Remarja 12:8 - O Debleskro Lab 2024 (Sinte-Manouche)

⁸ Pale vavar hayvenn i patslen an o dji te rakrell, te krenn le len zoreles an lengro patsepen. Kolla hounte krenn kova. Pale vavar denn i čorvelende čomone. Koon kova krella, hounte krell les dran i lačo dji. Kote, kay i patsle khetne venna, hi ninna pralstoune pral lende. Kolla hounte krenn pengri boudi o tselo djiyestar. Vavar patsle rikrenn pen ap i rig kolendar, kay djal lenge gar mishto. Koon kova krella, hounte krell les i barhtelo djiyeha.

O Debleskro Drom 2021 (Sinte)

⁸ Pale wawar haiwenn i patslen an o dji te rakrell, te krenn le len soreles an lengro patsepen. Kolla hunte krenn kowa. Pale wawar denn i tchorwelende tchomone. Koon kowa krella, hunte krell les dran i latcho dji. Kote, kai i patsle khetne wenna, hi ninna pralstune pral lende. Kolla hunte krenn pengri budi o tselo djijestar. Wawar patsle rikrenn pen ap i rig kolendar, kai djal lenge gar mishto. Koon kowa krella, hunte krell les i bachtelo djijeha.

Remarja 12:8 Iomraidhean Croise

1. Mose 18:19

Me rodom les mange vin, te penell lo peskre čavenge oun kolenge, kay pal leste venna, te rikrenn pen le ap miro drom oun krenn, hoy mishto oun čačo hi, te nay moukap me halauter ap o Abrahameste te vell, hoy me leske penom.”

Debleskri gili 112:9

Yob dell boud i čorvelen. Leskro čačepen ačell hako tsireske. Leskri zoor oun leskro raylepen vell baro.

Debleskri gili 37:21

O čilačo patsell peske love, oun playsrell gar pale. Kova, kay an o čačepen tardo hi, krell peskro dji pre oun della.

Gosewe laba 22:9

Kova, kay lačes ap i vavarende dikell, dell peskro maro i čorveleste. Ap leste vell barht vi-rakedo.

Sikepaskro 11:6

Doleske čip o djob taysarla an i phoub, oun mouk gar tele bis an i rati. Tou djineh gar, hoy bares vella, kava te kova, oder hake douy.

Sikepaskro 9:10

Halauter, hoy touke glan o vast vell, te kress, kova kre o tselo djiyestar! Pash i moulende, kay tou ninna hounte djas, kote vell bouder či kerdo. Oun kek krell peske kote i shero, hoy nay krell lo, har nay djinell lo čomone, oun har nay vell lo gosevo.

Jesaja 32:5

I dinelo vell gar bouder kharedo baro morsh, vitar gar vell ap i rhorheno penlo čačepaskro morsh.

Jesaja 32:8

Ko pralstouno, kay hi an o čačepen tardo, lell peske čačo koova glan. oun moukell gar tele, te krell lo kova ninna.

Jesaja 64:5

Kanna vam halauter glan toute har yek, kay pale-čiddo hi. Ninna o čačo koova, hoy kram, hi har i ratli baya ap mende. Mer halauter vam har moule patria. Mari doosh hidjrell men krik, har i dourho moule patria krik phourdell.

Mateo 25:40

Oun o baro ray penell lenge: Čačepah, me penau t'menge: Ko lačepen, hoy t'mer yekeske mire čorvele phralendar kran, ko lačepen kran t'mer mange.

Bičepangre 11:23

Har yob koy his oun dikas, hoy o Devel an peskro baro lačepen kote lauter kras, vas lo barhtelo oun mangas len, te ačenn le pengro tselo djiyeha pash o Yezouseste.

Bičepangre 13:12

Har ko pralstouno kova dikas, vas yob patslo, oun kras bare yaka pral kova, hoy yob pral o ray Yezouseste shounas.

