Josua 6:5 - O Debleskro Drom 2021 (Sinte)

⁵ Te shunenn i lurde, har i rashaja lengsto an pengre phurdepangre phurdenn, hunte denn le halauter i bari kurepaskri gole. Palle perenn i pre-tchidde barra trul o foro an pende khetne. Un i tsele lurde nai djan haki rigjatar an o foro dren.”

O Debleskro Lab 2024 (Sinte-Manouche)

⁵ Te shounenn i lourde, har i rashaya lengsto an pengre phourdepangre phourdenn, hounte denn le halauter i bari kourepaskri gole. Palle perenn i pre-čidde barra troul o foro an pende khetne. Oun i tsele lourde nay djan haki rigyatar an o foro dren.”

Josua 6:5 Iomraidhean Croise

2. Mose 19:19

Un koi phurdepaskri das sorleder un sorleder gole. Un o Mose rakras o Debleha. Un o Dewel rakras pale ap leste jaake soreles, har o bolepen gole della.

Jesaja 25:12

Un kol sorele bare khera an o them Moab phagell o Dewel tele, un dell len khetne, te perenn le tele an i tchik.

Jesaja 30:25

Un an ko tsiro, kai o baro marepen hi, un i sorele khera khetne phagenn, nashenn panja, tikne un bare, o pralstuno themestar un ap haki berga tele.

Jeremia 50:15

Denn i kurepaskri gole haki rigjatar! Dikenn, o foro dell pre! Leskre turme phagenn khetne. Leskre massurja hi tele phagedo. O baro Dewel dell o foro Babilon peskri phagi. Denn o foreske halauter pale pale, hoi kau foro ninna kras!

Hebrearja 11:30

I Israelitarja patsan ninna kowa, hoi o Dewel lenge penas, har his le glan o foro Jericho tardo. Un jon djan efta kope trul o foro. Palle peran i tsele barra khetne, hoi trul o foro pre-tchiddo his.

Josua 6:16

Un har le o eftato kopo trujel djan, un i rashaja an i phurdepangre phurdan, koi penas o Josua i murshenge: “Kanna denn i kurepaskri gole! O baro Dewel das tumen kau foro.

Josua 6:20

Koi phurdan i rashaja an i phurdepangre. Un har i mursha i phurdepangre shunan, dan le i kurepaskri gole. Koi peran i pre-tchidde barra trul o foro an pende khetne. Un i tsele lurde djan haki rigjatar pre an o foro. Jaake lan le o foro dren.

Josua 6:4

Un efta rashaja hunte hidjrenn efta phurdepangre un djan glan o mochton, kai o Debleskre deesh laba dren hi. Ap o eftato diwes djan tumer efta kope trul o foro trujel. Un i rashaja phurdenn koi pashel an pengre phurdepangre.

Josua 6:6

Un o Josua, koleskro dad o Nun his, das i rashajen pash peste gole, un penas ap lende: “Anenn o mochton, kai o Debleskre deesh laba dren hi! Un efta tumendar hidjrenn hakeno jek phurdepaskri un djan glan ko mochton.”

Čačepangre 20:37

Un kolla kai khatedo his, wan dran pengro khatepen win un nashan sik pash o foro Gibea, un lan ko fores dren, un dan halauteren, kai an o foro his, pengre charentsa mulo.

1. Samuel 17:20

Kote stas o David sik taissarlakro pre, un mukas i wawares ap i bakre jak te dell. Un las ko tselo chapen peha, un djas koi, jaake har o Isai leske penas. Un was pash koi lurdengri platsa ap ko tsiro, har i tsele lurde win djan hakeno ap peskri platsa o marepaske. Un jon dan i bari kurepaskri gole.

1. Samuel 17:52

Un i tsele lurde dran Israel un dran Juda djan glan, dan i bari kurepaskri gole, un lan kol Filistarja palla jaake dur, bis te wan le pash o foro Gat un glan i bare wudja o forestar Ekron. Un i mule Filistarja his tchiddo ap o drom mank Shaarajim un Gat un Ekron.

1. Samuel 4:5

Un har ko mochton ap i platsa was, stan i tsele Israelitarja, un dan jaake bari gole i bachtjatar, te djas i phub tel lengre herja.