Daniel 5:3 - O Debleskro Drom 2021 (Sinte)

³ Un kote anan le kol sonakangre un rupene khore, hoi tchoredo wan dran o Debleskro kheer an o foro Jerusalem. Un o baro rai un leskre bare mursha un leskre romja un wawar djuwja pijan dran kol khore.

O Debleskro Lab 2024 (Sinte-Manouche)

³ Oun kote anan le kol sonakangre oun roupene khore, hoy čoredo van dran o Debleskro kheer an o foro Yerusalem. Oun o baro ray oun leskre bare morsha oun leskre romya oun vavar djouvya piyan dran kol khore.

Daniel 5:3 Iomraidhean Croise

2. Familjakro liil 36:18

Un o tselo koowa dran o Debleskro kheer, bare un tikne koola, ninna ko kutch koowa dran o baro Debleskro kheer un o brawlepen o baro rajestar un kol pralstunendar an o them, halauter mukas o Nebukadnezar an o foro Babilon te anell.

Jesaja 5:14

O mulengro them bokell pal lende un kras peskro mui dur pre, un peskri meen jaake dur har djal, un chal i brawelen un kol wawaren, kai i bachtjatar gole dan un khelan.

Jeremia 50:28

I bari gole well shunlo kolendar, kai hunte nashenn penge sik, kolendar, kai wan win dran o them Babilonia. An Jerusalem ap i berga Zion penenn le, hoi maro baro Dewel ap i Babilonarja kras, te dell lo lenge pale, hoi jon leskro khereha kran.

Daniel 5:2

Un mates i moljatar penas lo, te anenn le kol sonakangre un rupene khore, hoi leskro dad Nebukadnezar dran o Debleskro kheer an o foro Jerusalem peha las. Dran kolende kamas lo te pijell khetne peskre bare murshentsa un peskre romjentsa un wawar djuwjentsa.

Daniel 5:23

Un tu hadal tut pral leste, ko bolepaskro rajeste, un penal, te anenn le i khore dran leskro kheer glan tute. Un tumer pijan mool dran lende, tu un tire bare mursha, ninna tire romja un wawar djuwja. Un tu sharal i deblen dran rup un sonakai, dran lolo saster un wawar saster, kasht un bar, kol deblen, kai gar dikenn un gar shunenn. Ko Debles, koles tiro ducho an peskro wast hi, un pash koleste tire tsele dromma hi, koles hadal tu gar.

Daniel 5:4

Koi pashel sharan le i deblen dran sonakai, rup, lolo saster, wawar saster, kasht un bar.

Hosea 2:8

Doleske tchiwau subjengre burra ap lakro drom un krau i massuri, te nai hatsell li peskro drom gar.

Habakuk 1:11

Palle djan le dureder jaake sik har i sorelo phurdepen, un nashrenn kek tsiro; dran pengri soor krenn jon pengro dewel.

Maleachi 1:12

Tumenge hom tchi moldo, te penenn tumer: ‘Koi chatchepaskri o baro Deblestar hi tchi moldo. Anas leske tchomone, hoi ninna tchi moldo hi!’

1. Tessalonikarja 5:3

Te penenn i menshe: “Lauter hi mishto, kek kurepen hi kai, un men hunte well kek daar”, palle well i bibacht pral lende, un jon nai nashenn gar krik. Koi bibacht well pral lende jaake sik, har i duka wenn pral i djuwjate, kai lell i ternepen.

Čačepangre 19:1

An ko tsiro kai kek baro rai an o Israel das, djiwas dur palla an i berge Efrajim i Levitari. Kowa his romedino un las peske i duiti djuwel koi pashel. Koja was dran Betlehem an Juda.