Sikepaskro 9:1 - O Debleskro Lab 2024 (Sinte-Manouche)

¹ Kova halauter lom ap miro dji, te hayvap kova: Čače oun goseve, oun halauter hoy yon krenna, hi an o Debleskro vast. Kek djinella, venn i vavar lačes ap leste? Venn le rhoyedo ap leste? Kova lauter vell diklo an ko tsiro, hoy vella.

O Debleskro Drom 2021 (Sinte)

¹ Kowa halauter lom ap miro dji, te haiwap kowa: Tchatche un gosewe, un halauter hoi jon krenna, hi an o Debleskro wast. Kek djinella, wenn i wawar latches ap leste? Wenn le chojedo ap leste? Kowa lauter well diklo an ko tsiro, hoi wella.

Sikepaskro 9:1 Iomraidhean Croise

Hiob 12:10

An leskro vast hi o djipen halauterestar, hoy djivella, ninna o djipaskro dourho i tsele menshendar!

Hiob 27:12

T'mer dikan kava lauter ninna! Hoske rakrenn t'mer palle savo dinelo koova?

Hiob 5:8

Te djals mange har touke, rodoms o Debles, oun anoms miro koova glan leste.

Debleskri gili 10:14

Tou dikal les. Tou deh yak ap kolende, kolenge le o djipen phares krenn, oun djineh lengre douka, oun leh lengro koova an tiro vast. Ava, i čorvele čivenn pengro djipen an tiro vast. Tou hal ap i rig kolendar, kolen kek dad bouder hi.

Debleskri gili 119:109

Miro djipen hi hako tsiro gar dour o merepastar. Tiro drom bistrau me gar.

Debleskri gili 31:5

Tserde man dran koy netsa vin, hoy kran le, te perap dren. Tou hal o zorelo, kay ap miri rig hi.

Debleskri gili 73:3

har dikom, te djal i čilačenge yaake mishto. Me zilverom ap kolende, kay krenn pen baro.

Gosewe laba 16:3

Čip kova, hoy tou kameh te krell an o baro Debleskro vast, oun yob moukell kova yaake te vell, har touke glan lal.

Sikepaskro 1:17

Miri tseli djiyeskri zoryah kamom te hatsap vin, hoy čačepah gosvepen hi, oun hoy dinelo oun narvelo hi. Oun kote hatsom vin, kay kova yaake hi, har te nashoms pal o dourho, hoy djal pral i phoub.

Sikepaskro 10:14

Ko dinelo krell boud laba oun hayvas gar, kay kek mensho djinella, har halauter vella. Oun kek nay penell leske, hoy pal leste vella.

Sikepaskro 7:15

Me dikom boud koova an miro djipen, hoy hayvom me gar: Koy hi i lačo morsh, kay djivas i čačo djipen, oun yob merella glan te vas lo phouro. Oun koy hi i rhorheno morsh, ko djivell an o čilačepen, oun yob djivell i rah djipen.

Sikepaskro 7:25

Palle penom mange, tou hounte rodess boudeder, te hatsess vin, hoske čomone yaake hi. Yaake lom boud koova an i yak, te hayvap len. Kamom te djinap, vell o čilačepen dran o dinlepen oun o pre-phourdepen dran narvlepen?

Sikepaskro 8:14

Phares te hayvell hi kova, hoy hi kerdo ap kay phoub: Kote hi menshe kay djivenn an o čačepen, oun kolenge djal har i menshenge, kay djivenn i djoungelo djipen. Oun pale hi menshe koy, kay djivenn i foullo djipen, kolenge djal har te djivans le an o čačepen. Kote penom: Kova hi ninna phares te hayvell.

Sikepaskro 8:16

Me kamom vin te hatsell, har te nay vau gosevo, oun lom halauter an o yak, hoy i menshe ap kay phoub krenna. Dives oun rati nay sovom gar.

Sikepaskro 8:7

Mer djinah gar, hoy vella. Koon nay penell menge, har halauter vella?

Sikepaskro 9:6

Har i menshe kaman len, oun har rhoyran le pen pral lende, oun har zilveran yon ap lende, kova lauter hi bouder gar koy. Len hi či bouder i menshentsa ap kay phoub khetne, oun koleha, hoy kerdo vell ap kay phoub.

Jesaja 26:12

Baro Devel, le o kourepen krik, te djal menge mishto! Lauter hoy kram, kral tou menge.

Jeremia 43:6

Kolla his morsha, djouvya oun čave. Mank lende his ninna o baro rayeskre ča, oun kol vavar halauter, kay moukas o Nebouzaradan pale pash o Gedalya, koleskro dad o Ahikam his, koleskro dad o Shafan his. O Nebouzaradan his o pralstouno lourdo, kolendar kay dan yak ap o Neboukadnezar. Mank kolende, kay khetne lino van, his ninna o Debleskro rakepaskro, o Yeremia oun o Barouk, koleskro dad o Neriya his.

5. Mose 33:3

O baro Devel kamell peskre menshen o djiyestar. Yob rikrell peskro vast pral halauterende, kay leske hi. Yon beshenn pen pash leskre pire, oun shounenn ap leskre laba.

2. Timoteo 1:12

Doleske hounte lap kava lauter ap mande kate an o stilepen, oun me ladjau gar. Me djinau, ap koneste patsaua. Oun me djinau, kay o Yezous Kristo rikrell peskre vasta pral kova, hoy yob an miro vast das, bis te yob pale vella.

1. Petro 1:5

kay patsenn ap leste. O Devel rikrell t'men an peskro zorelo vast, bis te vell ko dives, kay lell t'men o Yezous Kristo dran i tseli bibarht vin. Palle dikenn t'mer har shoukar kova hi, hoy les t'menge hi.

1. Samuel 2:9

O baro Devel rikrell kolen ap o čačo drom, kay leskre hi. Oun kolla, kay kamenn lestar či te djinell, perenn an o tamlepen oun merenn. Kek mensho vell pestar zorelo.