Nehemia 12:30 - O Debleskro Lab 2024 (Sinte-Manouche)

³⁰ Oun i rashaya oun Levitarya čoran Debleskro pani ap pende, te krenn le pen djoudjo glan o Debleste. Oun palle čoran le ninna o Debleskro pani ap i menshende, ap o foreskre voudya oun ap i massouri.

O Debleskro Drom 2021 (Sinte)

³⁰ Un i rashaja un Levitarja tchoran Debleskro pani ap pende, te krenn le pen djudjo glan o Debleste. Un palle tchoran le ninna o Debleskro pani ap i menshende, ap o foreskre wudja un ap i massuri.

Nehemia 12:30 Iomraidhean Croise

1. Mose 35:2

Koy penas o Yakob ap peskri familya oun ap lauterende, kay pash leste his: “Čivenn t'mendar krik kol deblen dran barra oun kashta, hoy t'mer an-mangenna! Thovenn t'men oun rivenn t'men djoudje ripya an!

1. Familjakro liil 15:14

Koy kran pen i rashaya oun i Levitarya djoudjo o Debleske, te nay anenn le o morhton koy pral.

2. Familjakro liil 29:34

Kote his gar doha rashaya, te tserdenn le i hauta kol tsele marede firhendar tele. Doleske van lenge lengre phrala, kol Levitarya, pash o vast, bis te i tseli boudi kerdo his, oun boudeder rashaya pen djoudjo kran o baro Debleske. [I Levitarya his sikeder koy pashel, te krenn le pen djoudjo o Debleske har i rashaya.]

2. Familjakro liil 29:5

Oun penas ap lende: “Morshale dran o kheer Levi, shounenn mire laba! Krenn t'men kanna djoudjo o baro Debleske, oun krenn leskro kheer pale djoudjo leske, kay o Devel t'mare phourendar hi! Oun vitsrenn ko tselo koova vin, hoy kras kava kheer pale-čiddo.

Esra 6:21

Oun i Israelitarya, kay van dran o pandepen pale, rhan o Passa, oun lentsa khetne ninna i tsele vavar menshe an kava them, kay moukan pengre menshen, kay vavar deblen an-mangenn. Oun yon rikran pen kanna pash i Israelitaryen, te mangenn le kolengro Debles an. Kova hi o baro Devel.

Nehemia 12:29

ninna dran Bet-Gilgal oun dran o them troul i forya Geba oun Asmavet.

Nehemia 13:22

Oun me penom ap i Levitarya, te krenn le pen djoudjo o Debleske. Palle te venn le pash o foreskre voudya oun denn koy yak, te vell o Debleskro dives dren rikedo. Ninna kava biste mange gar, miro Devel. Oun dik lačes ap mande an tiro baro kamlepen.

Nehemia 13:30

Oun yaake krom me i Israelitaryen pale djoudjo oun erligo glan o Debleste, oun las dran lende lauter krik, hoy dran o vi-them an lende dren vas. Oun penom lenge, koon i rashayendar oun i Levitarendar havi boudi hounte krell, yaake te djinas hakeno, hoy te krell lo.

Hiob 1:5

Oun har kol divessa trouyel his, kay le rhan oun piyan, palle bičras o Hiob pash lende, te venn le pash leste. Oun yob stas sik taysarlakro pre, oun maras hakeneske lendar i firho, oun rhačras les o Debleske, te vell lengri doosh krik lino. Yob penas peske: Nay djals, te lan mire morsh čave doosh ap pende, oun rakran djoungeles pral o Debleste an pengre djia. Oun yaake kras o Hiob pal hako baro rhapen, hoy leskre morsh čave kran.

2. Mose 19:10

Oun o baro Devel penas ap o Mose: “Dja pash lende oun pen lenge, te krenn le pen djoudjo mange kava dives oun taysar, te thovenn le pengre koola.

2. Mose 19:15

Oun yob penas: “Rikrenn t'men djoudjo o triinto diveske! Oun kek morsh taprell an kava tsiro peskri romyat an!”

Hebrearja 5:1

Hako baro rashay hi dran i menshende vin rodedo, te vell lo lengro rashay glan o Debleste. Leske anenn le firhen, te anell lo len glan o Debleste, te vell lengri doosh lendar krik lino.

Hebrearja 5:3

Doleske hounte marell lo ninna peske i firhes, oun anell les glan o Debleste, te vell leskri doosh krik lino, yaake har yob i vavar menshenge firhen marella, oun glan o Debleste anella.