Remarja 8:17 - O Debleskro Lab 2024 (Sinte-Manouche)

¹⁷ Gar kokres leskre čave ham mer. Mer lah ninna lestar ko tselo lačepen, hoy les menge hi an o bolepen. Kova lah khetne o Yezous Kristeha. Te venn douka ap mende, yaake har van douka ap o Yezous Kristo, palle krell men o Devel ninna baro oun raylo leha.

O Debleskro Drom 2021 (Sinte)

¹⁷ Gar kokres leskre tchawe ham mer. Mer lah ninna lestar ko tselo latchepen, hoi les menge hi an o bolepen. Kowa lah khetne o Jesus Kristeha. Te wenn duka ap mende, jaake har wan duka ap o Jesus Kristo, palle krell men o Dewel ninna baro un railo leha.

Remarja 8:17 Iomraidhean Croise

Mateo 16:24

Palle penas o Yezous ap peskre malende: Koon ap miro drom mantsa djala, kova hounte bistrell, hoy leske kokres mishto hi, oun hounte lell peskro troushel ap peste, oun djal mantsa.

Mateo 25:21

Penas o ray ap leste: Kova kral tou mishto. Tou hal i lačo boudepaskro. Me dom tout i tikni boudi, oun tou kral kay boudi mishto. Doleske dau me kanna boud koova an tire vasta. Ab an miro kheer dren, te vess tou mantsa barhteles!

Louka 12:32

Ma darenn! Kate han t'mer gar boud oun gar an-diklo. O Devel, kay hi t'maro dad an o bolepen, kova kamella, te lenn t'mer leskro bravlepen oun raylepen.

Louka 24:26

Kolla penan: O Kristo, ko baro ray, kones o Devel bičras, hounte las douka ap peste, te djas lo an peskro raylepen.”

Johanni 17:24

Tata, me kamau, te venn kolla, kay tou man dal, pash mande, kote, kay me hom, te dikenn le miro raylepen oun miri zoor, hoy tou man dal. Tou kamal man o djiyestar, har o bolepen oun i phoub gar koy his.

Bičepangre 14:22

djan pash i patslende oun dan len zoor an o dji, oun rakran lenge an o dji, te ačenn yon an o patsepen. Oun yon penan ap kol patslende: “Ap maro drom pash o Debleste an o bolepen krenn menge i menshe o djipen phares.”

Bičepangre 20:32

Me čivau t'men kanna an o Debleskro vast, te dell yob yak ap t'mende. Ačenn pash o Debleste oun pash leskro lab! Leskro lab sikrell t'mende o Debleskro lačepen. Les hi i zoor, te krell lo t'men zoreles an o patsepen. Oun o Devel dell t'men yek bravlepen an o bolepen. Kova hi o djipen, hoy gar pre-herella. Kova dell yob lauterende, kay leskre čave hi.

Bičepangre 26:18

Tou kress lenge i yaka pre, te venn yon dran o tamlepen pash i momeli, te less len dran o bengeskro vast vin, oun te aness len pash o Debleste. Te patsenn le ap mande, palle lell o Devel lengri doosh lendar krik. Oun yon venn o Debleskre čave, oun djivenn leha an o bolepen khetne lauterentsa, kay Debleskre čave hi.

Remarja 5:17

Yaake har ko yek morsh, o Adam, i čilačo koova kras, oun o merepen anas ap i tsele menshende, yaake anas ninna yek mensho, o Yezous Kristo, o Debleskro djipen. Ko djipen len kolla, kolen o Devel dran peskro baro lačepen čačo kras glan leste.

Remarja 8:3

O Moseskre laba nay dan ko djipen gar. I menshe nay kran kova gar, hoy an o Moseskre lila činlo hi. Ko čilačepen, hoy an lende his, moukas len gar te krell, hoy o Devel lendar kamas. Doleske penas o Devel: “O čilačepen hounte merell.” Oun yob bičras peskro čaves, te vell lo i mensho har mer, kay čilačo ham. Yob las maro čilačepen ap peste oun meras. Oun yaake meras o čilačepen leha oun nashras peskri zoor pral mende.

1. Korintarja 2:9

An o Debleskro lab hi činlo: Ko lačo koova, hoy kek yak dikas, oun hoy kek kand shounas, oun hoy an kek mensheskro dji dren vas, kova lauter dell o Devel kolen, kay les o djiyestar kamenna.

