Nehemia 6:13 - O Debleskro Lab 2024 (Sinte-Manouche)

¹³ te darap man oun krap kova oun anap yaake doosh ap mande. Palle vals len doha, hoy le pal mande nay rakrans, oun nay praasans man koleha!

O Debleskro Drom 2021 (Sinte)

¹³ te darap man un krap kowa un anap jaake doosh ap mande. Palle wals len doha, hoi le pal mande nai rakrans, un nai praassans man koleha!

Nehemia 6:13 Iomraidhean Croise

Nehemia 6:12

Me hayvom, koles bičras gar o Devel! His o Tobiya oun o Sanballat, kay dan les love, te penell yob sau koova mange,

Nehemia 6:6

An koleste his činlo: Mank i tsele menshende djal o rakepen trouyel, oun o Geshem penell les ninna: Tout hi glan, te hadess tout khetne i biboldentsa pral mende! Doleske čiveh tou i massouri pale pre. Oun pal kova, hoy rakedo vell, kameh tou lengro baro ray te vell,

Gosewe laba 22:1

Te rakrenn le pral toute lačo koova, hi kova feteder har baro bravlepen. Te dikenn le lačes ap toute, hi kova feteder har roup oun sonakay.

Gosewe laba 29:5

Kova, kay makell i vavareske gvin troul o mouy, kova čivell i netsa khatedo vin glan koleskre pire.

Sikepaskro 7:1

Vell penlo: Hi feteder, te vell yek lačes an-diklo mank i menshende, har te makell lo pes lačo djeteha. Me penau: O dives, kay i mensho merella, hi feteder har ko dives, kay i mensho ap kay phoub vella.

Jesaja 51:7

Shounenn, hoy penau, t'mer, kay prindjrenn o čačepen, t'mer menshe, kay kamenn miro drom te djal. Ma darenn glan ko praasepen, koleha i menshe t'men praasenn! Ma darenn glan lengro baro mouy!

Jesaja 57:11

Konestar trashal oun daral tou yaake, te rhorhral man oun bistral man, oun moukal man touke gar an o shero te vell? Hi kova gar yaake: I rah tsiro penom či koy pral. Oun doleske dareh bouder gar mandar.

Jeremia 1:17

Ab zoreles! Oun kre tout ap o drom! Oun pen lenge halauter, hoy me touke penau! Ma traash lendar, te krap me gar, te trashess tou glan lende!

Jeremia 18:18

Koy hi menshe, kay penenn: Avenn, te rakras koy pral, havo čilačepen mer nay krah ap o Yeremia. Men hi doha rashaya, kay nay sikrenn men maro drom, oun doha goseve, kay nay penenn menge, hoy te kras, oun doha Debleskre rakepangre, kay nay penenn menge o Debleskre laba. Mer tapras les leskre labentsa, oun das či ap leskro rakepen!

Jeremia 20:10

Me shounau, har boud menshe čorrhanes rakrenna: “Yob krell menge či har traash. Anas doosh ap leste! Sikras les an!” Ninna mire mala lourenn koy pre, te perap. “Dikas, te anas les yaake dour, te penell yob čomone, hoy gar mishto hi. Palle dah les pale, hoy lo mentsa kras!”

Ezekiel 2:6

Oun tou mensho, tou daress gar lendar, vitar gar lengre labendar, hoy yon rakrenna. Tou djiveh mank lende har mank skorpione. Yon hi har soubyengre bourra troul toute. Ma mouk len touke daar te krell! Ma traash kolestar, hoy kolla rakrenna, kay moukenn pen či te penell!

Mateo 10:28

Ma trashenn kol menshendar, kay nay marenn t'men! Yon nay marenn gar o djipen an t'mende, hoy ninna pal o merepen djivella. Trashenn o Deblestar, kay nay čivell t'men pal o merepen an o bengeskri yag, kay han hako tsiro nashedo!

Mateo 22:15

Oun pal kova van i Farisarya khetne, oun rakran mank pende, har yon nay taprenn o Yezouses an leskre laba.

Mateo 26:59

Oun i bare rashaya oun i tsele pralstoune bibolde rodan morshen, kay anenn rhorheno koova ap o Yezouseste, te nay marenn le les.

Bičepangre 6:13

Kolla, kay rhorhepen ap leste pre anan, kolla penan: “Kava morsh moukell gar tele te rakrell lo djoungele laba pral o Debleskro baro kheer oun pral o Moseskre laba.

2. Korintarja 11:12

Te lau či t'mendar an ko tsiro hoy vella, palle doleske, te vap gar har kolla, kay lenn t'mendar love. Kamau gar, te nay sharenn le pen oun penenn, yon hi yaake har mer.

1. Timoteo 5:14

Doleske kamau, te romedinerenn kol terne djouvya pale, te lenn yon čaven, oun te boudrenn yon an pengro kheer, yaake te nay penell kek djoungelo koova pral i patslende.

2. Timoteo 1:7

O Debleskro Dourho, hoy o Devel men das, kova krell men gar dareno, na-a, o Debleskro Dourho dell men zoor, kamlepen i vavarenge, oun o gosvepen, har te djivas.

Tito 2:8

Pen les lenge yaake, te nay penell kek, kay kova gar čačo hi, hoy tou peneh! Palle nay rakrenn kolla gar djoungeles pral mende, kay hi rhoyemen ap mende. Na-a, yon ladjenn pen.

Jakobo 4:17

Koon djinell o lačepen, oun krell les gar, kova anell doosh ap peste.

Debleskro tsiro 21:8

Kol vavar djan an i bari yag, hoy zoreles rhačella oun khandella. Kote merenn le o douyto kopo. Yon hi kolla, kay i daryatar gar mantsa djan, kolla, kay phoukran ap pengro patsepen, kolla, kay djoungelo koova kran, kolla, kay maran vavaren, kolla, kay loubran pen trouyel, kolla, kay bengeskro koova kran, kolla, kay mangan vavar koova an har o Debles, oun i tsele rhorhene.