Micha 7:9 - O Debleskro Drom 2021 (Sinte)

⁹ Djinau, me mukom o baro Debleskro drom. Doleske was leskri choli ap mande. Me hidjrau lat, bis te lell job miro koowa an leskro wast, un dell man miro tchatchepen. Job sikrell man peskri momeli, te dikap, har latcho job ap mande hi.

O Debleskro Lab 2024 (Sinte-Manouche)

⁹ Djinau, me moukom o baro Debleskro drom. Doleske vas leskri rholi ap mande. Me hidjrau lat, bis te lell yob miro koova an leskro vast, oun dell man miro čačepen. Yob sikrell man peskri momeli, te dikap, har lačo yob ap mande hi.

Micha 7:9 Iomraidhean Croise

2. Samuel 24:17

Har o David kol bolepaskres dikas, kai marell kol menshen, penas job ap o baro Debleste: “Shun, kowa hom me, kai anom doosh ap mande. Me krom i tchilatcho koowa. Kol menshe kate kran kek tchilatcho koowa. Jon hi har bakre, ap kolende kek doosh hi. Mangau tut, muk koi phagi ap mande un miro dadeskro kheer te well!”

Hiob 23:10

Job djinell hawo drom me djau. Dikals lo palla, har djiwau, hatsals lo win, te hom djudjo har sonakai.

Hiob 35:14

Tu Hiob peneh, tu nai dikeh les gar! Tiro koowa hi glan leste tchiddo. Muk gar tele, te dikess ap leste!

Debleskri gili 119:154

Le tu miro koowa an tiro wast, un le man win dran i tchilatche wasta! De man pale newi soor jaake har tu mange penal!

Debleskri gili 37:6

Un job mukell tiro tchatchepen pre te djal har o kham, un mukell tiro tchatchepen diklo te well har o kham mashkral o diwes.

Debleskri gili 43:1

Miro Dewel, kre te lap miro tchatchepen! Le miro koowa an tiro wast, un rake mange latches pash kol menshende, kai kamenn tchi tutar te djinell! Le man win dran o wast i chochenendar un tchilatchendar!

Debleskri gili 7:6

palle mu lenn man palla kolla, kai hi chojede ap mande! Mu taprenn le man, un witsrenn man ap i phub, un mukenn le man an i tchik tchiddo!

Debleskri gili 94:15

I tchatchepangre mursha djan pale pal o tchatchepen. Un lauter, kai o tchatcho drom djan, rikrenn pen ap kowa.

Jesaja 42:16

Mire menshen, kai hi har korele, sikrau i drom, kolestar jon tchi djinenn. Un anau len ap dromma, kolendar jon tchi shunan. Jon djiwenn har an kali rat, un me lau o tamlepen glan lende krik. Un kol barra, hoi ap lengro drom tchiddo hi, lau krik. Kawa krau lenge, un mukau len gar.

Jesaja 42:7

Tu kress i korelenge i jaka pre, un less i pandlen win dran o stilepen, kai hi le beshdo an i kali rat.

Jesaja 46:13

Me anau tumenge miro tchatchepen. Kowa hi gar dur tumendar krik. Sik lau tumen dran i bibacht win. An o foro Zion krau i menshen bachteles. un i Israelende sikrau miro railepen.

Jesaja 51:22

Kawa penell o baro Dewel, kai tiro rai un tiro Dewel hi, kowa, kai lell o koowa leskre menshendar an peskro wast: Dik, me lau ko khoro, hoi tut mates kras, dran tiro wast win. Tu hunte pijess buder gar dran o khoro, hoi pherdi miri choli his.

Jesaja 56:1

Kawa penell o baro Dewel: Djiwenn pal mire tchatchepaskre laba, un krenn, hoi tchatcho hi! Sik well ko diwes, kai lau tumen dran o tchilatchepen win, un tchiwau tumen an o tchatchepen.