2. Korintarja 1:5

Yaake har vell boud pharo koova ap mende o Yezous Kristeske, yaake dell lo men ninna boud zoor an o dji.

2. Korintarja 1:7

T'menge penah: Mer djinah oun patsah, te vell pharo koova ap t'mende, palle krell o Devel ninna t'mare djia zoreles.

Galatarja 3:29

Te djan t'mer o Yezous Kristeha, han t'mer ninna o Abrahameskre čave. Oun t'mer lenn kova, hoy o Devel o Abrahameskre čavende della, yaake har penas lo.

Galatarja 4:7

Kanna hal tou bouder gar har i boudepaskro, kay les či hi. Tou hal kanna o Debleskro čavo. Oun doleske leh tou ninna kova, hoy o Devel peskre čavende della.

Efesarja 3:6

Yob sikras len, te nay venn ninna kolla o Debleskre čave, kay kek bibolde hi, te djivenn le leha khetne. O lačo lab o Yezous Kristestar hi ninna lenge, yaake har o Devel glan i rah tsiro penas.

Filiparja 1:29

O Devel hi t'menge lačo, oun das t'men o patsepen ap o Yezous Kristeste, oun gar o patsepen kokres. Na-a, dran o patsepen ap leste, hounte lenn t'mer ninna douka ap t'mende.

Filiparja 3:10

Kamoms te prindjrap či vavar har o Yezous Kristes oun o Debleskri zoor, kay kras les i moulendar djido. Oun me lau douka ap mande, yaake har yob douka ap peste las, te vap yaake har yob bis ap o merepen,

Kolossarja 1:24

Oun kanna hom barhtelo an kol douka, hoy anom t'menge ap mande. Yaake har o Yezous Kristo anas douka ap peste i patslenge, yaake hounte anap me ninna douka ap mande i patslenge.

Tito 3:7

Yaake čivas men o Yezous Kristo an o čačepen dran lauter lačepen, te dell lo men ko djipen, hoy gar pre-herella. Oun mer djinah, kay lah ko djipen an ko tsiro, hoy vella.

Hebrearja 1:14

I tsele bolepangre hi leskre boudepangre. Kolen bičras o Devel ap i rig kolendar, kay djan ap o Debleskro drom, te lenn le o Debleskro djipen, hoy gar pre-herella.

Hebrearja 1:2

Kanna, an kava tsiro, bičras lo peskro čaves pash mende, te rakras yob ap mende. Koleste das o Devel lauter an leskre vasta, te vell yob o ray pral lauter. Koleha kras lo o bolepen oun i phoub.

Hebrearja 6:17

Har das o Devel peskre menshen peskro lab, das lo ninna peskro vast koy pre. Yaake sikras lo len, te dell lo len čačepah kova, hoy yob lenge penas.

Jakobo 2:5

Shounenn, mire kamle phrala! O Devel rodas kolen vin, kay hi čorvelo ap kay phoub, te venn le bravelo an o patsepen. Ko tsiro vella, kay djivenn le leha khetne an o bolepen oun lenn leskro bravlepen. Kova lenna kolla, kay kamenn les o djiyestar. Yaake penas les o Devel.

1. Petro 1:4

yaake lah mer ninna ko djipen, hoy bouder gar pre-herella. Ko shoukar koova, hoy lah an o bolepen, ačell hako tsiro. Kova vell gar čiklo oun phouro. Kava bravlepen hi t'menge,

1. Petro 4:13

Te venn douka ap t'mende, djinenn: save douka van ninna ap o Yezous Kristeste. Doleske avenn barhtelo! Ap ko dives, kay leskro raylepen diklo vella, givenna oun bashrenna t'mare djia i barhtyatar.

Debleskro tsiro 21:7

Kova, kay zoreles an o patsepen ačas, oun gar pre das, kova lell kava shoukar koova mandar. Me vau leskro Devel. Oun yob vell miro čavo.

Debleskro tsiro 3:21

Kova, kay zoreles an o patsepen ačas, oun gar pre das, kova nay beshell pes mantsa ap miro rayeskro beshepaskro, yaake har me ninna zoreles tardo homs, oun me beshom man miro dadeha ap leskro rayeskro beshepaskro.