Bičepangre 14:15 - O Debleskro Drom 2021 (Sinte)

¹⁵ “Murshale, hoi krenn tumer kote? Mer ham menshe har tumer, un penah tumenge o latcho lab o djido Deblestar. Job kamell, te wenn tumer ap leskro drom, un mangenn buder gar kol chochene deblen dran kasht un bar an. Job hi ko Dewel, kai kras o bolepen un i phub, un o baro pani, un lauter, hoi djiwella.

O Debleskro Lab 2024 (Sinte-Manouche)

¹⁵ “Morshale, hoy krenn t'mer kote? Mer ham menshe har t'mer, oun penah t'menge o lačo lab o djido Deblestar. Yob kamell, te venn t'mer ap leskro drom, oun mangenn bouder gar kol rhorhene deblen dran kasht oun bar an. Yob hi ko Devel, kay kras o bolepen oun i phoub, oun o baro pani, oun lauter, hoy djivella.

Bičepangre 14:15 Iomraidhean Croise

1. Mose 1:1

Glan i rah rah tsiro kras o Dewel o bolepen un i phub.

1. Mose 41:16

Koi penas o Josef ap o baro rajeste: “Me nai krau kowa gar. O Dewel penella, hoi o baro rajeske mishto hi.”

1. Rajengro liil 16:13

Kowa his koi phagi koleske, hoi kran o Baasha un leskro tchawo, o Ela, har anan jon i Israelitarjen o baro Debleskro dromestar tele, te mangan le i mule deblen an. Un jaake choiran le o baro Debles, kai o Israeleskro Dewel hi.

1. Rajengro liil 16:26

Un job djas ap o tchilatcho drom, kai o Jerobeam ninna djas, koleskro dad o Nebat his. Un har o Jerobeam djas lo o baro Debleskro dromestar tele, un anas ninna i Israelitarjen o baro Debleskro dromestar tele, te mangan le wawar deblen an. Un jaake choiran le o baro Debles, kai o Israeleskro Dewel hi.

2. Rajengro liil 19:16

Baro Dewel, dik, hoi menge djala, un shun, har o Sanherib tut, o djido Debles, praassell.

2. Rajengro liil 19:4

O baro rai pral o them Assur bitchras peskro pralstunes, te praassell lo o djido Debles. Har kamoms, te shunell o baro Dewel, tiro Dewel, kol tsele laba, hoi ko mursh penas, un dell les i phagi! Mange o Deblestar kol menshenge, kai pral atchan leskre menshendar, te rikrell lo peskro wast pral lende!’”

Debleskri gili 115:15

Mu well ap tumende i bacht kolestar, kai o bolepen un i phub kras.

Debleskri gili 124:8

Kowa hi o baro Dewel, kai las men win, job, kai o bolepen un i phub kras.

Debleskri gili 31:6

Me dau man an tire wasta. Tu leh man dran i tchilatche wasta win, baro Dewel. Tu hal i Dewel, kai rikrell peskro lab.

Debleskri gili 33:6

Dran o lab o baro Deblestar was o bolepen kerdo. Dran o ducho, hoi dran leskro mui djas, wan i tsele bolepangre momlia kerdo.

2. Mose 20:11

An shob diwessa kras o baro Dewel o bolepen un i phub, o pani un halauter, hoi koi dren hi. Un o eftato diwes kras lo tchi. Doleske penas lo: Kau diwes hi i baro diwes mange. Kau diwes hi miro.

Jesaja 45:18

O baro Dewel hi o Dewel, kai o bolepen kras. Job hi o Dewel, kai i phub kras un soreles pre tchiwas. Job kras lat gar jaake, te nai djiwell tchi koi pre. Na-a, job kras lat jaake, te well djipen ap late. Job penell: Me hom o baro Dewel, un dell kek wawar Dewel har man!

Jesaja 45:20

Awenn khetne, tumer, kai nashan tumenge glan o kurepen dran bud themma! Awenn pash mande, te kras o tchatchepen win! Kolla, kai hidjrenn pengre deblen pentsa, haiwan tchi, jon mangenn deblen an, kai nai wenn lenge gar ap i rig.

Jesaja 46:7

Jon hadenn les ap pengri phik, un hidjrenn les trujel, un tchiwenn les pale pale ap leskri platsa. Un kote hi lo tardo, un djal fun kokres gar dureder. Dell jek gole ap leste, rakrell lo gar pale, krell peskro mui gar pre, un djal gar koi, te lell lo les win dran i bibacht.