Jeremia 10:19

Ach, har dukell man miro dji! Miro dukepen kamell gar sasto te well. Patsom, kowa hi har i nasslepen un me rikrap kowa win.

Jeremia 14:7

Baro Dewel, mari doosh hi glan mare jaka tardo. Bud kope djam tutar krik, un shunam gar ap tute. Ab pale ap mari rig, te dikell hakeno, har kamlo hal!

Jeremia 51:10

[I Israelitarja penenn:] O baro Dewel sikras, kai ham an o tchatchepen tardo. Awenn, te djas ap i berga Zion, te penas, hoi maro baro Dewel latcho koowa kras.

Ropaskre gilja 1:18

O baro Debles his tchatcho, har das lo man i phagi. Me shunom gar ap leskro lab. Shunenn, tumer menshe an wawar themma, un dikenn, har baro miri duk hi! Mire terne tcha un terne tchawe wan pandles krik lino.

3. Mose 26:41

Doleske sikrom lenge o dumo, un tradom len an o them kolendar, kai kuran pen lentsa. Kote krenn le pen tiknes glan mande. Te hidjran le pengri phagi tele,

Maleachi 3:18

Palle dikenn tumer pale, kai djal gar emliges kolenge, kai an o tchatchepen tardo hi un kolenge, kai krenn o tchilatchepen. Djal wawartchandes koleske, kai mangell o Debles an, har koleske, kai mangell les gar an.

1. Korintarja 4:5

Dran kowa penau, ma penenn jekestar: Kowa krell peskri budi gar mishto. Kanna hi gar o tchatcho tsiro, te rakrenn jaake. Ap ko diwes, kai well maro rai Jesus pale, sikrell lo halauteren, hoi kanna khatedo hi. Un lauter, hoi an o dji dren hi, well palle diklo. Un palle well hakeno sharedo o Deblestar pal koi budi, hoi job kras.

2. Timoteo 4:8

Kowa, hoi kanna glan mande hi, hi ko shukar koowa, hoi kolla lenna, kai kran, hoi o Dewel kamella. Un kowa dell man maro rai Jesus. Job hi ko tchatchepaskro rai, kai djal pal o tchatchepen. Ko shukar koowa dell lo man ap ko diwes, kai job o tchatchepen wi-rakrell pral i tsele menshende. Ko shukar koowa dell job gar mande kokres. Job dell kowa lauterende, kai dikenn o tselo djijestar ap ko diwes, kai well lo pale.

Debleskro tsiro 18:20

Awenn bachtelo, tumer, kai djiwenn an o bolepen! O baro foro hi paash! Awenn bachtelo, tumer Debleskre menshe! Awenn bachtelo tumer, kai han o Jesuseskre bitchepangre, ninna tumer, kai han o Debleskre rakepangre! Kowa, hoi o foro tchilatches kras ap tumende, das o Dewel ko fores pale.

1. Samuel 24:15

Kones leh tu, o baro rai pral o Israel, palla? Koneske tradeh tu palla? Man, kai hom har i mulo djuklo, tchi wawar har jek pushum!

1. Samuel 25:39

Un har o David shunas, te meras o Nabal, penas lo: “Sharedo well o baro Dewel, kai i ladj, hoi o Nabal ap mande anas, ap leste pale anas. Un man, peskro budepaskres, rikras lo pale, te krap i tchilatcho koowa. Un ko tchilatcho koowa, hoi o Nabal kras, mukas o baro Dewel ap leskro shero pale te perell.” Un o David bitchras murshen pash i Abigajil, un mukas lake te penell, te kamell lo lat te romedinerell.

1. Samuel 26:10

Palle penas lo: “Me dau man sowel pash o djido Debleste: Job kokres marell les, nai well ap leskro tsiro, kai hunte merell lo, nai well an o marepen.

1. Samuel 3:18

Kote penas o Samuel leske lauter un rikras tchi pale. Koi penas o Eli: “Job hi o baro Dewel un job krell jaake har latcho hi.”