Nehemia 6:1 - O Debleskro Lab 2024 (Sinte-Manouche)

¹ O Sanballat oun o Tobiya oun o Geshem, ko Arabari, oun kol tsele vavar, kay menge čilačepen kaman, kolla shounan, kay his i massouri kerdo, oun kek kotar pral ačas, kay barra vi-phagedo his. An ko tsiro his kokres i voudya gomme gar dren.

O Debleskro Drom 2021 (Sinte)

¹ O Sanballat un o Tobija un o Geshem, ko Arabari, un kol tsele wawar, kai menge tchilatchepen kaman, kolla shunan, kai his i massuri kerdo, un kek kotar pral atchas, kai barra wi-phagedo his. An ko tsiro his kokres i wudja gomme gar dren.

Nehemia 6:1 Iomraidhean Croise

Nehemia 13:4

Glan yek tsiro vas o rashay Elyashib o pralstouno pral i rhapangre khera pash o Debleskro kheer. Oun yek leskre menshendar his o Tobiya.

Nehemia 2:10

Oun har shounan kova o Sanballat, ko Horonari, oun leskro boudepaskro, ko Ammonari o Tobiya, van le an bari rholi, te vas yek, kay kamas i Israelenge lačepen te krell.

Nehemia 2:19

Kote his ninna morsha, kay praasan men oun san pral mende, har shounan le kova. Yon his o Sanballat, ko Horonari, oun leskro boudepaskro, o Tobiya, ko Ammonari, oun o Geshem, ko Arabari. Kolla penan: “Hoy hi kova, hoy kote krenn? Kamenn t'mer o baro rayestar tele te perell?”

Nehemia 3:1

Oun o baro rashay Elyashib kras pes ap i boudi peskre phralentsa, kol vavar rashayentsa, oun yon čivan o foreskro voudar pale pre, hoy kharas Bakrengro Voudar. Oun yon rakran o Debleskri barht pral leste vin, oun čivan kol douy voudya dren. Oun yon čivan ninna koy massouri pale pre bis pash ko turmo, hoy kharell Mea, oun bis pash ko turmo, hoy kharell Hananel, oun rakran o Debleskri barht pral i massouri vin.

Nehemia 3:3

Oun ko foreskro voudar, hoy kharella Mačengro Voudar čivan i morsha pre, kolengro dad o Senaa his. Yon čivan kol pesse bourhle kashta pre, oun čivan kol douy voudya dren, ninna i kashtengre oun o saster, hoy kol voudya pandella.

Nehemia 3:6

Oun o foreskro voudar, hoy kharell Phouro Voudar, kras o Yoyada, koleskro dad o Pasea his, khetne o Meshoullam, koleskro dad o Besodja his. Yon čivan kol pesse zorele kashta pre, oun čivan kol douy voudya dren, ninna i kashtengre oun o saster, hoy kol voudya pandella.

Nehemia 4:1

Oun i boudi ap o foreskri massouri djas mishto doureder, oun kol kotya, kay i barra gomme vin phagedo his, van pale neves kerdo. Har shounas kova o Sanballat oun o Tobiya, ninna kol menshe dran Arabia, dran Ammon oun dran Ashdod, koy tapras len bari rholi.

Nehemia 7:1

Oun har i massouri tardo his, oun me o voudya dren čivom, vas kol morshen pengri boudi dino, kay pash i voudya yak hounte dan, ninna i gipangren oun i Levitaryen.

Daniel 9:25

Kanna dikess oun hayvess: Har ko lab penlo vas, te vell o Yerusalem pale neves kerdo bis pash ko tsiro, kay vell i ray o Deblestar bičedo, djan efta kope efta bersha trouyel. Oun pal efta kope 62 (shob-deesh-te-douy) bersha hi lo pale neves kerdo peskre dromentsa oun zorele kherentsa, ninna te hi kova an i pharo tsiro boud kourepah.