleskro Lab 2024 (Sinte-Manouche)

⁶ Tou, baro Devel hal kokres o Devel! Tou kral o bolepen oun leskre tsele bolepangre momlia, oun i phoub oun lauter, hoy ap late hi, ninna o baro pani oun lauter, hoy an leste hi. Oun tou kral, te djivell kova lauter. Oun i tsele bolepangre an o bolepen vitsrenn pen tele glan toute.

Nehemia 9:6 Iomraidhean Croise

1. Mose 1:1

Glan i rah rah tsiro kras o Dewel o bolepen un i phub.

1. Mose 1:9

Un o Dewel penas, te well ko pani ap i phub khetne ap jek rig, te well o truk them diklo. Un jaake was kowa.

1. Mose 2:1

Jaake was o bolepen un i phub kerdo, un halauter, hoi koi hi.

1. Mose 32:2

Un o Jakob djas dureder. Un o Debleskre bolepangre tapran les ap o drom.

1. Rajengro liil 22:19

O Micha penas: “Shun, hoi o baro Dewel penell! Me dikom o baro Debles, har job beshdo his ap peskri beshepaskri. Un i tsele bolepangre his pash leste tardo ap leskri tchatchi rig un ap leskri serwi rig.

1. Rajengro liil 8:27

Nai well tchatcho, kai o Dewel kamell te djiwell ap i phub? O tselo bolepen hi gar bares doha leske. Har nai krals kowa kau kheer, hoi me mukom te krell?

2. Rajengro liil 19:15

un mangas o baro Debles un penas: “Baro Dewel, kai hal o Israeleskro Dewel, tu hal pral i bolepangre beshdo. Tu kokres hal o Dewel pral i tsele themma ap kai phub. Tu hal, kai kral o bolepen un i phub.

2. Rajengro liil 19:19

Kanna, maro baro Dewel, le men win dran o wast o baro rajestar pral o them Assur, te nai dikenn un haiwenn i menshe an i tsele themma ap kai phub, kai tu, baro Dewel, kokres o Dewel hal.”

Nehemia 9:5

Un i Levitarja, o Jeshua, un o Kadmijel, un o Bani, un o Hashabneja, un o Sherebja, un o Hodija, un o Shebanja, un o Petachja penan: Stenn pre! Sharenn o baro Debles! Job hi tumaro Dewel. Sharenn les kanna un hako tsireske! Baro Dewel, hakeno te sharell tiro railo lab! Kek wawar lab hi jaake baro un railo har tiro lab.

Debleskri gili 102:25

Me penom: Mo Dewel, le man gar krik ap o paash drom miro djipastar! Tiro djipen herell gar pre, an kek tsiro.

Debleskri gili 103:21

Sharenn o baro Debles, tumer leskre bolepangre lurde, kai budrenn leske un krenn, hoi job kamell!

Debleskri gili 115:15

Mu well ap tumende i bacht kolestar, kai o bolepen un i phub kras.

Debleskri gili 124:8

Kowa hi o baro Dewel, kai las men win, job, kai o bolepen un i phub kras.

Debleskri gili 146:6

Job hi o Dewel, kai o bolepen un i phub kras, un o baro pani, un kowa, hoi dren hi. Job hi kowa, kai hako tsiro peskro lab rikrell,

Debleskri gili 24:10

Koon hi kau baro rai, kones o tselo railepen hi? Kowa hi o baro Dewel, ko rai pral o bolepen un i phub. Job hi o baro rai, kones o tselo railepen hi.

Debleskri gili 33:6

Dran o lab o baro Deblestar was o bolepen kerdo. Dran o ducho, hoi dran leskro mui djas, wan i tsele bolepangre momlia kerdo.

Debleskri gili 36:6

Baro Dewel, tiro latchepen hi jaake baro har o bolepen. Un tiro kamlepen ap tire menshende djal bis pash i wolke.

Debleskri gili 86:10

Tu hal baro un kreh baro koowa, hoi kek wawar nai krella. Tu kokres hal o Dewel.

Jesaja 37:16

“Baro Dewel, tu rai pral o bolepen un i phub, tu hal o Israeleskro Dewel, un hal pral i bolepangre beshdo. Tu kokres hal o Dewel pral i tsele themma ap kai phub. Tu kral o bolepen un i phub.

