Joel 2:23 - O Debleskro Drom 2021 (Sinte)

²³ Un tumer menshe dran o foro Zion, awenn bachtelo, un giwenn pral kowa, hoi kras o baro Dewel. Job hi tumaro Dewel, un dell tumen doha brishin ap o tchatcho tsiro, har lo kras glan kowa,

O Debleskro Lab 2024 (Sinte-Manouche)

²³ Oun t'mer menshe dran o foro Sion, avenn barhtelo, oun givenn pral kova, hoy kras o baro Devel. Yob hi t'maro Devel, oun dell t'men doha brishin ap o čačo tsiro, har lo kras glan kova,

Joel 2:23 Iomraidhean Croise

1. Rajengro liil 8:36

palle shun tu an o bolepen, un le ko tselo tchilatchepen krik, hoi jon un lengre raja kran. Sike lenge tiro latcho drom, te nai nashenn le ap leste! Un palle de len pale o brishin ap ko them, hoi tu lenge dal, te well lo lengro.

Hiob 33:23

Te well palle i bolepaskres pash leste, kowa ap leskri rig hi, jek kol serjendar, kolen o Dewel win bitchrell, te penenn le menge, hoi menge mishto hi,

Hiob 37:13

Nai well, te bitchrell lo o brishin, te dell lo o themes i phagi, ninna nai well, te bitchrell lo les, te sikrell lo peskro latchepen.

Debleskri gili 104:34

Mu well miri gili leske shukar! Me hom bachtelo pral miro baro Debleste.

Debleskri gili 147:8

Job tchiwell wolke ap o bolepen, dell brishin ap i phub, mukell o senlepen bares te well ap i berge.

Debleskri gili 149:2

Tu Israel, tiro dji mu bashrell pral koleste, kai kras tut. Tumer menshe dran Zion, giwenn i bachtjatar pral tumaro baro rajeste.

Debleskri gili 28:7

O baro Dewel hi miri soor, un rikras peskro wast pral mande. Ap leste patsau miro tselo djijeha. Un job was ap miri rig. Kanna stell miro dji, un hi bachteles, un me kamau les sharell un leske giwell.

Debleskri gili 32:11

Tumer, kai an o tchatchepen tardo han, awenn bachtelo pral tumaro baro Debleste! Mukenn tumare djia san un bashrenn! Denn gole i bachtjatar, tumer lauter, kai shunenn o tselo djijeha ap o Debleste.

Debleskri gili 84:6

Bachteles hi kol menshe, kolengri soor an tute hi, un kai o djijestar pash tiro kheer djan.

Gosewe laba 16:15

Te dikell o baro rai latches ap jekeste, nai djiwell kowa pre. Un leskro kamlepen hi har i brishin, hoi mukell o djob bares te well.

Jesaja 30:21

Te kamenn ap i tchatchi oder ap i serwi rig leskro dromestar tele te djal, palle shunenn tumare kanda i rakepen, hoi pal tumende rakrell: Kawa hi o drom, kowa djan!

Jesaja 30:23

Palle dell o baro Dewel brishin ap o djob, hoi tu ap tiro kotar phub win witsral. Un tiri phub anell jaake bud djob win, te well tut budeder har doha maro. Un tire viechen well doha senlepen te chal ap i buchlo senelo them.

Jesaja 41:16

Tu witsreh len pre, un i ducho hidjrell len krik, un i phurdepen phurdell len kate te kote. Palle weh bachtelo pral tiro baro Debleste, un shareh tut tiro Debleha, kai o Israeleskro tchatcho Dewel hi.

Jesaja 61:10

Me hom bachtelo pral o baro Debleste, un miro dji giwell miro Debleske. Job hi trul mende har i ripen, te well kek tchilatchepen ap mende, un tchiwas tchatchepen ap mende har i plaashka, jaake har hidjrell i bijabeskro i shukar stadi, un leskri pirni shukar werklia un gustria.

Jeremia 3:3

Doleske dell kek brishin an o wend, witar gar an o nijal. Tu dikeh win har i lubni un kameh tut gar te ladjell.

Jeremia 5:24

An pengro dji penenn le gar: Mer te dikas pre ap maro baro Debleste! Job bitchrell menge o brishin an o tchatcho tsiro, brishin an o wend un brishin an i nijal, te well men o djob chapaske an ko tchatcho tsiro.

