Mateo 5:3 - O Debleskro Drom 2021 (Sinte)

³ Bachtele hi kolla, kai djinenna, kai hi le tchorwelo glan o Debleste. Jon djiwenna o Debleha khetne an o bolepen un lenn leskro brawlepen.

O Debleskro Lab 2024 (Sinte-Manouche)

³ Barhtele hi kolla, kay djinenna, kay hi le čorvelo glan o Debleste. Yon djivenna o Debleha khetne an o bolepen oun lenn leskro bravlepen.

Mateo 5:3 Iomraidhean Croise

2. Familjakro liil 33:12

Har lo an bari daar his, mangas lo o ropah o baro Debles, kai leskro Dewel un o Dewel leskre phurendar his, un penas leske, har bud les leskri doosh khaitas.

2. Familjakro liil 33:19

An o liil, hoi i dikepangre tchinan, hi tchinlo, har o Manasse o baro Debles mangas, un har kowa les shunas, ninna leskri tseli doosh, un har lo o baro Debles mukas, un kai lo mulne platse kras, un chochene deblen pre tchiwas, ninna koi figura, hoi i Ashera sikras, – kowa lauter, hoi lo kras, glan te dikas lo peskri doosh dren glan o baro Debleste.

2. Familjakro liil 33:23

Un job sikras gar o baro Debleste, kai les khaitas, hoi job kras, har leskro dad o Manasse kras. Na-a, job las gomme budeder doosh ap peste.

2. Familjakro liil 34:27

Un kral tiro dji lenge pre. Un kral tut tiknes glan o baro Debleste, har tu shunal, hoi me penom pral kau foro un kol menshende, kai kate djiwenna, un kral tire koola paash, kai ap tute his, un rowal glan mande. Doleske shunom me tut ninna’, penell o baro Dewel.

2. Familjakro liil 7:14

un mire menshe, kai miro labeha kharedo wenn, dikenn palle dren, hoi le kran, un mangenn man, un rodenn man un djan pengre tchilatche dromma tele, palle shunau an o bolepen lengri gole, un lau lengri doosh krik un krau lengro them sasto.

Hiob 42:6

Doleske lau pale, hoi rakrom un hom beshdo an i tchik un an i jagakri tchik, te sikrap, kai khaitell man kowa, hoi rakrom.

Debleskri gili 1:1

Bachtelo hi kowa, kai shunell gar ap kowa, hoi i tchilatche penenna, Bachtelo hi kowa, kai djal gar kolentsa, kai mukan o Debleskro drom. Bachtelo hi kowa, kai beshell gar pash kolende, kai sanenn pral o Debleste.

Debleskri gili 112:1

Sharedo well o baro Dewel! Bachtelo hi kowa, kai djiwell o baro Debleha, un rikrell pes o tselo djijestar ap leskre laba.

Debleskri gili 128:1

I gili te giwell ap o drom an Jerusalem. Bachtelo hi hakeno, kai djiwell o baro Debleha, un djal ap leskro drom.

Debleskri gili 146:5

Bachtelo hi kowa, koleske o Jakobeskro Dewel ap i rig well, awa, kowa hi bachtelo, kai kokres ap peskro baro Debleste dikell.

Debleskri gili 2:12

Tchumrenn o tchawes, te well lo gar chojedo ap tumende, un tumer ap o drom merenna. Leskri choli nai chatchella sik. Bachtele hi kolla lauter, kai khatrenn pen pash leste.

Debleskri gili 34:18

Te denn kolla ap leste gole, kai rikrenn ap leste, palle shunell len o baro Dewel, un lell len win dran lengri tseli bibacht.

Debleskri gili 41:1

I gili o rajeske pral i gipangre. O David kras kai gili.

Debleskri gili 51:17

Baro Dewel, kre miro mui pre, te rakrap, hoi sharell tut!

Debleskri gili 84:12

Maro baro Dewel hi o kham maro djipaske. Job rikrell peskre wasta pral mende. O baro Dewel dell men latchepen un railepen. Kolen, kai o djijestar ap leste shunenna, dell lo hako latchepen, hoi len hunte wella.

Gosewe laba 16:19

Hi feteder te weh gar an-diklo un djiweh i tchorwelentsa, har te wess jek kolendar, kolen i baro mui hi, un djiweh fun lengro tchoredo koowa.

Gosewe laba 29:23

O pre-phurdepen i menshestar krell, te perell lo. Kowa, kai hadell pes gar, well an-diklo.

Gosewe laba 8:32

Doleske, mire tchawe, shunenn ap mande! Bachtele hi kolla, kai ap miro drom djana!

Jesaja 30:18

Doleske dikell o baro Dewel ap ko diwes, kai nai well lo tumenge pale latches, un te nai krell lo peskro dji tumenge pre. O baro Dewel hi i Dewel, kai hako tsiro o tchatchepen krell. Bachtelo hi hakeno, kai ap leste dikell.

Jesaja 57:15

Me, o pralstuno, kai hadedo hom, un hako tsiro djiwau, un kokres o tchatcho Dewel hom, penau: Me djiwau an o pralstunepen an miro bolepaskro kheer, un ninna pash o mensheste, kai i phagedo un tele-rikedo dji an leste hi, te dap pale soor koleste, kai tele rikedo hi, un mukap koles pre te djiwell, koleskro dji phagedo hi.

Jesaja 61:1

O baro Debleskro ducho hi ap mande. O baro Dewel rodas man win un bitchras man, te penap i tchorwelenge o latcho lab. te krap i phagede djia sasto, te penap i pandlen, te hi le buder gar pandlo, un penap i stilden, te nai djan le win dran o stilepen.

Jesaja 66:2

Me, o baro Dewel, krom miro wasteha kowa lauter, hoi koi hi. Un me dikau kamles ap koleste, kai hi tele rikedo un phagedo an peskro dji, un kai darell glan miro lab.