Jesaja 37:20

Kanna, maro baro Dewel, le men win dran o wast o baro rajestar pral o them Assur, te nai dikenn un haiwenn i menshe an i tsele themma ap kai phub, kai tu, baro Dewel, kokres o Dewel hal.”

Jesaja 43:10

O baro Dewel penell: Mire menshe, tumer han kolla, kai djinenn, hoi me krom; un tumer han kolla, kai mange wi-rodom, te wenn mange koi. Kanna djinenn tumer un patsenn un haiwenn, te hom me o tchatcho Dewel. Glan mande was kek wawar dewel, un pal mande well witar kek wawar dewel.

Jesaja 44:6

O baro Dewel, ko rai pral o Israel, kai ginas les win dran i tchilatche wasta, – job, kai hi o rai pral o bolepen un i phub, penell: Me hom o glanstuno un me hom o palstuno, un dell kek wawar debles har man kokres.

Jesaja 44:8

Ma darenn, mire menshe! Ma trashenn! Mukom me kowa tumen gar te shunell un penom les tumenge gar glan i rah tsiro? Un tumer shunan un dikan les. Dell i wawar debles har man kokres? Dell i wawar sorelo debles, koles gar prindjrau?

Jesaja 45:12

Me hom kowa, kai kras i phub, un ko menshes, kai ap late hi, ninna. Mire wastentsa krom o bolepen buchles, un kol tsele momlia ap leste penom me, kai le wenn.

Jeremia 32:17

Baro Dewel, miro rai, tu kral o bolepen un i phub dran tiri bari soor un tiro sorelo wasteha. Un tchi hi koi, hoi nai kreh gar.

Ezekiel 20:11

Un kote penom lenge, hoi lendar kamau, har te djiwenn le pal miro tchatchepen. Miro tchatchepen hi kowa, koleha i mensho djido atchell, te rikrell lo pes ap leste.

Jona 1:9

Un job penas ap lende: “Me hom i Hebreari un mangau o baro Debles an, ko Dewel pral o bolepen, kowa kai kras o baro pani un ninna o them.”

Johanni 10:30

Me un o dad ham jek.”

Bičepangre 4:24

Har i patsle kowa shunan, mangan jon khetne o Debles an, un penan: “Rai, tu kral o bolepen un i phub, un o baro pani, un lauter, hoi djiwella.

5. Mose 10:14

O baro Debleske hi o bolepen, lauter hoi an o pralstunepen hi. Un ninna i phub un lauter hoi dren hi, hi leskro.

5. Mose 32:39

Dikenn kanna dren, te hom me kokres o Dewel, dell kek wawar Dewel har man! Me marau un me krau djido, me dukrau un me krau sasto, un dell kek, kai jekes dran miro wast nai win lell.

5. Mose 6:4

Shun Israel! O baro Dewel hi maro Dewel, job kokres un kek wawar!

Hebrearja 1:3

O Debleskro tchawo hi railo un baro har o Dewel. Un kowa, hoi hi o Debles an o dji, hi ninna o tchawes an o dji. Dran leskro sorelo lab rikrell lo lauter khetne, hoi job kras. O Debleskro tchawo las mari doosh un maro tchilatchepen mendar, un job beshas pes ap i tchatchi rig o baro Deblestar an o bolepen.

Hebrearja 1:6

O Debleskro tchawes hi peskro dadeskro wast. Lestar penas o Dewel, har job les ap i phub bitchras: I tsele Debleskre bolepangre hunte witsrenn pen glan leste tele, te sharenn le les.

Debleskro tsiro 14:7

Un job das bari gole: “Darenn o Deblestar un sharenn les! Ko tsiro hi kanna kai, kai job o tchatchepen pral i tsele menshende wi-rakrella. Witsrenn tumen tele glan koleste, kai kras o bolepen un i phub, un o baro pani, un mangenn les an!”

Debleskro tsiro 4:11

“Tu, o Dewel, maro rai, tu hal moldo, te less o railepen, un o sharepen, un i soor. Tu kral o bolepen un i phub. Jaake, har tu kamal, jaake kral tu kowa, un was kowa.”