Bičepangre 13:15

Koy pal, har i bibolde dran kol lila glan draveran, hoy o Mose oun o Debleskre rakepangre činan, moukan lenge kol pralstoune pral i biboldengri kangri te penell: “Mare phrala, te kamenn t'mer menge i lab te penell, hoy krell men zorelo an o patsepen, penenn les menge!”

Bičepangre 15:32

O Youdas oun o Silas his o Debleskre rakepangre. Yon rakran kol patslentsa, oun mangan len, te ačenn le an o patsepen. Oun lengre labentsa dan yon len zoor, te djan yon doureder ap o Yezouseskro drom.

Bičepangre 20:2

Kote djas lo an i gaba oun forya, kay i patsle khetne venna, oun das len zoor an lengro patsepen. Koy pal vas lo an o grichtikro them.

Bičepangre 20:28

Denn garda ap t'mende oun ap kol tsele patslende! Kolen ginas o Devel peskro čaveskro rateha. O Debleskro Dourho das len an t'mare vasta, te denn garda ap lende. T'mer han lengre bakrengre.

Bičepangre 4:36

Yaake kras kova ninna o Yosef. Kova his i Levitari oun vas dran o them Ciprus. O Yezouseskre bičepangre dan les ninna Barnabas gole. Ko kharella ap lengro rakepen: O morsh, kay rakrell i menshentsa lačo, te hi lengro dji pharo.

Remarja 12:13

Denn kol čorvele patslende, hoy len hounte vell djipaske! Kolla, kay pash t'mende venna, kolen lenn an t'mare khera dren, oun denn len te rhal oun te piyell!

Remarja 13:6

Dran kova denn t'mer ninna kol themeskre love, hoy o themeskre pralstoune t'mendar kamenna. Te mangenn le kol love t'mendar, krenn le koy boudi, hoy o Devel len das.

1. Korintarja 12:28

Kote, kay i patsle khetne venna, das o Devel hakenes i boudi. Peskre bičepangren das lo koy boudi, te penenn le i menshenge peskro lab. Oun vavar hi o Debleskre rakepangre, kay penenna, hoy o Devel len sikras. Koy hi ninna sikepangre, kay sikrenn i menshende o Debleskro drom, oun kolla, kay krenn baro koova an o Debleskri zoor, kay kek kokres pestar nay krella. Vavaren das yob i zoor, te krenn le i nasselen sasto. Hi patsle, kay hi o vavarenge koy, oun ninna vavar, kay rikrenn i patslen khetne, oun pale vavar, kay rakrenn nay an i vavar rakepen, hoy o Debleskro Dourho len das.

1. Korintarja 14:3

Kova, kay penell i menshenge i lab, hoy vella o Deblestar, kova rakrell yaake ap i menshende, te vell lengro patsepen zoreles, oun te venn lengre djia barhteles oun zoreles.

2. Korintarja 1:12

Maro dji penell menge, mer djivam maro djipen čačes oun djoudjes, yaake har o Devel kamella. Doleske nay sharah men. Mer rakram pral o Debleskro lačepen oun penam či, hoy vella dran maro menshengro gosvepen. T'mer djinenna, yaake djivam gar kokres mank i vavar menshende, na-a, ninna pash t'mende.

2. Korintarja 11:3

Me darau, te vas vavar koova an t'maro shero, oun t'mer djivenn bouder gar djoudjes oun kokres o Yezous Kristeske. Me darau, te djas t'menge har i Evake, har o gosevo sap rhorhras lat, oun yoy moukas o čačo drom.

2. Korintarja 8:12

Te dell yek o djiyestar yaake boud har nay dell lo, dikell o Devel lačes ap leste. Yob kamell gar, te dell lo boudeder, har les hi.

2. Korintarja 9:11

Yob dell t'men yaake boud, te nay denn ninna kolen, kay len či hi. Te lenn yon kova, hoy mer anah lenge, palle parkrenn pen boud menshe pash o Debleste.

2. Korintarja 9:13

Koleske, hoy t'mer lenge lačes kran, sharenn le o Debles. Yon dikenn, kay shounenn t'mer ap o lačo lab o Yezous Kristestar, oun kay hi yon, ninna i tsele vavar patsle, t'menge phrala oun phenya.