Jeremia 10:8

Lauter hi jon dinelo un narwelo, kolla, kai mangenn o kasht an. Kol debla nai sikrenn lende tchi.

Jeremia 14:22

Kek dewel, koles i menshe an wawar themma an-mangenna, nai bitchrell brishin! Witar gar dell o bolepen dran peste brishin! Na-a, maro baro Dewel, tu hal kowa, kai krell sawo koowa. Doleske dikah ap tute.

Jeremia 32:17

Baro Dewel, miro rai, tu kral o bolepen un i phub dran tiri bari soor un tiro sorelo wasteha. Un tchi hi koi, hoi nai kreh gar.

Jeremia 51:15

Job, o baro Dewel, kras i phub peskri sorjah, un kras lat soreles an peskro goswepen, un kras o bolepen koi pral.

Jeremia 8:19

Dran o tselo them shunau me, har denn mire menshe gole. Kamell o baro Dewel buder gar o Dewel an Zion te well? Hi o fores Zion buder kek baro rai? Hoske kran jon man jaake chojedo [penell o baro Dewel], har mangan le pengre figuren un chochene deblen an, kai kekeske ap i rig wenna?

Daniel 6:26

Palle mukas o baro rai Darius i liil te tchinell ap i menshende dran hako them un rakepen ap i phub: Bari bacht tumenge!

Amos 2:4

O baro Dewel penell: I menshe an o them Juda kran pale te pale djungelo koowa. Miro drom un mire laba his lenge tchi moldo. Un jon kran gar, hoi lendar kamom. Jon mukan pen o tchatcho dromestar tele te anell un mangan kol chochene deblen an, kolen ninna lengre phure an-mangan. Doleske lenn le pengri phagi, un khaitenn man gar.

Jona 2:8

Har kamas miro djipen an mande tele te merell, wal tu baro Dewel mange an o shero, pash tute was miro mangepen, an tiro kheer, kai tu khere hal.

Zakarie 12:1

Kawa hi o lab, hoi penas o baro Dewel pral o Israel: Kowa penell o baro Dewel, kai kras o bolepen buchlo un tchiwas i phub soreles tardo, un das o menshes o ducho.

Mateo 16:16

Penas o Simon Petro: “Tu hal o baro rai, kolestar o Dewel penas te well job. Tu hal o tchawo o djido Deblestar.”

Johanni 5:26

An o dadeste hi o djipen. Kowa das lo ninna peskro tchaweste, te well an leste ko djipen.

Johanni 7:18

Koon pral peste mishto rakrella, kowa kamella, te well job sharedo. Koon kamella, te well kowa sharedo, kai bitchras les, kowa hi tchatcho. Un an leste hi kek tchilatchepen.

Bičepangre 10:26

O Petro hadas les pre un penas: “Ste pre! Me hom i mensho har tu.”

Bičepangre 13:32

Un mer penah tumenge: Ko lab, hoi o Dewel mare phurenge penas, was kanna tchatcho, an kau tsiro, kai mer, lengre tchawe, djiwah. O Dewel kras o Jesuses i mulendar djido. An i duiti Debleskri gili hi tchinlo: Tu hal miro tchawo. Kau diwes wom tiro dad.

Bičepangre 14:21

An ko foro penan le o latcho lab o Jesus Kristestar, un bud menshe wan patslo. Palle djan jon pale an kol forja Listra, Ikonion un Antiochia,

Bičepangre 14:7

Un jon penan i menshenge an ko them o latcho lab o Jesus Kristestar.

Bičepangre 16:30

Un job anas len win, un penas ap lende: “Tumer raja, hoi krap, te lap o Debleskro djipen?”

Bičepangre 27:10

“Murshale, te ulerah mer ap o pani dureder, dikau me, te wella bud bibacht ap mende. Gar kokres o shiffo nai djal paash un kowa, hoi koi pre hi, djal nashedo. Ninna bud mendar nai tassenn.”

Bičepangre 27:21

Har chan le i rah tsiro tchi, djas o Paulo mashkral lende, un penas: “Murshale, tumer hunte shunans ap mande, un atchans an o them Kreta. Jaake wals i tseli bibacht gar pral mende.

Bičepangre 27:25

Doleske murshale, ma trashenn! Me patsau o Debles, lauter well jaake, har job mange penas.

Bičepangre 4:24

Har i patsle kowa shunan, mangan jon khetne o Debles an, un penan: “Rai, tu kral o bolepen un i phub, un o baro pani, un lauter, hoi djiwella.

