Nehemia 9:1 - O Debleskro Lab 2024 (Sinte-Manouche)

¹ Oun ap o 24. (biish-te-starto) dives an kava čon van i Israelitarya khetne, oun yon rhan či oun rivan pen an gone oun čivan čik ap pengre sherya.

O Debleskro Drom 2021 (Sinte)

¹ Un ap o 24. (biish-te-starto) diwes an kau tchon wan i Israelitarja khetne, un jon chan tchi un riwan pen an gone un tchiwan tchik ap pengre sherja.

Nehemia 9:1 Iomraidhean Croise

2. Samuel 1:2

Koy vas o triinto dives i morsh o Sauleskre lourdendar. Koleskre koola his paash, oun čik his ap leskro shero. Oun har yob pash o Davideste vas, vitsras yob pes glan leste ap i phoub, oun sharas les.

2. Familjakro liil 20:3

Kote vas i traash pral o Yosafat, oun yob kamas o baro Debles te mangell, te vell lo ap lengri rig. Yaake moukas lo i tsele menshenge an o them Youda te penell, te rhan le či bouder.

2. Familjakro liil 7:10

Oun ap o 23. (biish-te-triinto) dives an o eftato čon moukas o Salomo i menshen khere te djal. Oun yon djan barhteles khere. Lengro dji givas pral ko tselo lačepen, hoy kras o baro Devel ap o Davideste, oun ap o Salomeste, oun ap peskre menshende Israel.

Esra 8:21

Oun me moukom kote pash o pani Ahava i tsiro vin te kharell, kay rhas mer či, oun djas ap i čanga glan maro Debleste, te djal lauter mishto ap maro drom, te djah an maro them, oun te venn kek čilače menshe pral mende oun mare čavende oun halauter hoy men hi.

Esra 8:23

Doleske rham či oun mangam halauter maro Deblestar, oun yob shounas ap maro mangepen.

Nehemia 8:2

Yaake anas o rashay Esra ap o ersto dives an o eftato čon o Moseskro liil glan i tsele Israelitarya, kay khetne van, glan kol tsele morshende oun djouvyende, oun lauterende, kay nay hayvan les.

Ester 4:16

“Dja koy oun de i tsele bibolden an o foro Susa khetne gole! Rhan oun piyenn triin divessa či, gar ap o dives, vitar gar an i rati. Krenn kova mange, te dikell o Devel lačes ap mande! Oun me oun kol djouvya, kay mange boudrenn, mer kamah kova ninna yaake te krell. Oun pal kova kamau pash o baro rayeste dren te djal, ninna te hi khatar o činlo lab. Oun te denn le man moulo, palle denn le man moulo.”

Ester 4:3

Oun an hako them, kay o liil o baro rayestar vas, his baro ropen mank i bibolde. Oun boud kaman bouder či te rhal, rovan oun rivan pen an gone oun čivan yagakri čik ap pende.

Hiob 2:12

Har dikan le les foun doural, prindjran le les gar bouder pale. Oun yon rovan phares. Oun zoryah tserdas hakeno lendar peskre koola pestar tele, oun kras len paash. Oun yon vitsran čik pre oun ap pengre sherya.

Jesaja 22:12

Oun ap ko dives das o baro Devel, ko ray pral o bolepen oun i phoub gole: “Rovenn oun denn gole, činenn t'menge i balla tele, oun rivenn t'men an ripya dran gone, te sikrenn, kay khaytell t'men t'mari doosh!”

Joel 2:12

“Ninna kanna”, penell o baro Devel, “nay moukenn t'maro čilačo drom oun venn pash mande. Avenn t'maro tselo djiyeha, rhan či oun rovenn, denn gole i bibarhtyatar!

3. Mose 23:34

Pen ap i Israelitarya: An o eftato čon hi kol bare divessa, kay djivenn t'mer an patyengre khera efta divessa, te vell o baro Devel sharedo. Ko ersto dives hi o 15. (deesh-te-pančto) dives an kava čon.

3. Mose 23:39

Ap o 15. (deesh-te-pančto) dives an o eftato čon, an ko tsiro, har anan halauter dren, hoy ap t'mari phoub bares vas, krenn efta divessa i festo o baro Debleske. O ersto dives oun o orhtato dives hi i dives, kay krenn kek boudi.

Josua 7:6

Har o Yosua kova dikas, doukas leskro dji yaake, te kras lo peskre koola, hoy ap leste his, paash, oun moukas pes i mouyeha ap i phoub te perell, – glan o morhton, kay o baro Debleskre deesh laba dren his, oun ačas yaake čiddo bis ap i rat. Ninna i phoureder an Israel kran kova yaake. Oun yon vitsran čik ap pengre shere.

Debleskro tsiro 11:3

Oun me bičrau douy rakepangren an ko foro. Kolla penenn i menshenge o čačepen pral mande. Lengre ripya hi kerdo dran gone. Deesh-te-douy-sheel-te-shob-desha (1.260) divessa penenn yon lenge mire laba.”

Čačepangre 20:26

Pale djan i tsele lourde dran Israel pre an o foro Betel, oun rovan oun dan gole glan o baro Debleste. Oun rhan či oun piyan či ko tselo dives bis i rat vas. Oun yon rhačran firhen o baro Debleske, save kay van tseles rhačedo oun save, kay rhan le khetne glan o baro Debleste.

1. Samuel 4:12

Oun i morsh dran o kheer Benyamin nashas o tselo drom foun kotar, kay o marepen his, bis pash o Shilo ap yek dives. Yob kras peskre koola paash oun čivas čik ap peskro shero, te sikrell lo, har leskro dji rovas.

1. Samuel 7:6

Oun yon van khetne an Mispa. Kote lan le pani, oun čoran les glan o baro Debleste vin. Oun ap ko dives rhan le či, te dikell o baro Devel ap lende. Oun yon penan: “Mer anam doosh ap mende glan o baro Debleste.” Oun kote an Mispa vas o Samuel lengro čačepaskro ray.