2. Korintarja 9:7

Hakeno hounte dell yaake boud love, har leskro dji leske penella. Les hounte khaytell kova gar, hoy yob das! Yob dell kova pestar oun gar, har te kaman le les lestar. O Devel kamell kol menshen, kay denn o djiyestar.

Efesarja 6:5

T'mer boudepangre, kay hounte boudrenn t'mare rayenge, ap t'mende penau: Shounenn ap t'mare rayende! Darenn lendar oun boudrenn lenge, har te boudrans o Yezous Kristeske!

5. Mose 15:14

Tou dess les tire bakrendar, tiro djobestar oun tiri molyatar, halauterestar, hoy tiro baro Devel tout das.

Kolossarja 3:22

T'mer boudepangre, shounenn hako tsiro ap t'mare rayende, kolenge t'mer hounte boudrenna! Ma krenn t'mari boudi yaake, te sharenn t'men i menshe! Na-a! Boudrenn lenge o čačo djiyestar, oun yaake, har kamell o ray Yezous kova t'mendar.

1. Tessalonikarja 2:3

Yaake nay dikenn t'mer, kova, hoy t'menge penam, vas gar dran i čilačo dji, oun hi kek rhorhepen. Vitar gar kamam t'men goseve labentsa te taprell.

1. Tessalonikarja 2:8

T'mer hans an mare djia, oun doleske sikram t'mende gar kokres o Debleskro drom, na-a, mer djivam ninna t'mentsa khetne; yaake baro his maro kamlepen t'menge.

1. Timoteo 4:13

Le o Debleskro lab an i vast, oun sike i menshende, hoy koy dren činlo hi, oun rake koy pral! Sike lende, har te djan yon ap o Debleskro drom! Kre kova yaake rah, bis te vau pash toute!

1. Timoteo 5:17

Kanna rakrau pral kolende, kay hi kol phoureder mank i patslende, oun krenn pengri boudi mishto. I patsle hounte dikenn pre ap lende oun shounenn ap lende. Ninna hounte denn le len love. Kova penau boudeder kolendar, kay penenn i menshenge o Debleskro lab, oun sikrenn lende o Debleskro drom.

1. Timoteo 6:18

Pen kol bravelenge ninna, te krenn le lačo koova! Lengro dji te vell baro i vavarenge, te denn le ninna i vavaren dran pengro bravlepen!

Hebrearja 10:25

Das yak, te ačas gar krik, te venn i patsle khetne. Hi save mashkral i patslende, kay venn bouder gar khetne. Kova hi gar mishto. T'mer dikenna, te hi o dives gar dour, kay vell o ray Yezous pale. Doleske djan kote, kay venn i patsle khetne, te krell yek o vavares zoreles an o dji.

Hebrearja 13:17

Shounenn ap kolende, kay sikrenn t'men, har te djan ap o Debleskro drom! Krenn kova, hoy yon t'menge penenna! Lengri boudi hi, te denn le yak ap t'mende. Oun yon hounte penenn o Debleske, har yon kran pengri boudi. Djivenn yaake, te krenn le pengri boudi i barhtelo djiyeha! Te rovenn yon pral t'mende, palle vals kova t'menge gar mishto.

Hebrearja 13:22

Mire phrala, me mangau t'men, shounenn ap kol laba, hoy me t'menge an kava tikno liil činom!

Hebrearja 13:24

Penenn lače laba mendar kolenge, kay denn garda ap t'mende, oun ninna ap i tsele patslende! I patsle dran o them Italia penenn t'menge “Ačenn o Debleha!”

Hebrearja 13:7

Ma bistrenn, har kolla pengro djipen djivan, kay penan t'menge o Debleskro lab, oun sikran t'men leskro drom! Dikenn, har yon djivan oun meran, oun zoreles an o patsepen tardo his! Djan yaake ap o Yezouseskro drom har yon djan!