Bičepangre 7:26

O wawar diwes was job pash peskre menshende, har dui lendar tchingran. Un job das len trad, te tchingrenn le pen gar, un penas: Murshale, tumer han phrala, hoske tchingrenn?

1. Korintarja 8:4

Nai chah mer kanna ko mass, hoi anan le glan i figura, hoi mangenn le an, har te wals li i dewel? Mer djinah halauter, kai hi i figura kek tchatcho dewel. Dell jek Dewel un kek wawar.

Efesarja 4:17

Me penau tumenge soreles, hoi mange o rai Jesus penas: Ma djiwenn buder har kol menshe, kai prindjrenn o Debles gar! Kowa, hoi an lengro shero trujel djala, hi tchi moldo.

5. Mose 32:21

Jon dukan un choiran man, har mangan le kolen an, kai kek debla hi. Jaake kamau me les ninna lentsa te krell, un lau mange wawar menshen, te silwerenn le un choirenn pen pral menshende, kai prindjran man gar.

5. Mose 5:26

An kek tsiro nai shunas i mensho o rakepen o djido Deblestar dran i jag win, jaake har mer, un atchas djides?

1. Tessalonikarja 1:9

Jon hi kolla, kai penenn i wawarenge, har lan tumer men pash tumende pre, har mukan tumaro phuro drom, te djan ap o Debleskro drom, un mangenn buder gar wawar koowa an har o djido un tchatcho Debles kokres.

Hebrearja 3:12

Mire phrala, denn jak ap tumare djia, te mukell kek tumendar peskro patsepen, un kamell o djido Deblestar buder tchi te djinell.

Jakobo 5:17

O Elija his i mensho har mer. Job mangas o Deblestar, te dell kek brishin. Un koi das kek brishin ap i phub triin bersha un shob tchon.

Josua 3:10

Ap kawa dikenn, te hi o djido Dewel mashkral tumende, un te tradell lo glan tumende i Kanaanitarja win, ninna i Hetarja, i Hiwarja, i Perisarja, i Girgasharja, i Amorarja un i Jebusarja.

Debleskro tsiro 14:7

Un job das bari gole: “Darenn o Deblestar un sharenn les! Ko tsiro hi kanna kai, kai job o tchatchepen pral i tsele menshende wi-rakrella. Witsrenn tumen tele glan koleste, kai kras o bolepen un i phub, un o baro pani, un mangenn les an!”

Debleskro tsiro 19:10

Un me witsrom man glan leste tele, te sharap les. Un job penas ap mande: “Ma kre kowa! Share o Debles! Me hom o Debleskro budepaskro har tu un tire phrala, kai sikrenn i wawar menshende o Jesuseskro drom. Kolen das o Jesus o Debleskro Ducho. Kowa sikrell len, te hi le leskre menshe.”

Debleskro tsiro 19:19

Un me dikom ko vieches un i rajen ap i phub pengre lurdentsa. Kolla wan khetne, te kurenn le pen koleha, kai ap o grai beshdo hi un leskre lurdentsa.

Debleskro tsiro 22:9

Un job rakras ap mande un penas: “Ma kre kowa! Me hom o Debleskro budepaskro har tu un tire phrala, kai o Debleskre rakepangre hi. Un me hom ninna jek kolendar, kai rikrenn kal laba an pengre djia, hoi an kau liil tchinlo hi. Ma share man! Share o Debles!”

Debleskro tsiro 4:11

“Tu, o Dewel, maro rai, tu hal moldo, te less o railepen, un o sharepen, un i soor. Tu kral o bolepen un i phub. Jaake, har tu kamal, jaake kral tu kowa, un was kowa.”

1. Samuel 12:21

Ma nashenn kol chochene deblenge palla, hoi tchi molenna, un hoi tumen gar win nai lenna dran o merepen. Jon hi tchi.

1. Samuel 17:26

Kote penas o David ap kol murshende, kai koi tardo his: “Hoi lell kowa, kai ko murshes kote marella un i ladj i Israelendar pale krik lella? Hoi patsell ko Filistari, koon job hi? Job hi gar tchinlo ap peskro mass, un patsell, te nai praassell lo i lurden ko djido Deblestar!”

1. Samuel 17:36

Lewe un bere dom mulo. Un jaake djal les ninna kau Filistareske, kai gar tchinlo hi ap peskro mass. Job praassas i lurden o djido Deblestar. Doleske hunte merell lo!”