Ropaskre gilja 4:2

I terne mursha dran o foro Zion, – kutch har o latcheder sonakai his le menge – kanna hi le gar budeder moldo har pirja, hoi kerdo wan dran tchik!

Ezekiel 34:26

Un me tchiwau miri bacht ap lende un ap o tselo them, hoi trul miri berga hi. Un dau brishin an o tchatcho tsiro. Kau latcho brishin krell,

Hosea 6:3

Mer te das jak koi pre o tselo djijestar, te prindjras o baro Debles! Job wella! Kowa hi jaake tchatcho, har o kham hako diwes pre djala. Job wella, har i brishin pash mende wella, awa, har i brishin pal o wend i phub sapenes krella.

3. Mose 26:4

palle mukau me brishin te dell an ko tsiro, kai hunte well. Un o them mukell tumenge lauter bares te well, un i ruka hidjrenn pengre rukengre.

Amos 4:7

Triin tchon glan kowa kai anan tumaro djob dren, rikrom o brishin pale. Un me dom brishin ap jek foro un gar ap i wawar. O brishin peras ap jek hachetikri phub, un koi wawar phub, kai kek brishin das, meras tele.

Zakarie 10:1

Mangenn o baro Deblestar, te dell lo brishin ap o tchatcho tsiro. Kowa hi o baro Dewel, kai krell i pesse wolke, un dell tumen doha brishin halautereske, hoi ap i phub bares well.

Zakarie 10:7

Un i mursha dran o kheer Efrajim hi palle sorelo har bare kurepangre, un bachtelo har kolla, kai pijan mool. Lengre tchawe dikenn kowa un denn gole i bachtjatar. Lengro dji giwell dran kowa, hoi o baro Dewel kras.

Zakarie 9:13

Me kurau man i lurdentsa dran o grichtikro them. I menshe dran Juda hi miro kurepaskro bogo. I menshe dran Israel hi mire faile, un kol mursha dran Jerusalem hi miro charo, koleha len dau.

Zakarie 9:9

Ab bachtelo, tu foro Zion! Denn gole i bachtjatar, tumer menshe an Jerusalem! Dikenn, tumaro baro rai wella pash tumende! Job anell o tchatchepen, un well ap tumari rig. Job krell pes gar bares, un klissell ap i burika, awa, ap i terni burika.

Bičepangre 14:17

Ninna te djinans tumer tchi lestar, hunte dikans, kai o Dewel djiwella. Job kras bud latcho koowa tumenge. Job dell tumen brishino dran o bolepen, te well lauter ap i phub baro. Job dell tumende te chal, un i bacht an tumaro dji.”

5. Mose 11:14

Palle dell job o brishin ap tumaro them an peskro tsiro, an o nijal un an o wend, te nai anenn tumaro djob dren, ninna tumari mool un djet.

5. Mose 28:12

Job krell tumenge o bolepen pre un dell brishin an o tchatcho tsiro ap tumaro them, un tchiwell peskri bacht ap halauter, hoi tumer krenna. Un tumer patsenn i menshenge an bud themma. Lendar hunte patsenn tumenge tchi.

5. Mose 32:2

Kowa hoi me tumen sikrau, hi har o brishin ap o senlepen. un miro rakepen har i sapeno ducho ap o khass.

Filiparja 3:1

Mire phrala, awenn bachtelo, kai tumer ap o rajeste, o Jesuseste, patsenn! Me wau gar khino, te tchinap tumenge pale te pale ko emligo koowa, te wenn tumer soreles an o dji.

Filiparja 3:3

Mer, kai ap o Jesus Kristeste patsah, ham tchatchepah o Debleskre menshe. Ap mende hi o Debleskro Ducho. Jaake nai krah o Debleskri budi. Mer ham bachtelo pral kowa, hoi o Jesus Kristo menge kras un hunte rikras kek koowa, hoi wella i menshendar. Mer djinah, sawo koowa nai anell men gar pash o Debleste.

Filiparja 4:4

Awenn bachtelo hako tsiro! Tumari bacht well o Jesusestar, maro rajestar. Awa, awenn bachtelo!