Micha 6:8

Na-a, o baro Dewel penas menge, hoi latcho hi, un hoi lo mendar kamella: Kowa hi: Rike tut ap o tchatchepen, ab latches ap o wawareste, un dja o tselo djijestar tiro Debleha!

Mateo 11:25

Un ap kau tsiro penas o Jesus: Tata, tu hal o rai pral o bolepen un i phub. Me sharau tut. Kowa, hoi tu kreh, sikral tu kolende, kai gar bud djinenna. Kolla, kai gosewo hi un bud djinenna, kolla haiwenn kowa gar.

Mateo 11:6

Un bachtelo hi kowa, kai choirell pes gar pral mande!”

Mateo 13:16

Bachtele han tumer, kai dikenna un shunenna, hoi me tumenge penau un sikrau.

Mateo 19:14

Koi penas o Jesus ap lende: “Mukenn kol tchawen pash mande te well! Ma rikrenn len pale! Sawe har jon, kolen das o Dewel gole, te djiwenn le khetne leha an o bolepen.”

Mateo 24:46

Bachtelo hi lo, te well leskro rai pale, un dikell, kai job peskri budi mishto kras.

Mateo 25:34

Un palle penell o baro rai ap kolende, kai ap leskri tchatchi rig tardo hi: Ap tumende well i bacht miro dadestar an o bolepen. Awenn un djiwenn mantsa khetne an miri harmenatsjona. Kowa kamas o Dewel jaake rah har o bolepen un i phub koi hi.

Mateo 3:2

Un job penas i menshenge: “Mukenn tumaro tchilatcho drom, un djan ap o Debleskro drom! O tsiro well sik, kai lell o Dewel i menshen dran o tchilatchepen win.”

Mateo 8:11

Bud menshe wenna dran bud wawar themma pash o Debleste an o bolepen, un beshenn pen tele, te chan le o Abrahameha un o Isaakeha, un o Jakobeha khetne.

Markus 10:14

Har o Jesus kowa dikas, was lo chojedo, un penas ap lende: “Mukenn kol tchawen pash mande te well! Ma rikrenn len pale! Sawe har jon, kolen das o Dewel gole, te djiwenn le khetne leha an o bolepen.

Louka 11:28

Koi penas lo: “Bachtele hi kolla, kai ap o Debleskro lab shunenna, un kowa ninna krenna, hoi o Dewel penella.”

Louka 18:14

Un o Jesus penas: “Me penau tumenge: O Dewel dikas ap kaleste, un his leske latcho un gar ko wawareske. Kowa, kai pes bares krella, koles sharell o Dewel gar. Un kowa, kai pes gar bares krella, koles krell o Dewel bares.”

Louka 22:29

Un me kamau, te wenn tumer mantsa khetne raja, jaake har miro dad an o bolepen kamella, te wap o baro rai pral i menshende.

Louka 22:30

Un tumer chana un pijenna mantsa kote, kai me o baro rai hom, un han beshdo ap rajeskre beshepangre, un penenn o tchatchepen win pral i tsele menshende, kai wenna o deesh-te-dui Israeleskre tchawendar.”

Louka 4:18

O Debleskro Ducho hi ap mande. Job rodas man win, te penap i tchorwelenge o Debleskro latcho lab. Un job bitchras man, te penap kolenge, hoi stilde hi, te wenn le dran lengro stilepen win, un kolenge, kai korelo hi, te dikenn le pale, un kolenge, kai pale-tchiddo hi, te wenn le pale erligo,

Johanni 20:29

“Kanna, kai dikal man, patseh tu,” penas o Jesus. “Bachtele hi kolla, kai patsenna, ninna te dikenn le man gar.”

5. Mose 8:2

Ma bistrenn, har djas tumaro baro Dewel glan tumende an kol 40 (star-deesh) bersha, har djan an o mulo tato them trujel. Kote sikras lo tumen: Te hi lo gar tumentsa, nai krenn tchi. Ninna kamas lo win te hatsell, hoi an tumare djia hi: Shunenn tumer ap leskre laba oder gar?

Jakobo 1:10

I brawelo hunte sharell pes gar pral peskro brawlepen. Job hunte djinell, te atchell lo gar. Har i bluma an o senlepen merell lo.

Jakobo 1:12

Bachtelo hi kowa, koon mukell gar peskro patsepen, ninna te well i pharo koowa ap leste. Job hi moldo, te lell lo ko djipen, hoi gar pre-herella. Kawa djipen dell o Dewel kolen, kai les kamenna.

Jakobo 2:5

Shunenn, mire kamle phrala! O Dewel rodas kolen win, kai hi tchorwelo ap kai phub, te wenn le brawelo an o patsepen. Ko tsiro wella, kai djiwenn le leha khetne an o bolepen un lenn leskro brawlepen. Kowa lenna kolla, kai kamenn les o djijestar. Jaake penas les o Dewel.

Debleskro tsiro 19:9

Un o bolepaskro penas ap mande: “Tchin an ko liil: Bachtele hi kolla, kai kharedo wan, te wenn le ap o terno bakreskro bijab. Kal laba hi tchatchepah o Debleskre laba,” penas lo ap mande.

Debleskro tsiro 22:14

Bachtele hi kolla, kai pengre ripja djudjes thowenna. Jon nai chan ko rukestar, hoi o djipen della, un nai djan an kol bare wudja an ko foro dren.

Debleskro tsiro 3:17

Tumer penenna: Mer ham brawelo, un men hi halauter; tchi hunte well men buder. Me penau tumenge: Tumer djinenn gar, te han an i bibacht, jaake te khaitenn tumer man. Tumer han tchorwelo un nango un korelo.