Nehemia 8:1 - O Debleskro Drom 2021 (Sinte)

¹ Un har o eftato tchon was, un i Israelitarja pale an pengre forja his, wan i tsele menshe khetne har jek mursh ap i platsa glan o Panjeskro Wudar. Un jon penan ap o Esra, te anell job o Moseskro liil, kai dren tardo hi, hoi o baro Dewel penas, hoi i Israelitarja hunte krenn un rikrenn. O Esra his i sikepaskro, kai prindjras mishto o Debleskro lab.

O Debleskro Lab 2024 (Sinte-Manouche)

¹ Oun har o eftato čon vas, oun i Israelitarya pale an pengre forya his, van i tsele menshe khetne har yek morsh ap i platsa glan o Panyeskro Voudar. Oun yon penan ap o Esra, te anell yob o Moseskro liil, kay dren tardo hi, hoy o baro Devel penas, hoy i Israelitarya hounte krenn oun rikrenn. O Esra his i sikepaskro, kay prindjras mishto o Debleskro lab.

Nehemia 8:1 Iomraidhean Croise

2. Rajengro liil 23:2

Un job djas pral an o baro Debleskro kheer. Un khetne leha djan i tsele mursha dran o them Juda un i tsele menshe, kai djiwan an o foro Jerusalem, i rashaja un o Debleskre rakepangre un kol wawar menshe, tikne un bare. Un kote mukas lo glan lende i tsele laba te drawerell dran ko liil, hoi an o baro Debleskro kheer hatslo was, kai tchinlo hi, hoi o Dewel peskre menshendar kamella.

2. Familjakro liil 34:15

Un o Hilkija penas ap o tchinepaskro, o Shafan: “Me hatsom i liil an o baro Debleskro kheer, kai menge o Debleskro drom siklo wella.” Un o Hilkija das ko liil o Shafaneste.

2. Familjakro liil 34:30

Un job djas pral an o baro Debleskro kheer. Un khetne leha djan i tsele mursha dran o them Juda, un i menshe, kai djiwan an o foro Jerusalem, i rashaja, i Levitarja un i tsele wawar menshe, bare un tikne. Un kote mukas lo glan lende i tsele laba te drawerell dran ko liil, hoi an o baro Debleskro kheer hatslo was, kai tchinlo hi, hoi o Dewel peskre menshendar kamella.

Esra 7:1

Pal kau koowa, an ko tsiro, kai o Artaxerxes o baro rai pral o them Persia his, djiwas an o them Babilonia i biboldo, koleskro lab Esra his. Leskro dad his o Seraja, koleskro dad o Asarja, koleskro dad o Hilkija,

Esra 7:10

O Esra tchiwas peskre djijeskre jaka ap o Debleskro drom, te haiwell lo les bud un budeder, un te djiwell lo pal o Debleskro lab, un te sikrell lo halauterenge an o them Israel, hoi o baro Dewel lendar kamell, un har nai djiwenn le pal leskro tchatchepen.

Esra 7:11

Un o rai Artaxerxes mukas i liil te tchinell, te dell lo les o rashajeste, o Esra. Kowa his i sikepaskro un prindjras mishto o Debleskre laba un djinas, hoi o baro Dewel peskre menshendar, o Israel, kamell. An ko liil his kal laba tardo:

Esra 7:6

Kau mursh Esra djas win dran o them Babilonia, te djal lo an o foro Jerusalem. Job his i sikepaskro, un djinas kol laba mishto, hoi an o Moseskre lila tchinlo hi. Kol laba das o baro Dewel peskre menshende Israel. Un har o Esra gomme an Babilonia his, rikras o baro Dewel peskre wasta pral leste, un kras, te das o baro rai o Esraes halauter, hoi job lestar mangas.

Nehemia 12:26

Jon djiwan an ko tsiro, kai o Jojakim rashai his, koleskro dad o Jeshua his, koleskro dad o Jozadak his. An ko tsiro djiwas ninna o Nehemia, kai o themeskro rai his, un o Esra, ko rashai un sikepaskro, kai o Debleskre laba mishto djinas.

Nehemia 12:37

Un jon djan pash ko wudar, hoi Djido Panjeskro Wudar kharell; un dureder pre an o Davideskro foro, kote, kai djal i massuri bis pral o Davideskro kheer, un dureder bis pash o Panjeskro Wudar. Kowa hi ap koi rig o forestar, kai o kham pre djala.

Nehemia 3:26

bis wergel o Panjeskro Wudar ap koi rig, kai o kham pre djal, un ko turmo, hoi pash o Debleskro kheer glan tardo hi. Kowa his gar dur fun koi platsa Ofel, kai kol budepangre djiwan, kai an o Debleskro kheer budran.

Nehemia 8:16

Kote djan i menshe win un anan kashta i patjentsa un kran penge patjengre khera. Un hakeno kras peske sau kheer, kol jek pral ap pengre khera, kol wawar pal pengre khera, ninna ap koi platsa glan o Debleskro kheer un ap i platse pash o Panjeskro Wudar un pash o Efrajimeskro Wudar.

Nehemia 8:3

Un sik taissarlakro bis mashkral o diwes draweras job dran ko liil glan, kote ap koi platsa glan ko Panjeskro Wudar. Un hakeno das jak ap kowa, hoi an ko liil dren tardo his.

Jesaja 8:20

Rikrenn tumen ap o Debleskro drom, un ap kowa, hoi job tumende sikrell! Te penenn i menshe tumenge wawar koowa, palle well lenge kek momeli ap lengro drom.

3. Mose 9:5

Jon anan kowa, hoi o Mose penas, glan o wudar o baro Debleskro plachteno kherestar. Un i tsele Israelitarja wan kote khetne glan o baro Debleste.

Mateo 13:52

“Tumer dikenn,” penas lo, “hako tchatchepaskro, koon djinell o phuro biboldengro tchatchepen, un ap mande patslo was, kowa haiwell kanna o newo un o phuro koowa pral o Debleste, un nai penell kowa i menshenge.”

Mateo 23:13

Tumer tchatchepangre un Farisarja! Kowa, hoi tumer krenna, ko hi gar mishto. Tumaro patsepen ap o Debleste hi chochepen! Tumer krenn o wudar pandlo, te well kek ap o Debleskro drom. Tumer djan gar koi dren. Witar gar mukenn i wawaren dren te djal.

Mateo 23:2

un penas: I biboldengre tchatchepangre un i Farisarja, kolen hi o Moseskro wast, te penenn le i menshenge o Debleskro lab.

Mateo 23:34

Shunenn, bitchrau pash tumende mire rakepangren, mire gosewe murshen, un mire tchatchepangren. Kolen denn tumer ap o trushel, marenn len, un denn len dawa an tumare kangria. Un tumer lenn len palla an hako foro.

Čačepangre 20:1

Un i tsele murshenge dran Israel his mishto, te wenn le khetne glan o baro Debleste an o foro Mizpa. Jon wan dran o tselo them, hake rigjendar kotar pral, kai i menshe Dan djiwenna bis tele pash o foro Beersheba, un koi pashel dran o tselo them Gilead.

Čačepangre 20:8

Kote hadan pen kol tsele mursha, un his jek dji un jek djipen, un penan har dran jek mui: “Kek mendar te djal pale an peskro plachteno kheer,