Nehemia 10:37 - O Debleskro Lab 2024 (Sinte-Manouche)

³⁷ Mer anah hako phoureder morsh čaves oun hako firhes, hoy o phoureder peskri datar hi, an maro Debleskro kheer. Ninna i groumyendar oun i bakrendar anah ko phoureder pash kol rashayende, kay boudrenn an maro Debleskro kheer.

O Debleskro Drom 2021 (Sinte)

³⁷ Mer anah hako phureder mursh tchawes un hako vieches, hoi o phureder peskri datar hi, an maro Debleskro kheer. Ninna i grumjendar un i bakrendar anah ko phureder pash kol rashajende, kai budrenn an maro Debleskro kheer.

Nehemia 10:37 Iomraidhean Croise

2. Familjakro liil 31:6

Oun i menshe dran i vavar forya an o them Youda khetne kol Israelentsa, kay pash lende djivan, yon anan ninna pengro deshto kotar lengre groumyendar oun bakrendar oun o vavarestar, hoy yon kaman lengro baro Debleske te dell. Kova lauter čivan le khetne ap bare haufe, yek haufe langs i vavar.

Nehemia 13:10

Oun kote dikom ninna, te anan i Israelitarya gar i Levitarenge ko koova, hoy len hounte dino vals. Doleske kran i Levitarya oun i gipangre bouder gar pengri boudi an o Debleskro kheer, oun nashan penge hakeno ap peskri kotar phoub.

Nehemia 13:12

Oun i tsele menshe dran Youda anan pale o deshto kotar pengro djobestar oun djetestar oun pengri molyatar an kol rhapangre khera.

Nehemia 13:5

Koles das lo ko baro kheer, kay glan kova o djob čiddo his, hoy o Debleske rhačedo vas, ninna o soungepaskro koova oun kol tsele koola, hoy i boudjake koy his, oun ninna o djob oun i mool, oun o djet, hoy o deshto kotar kolestar his, hoy ap i Israelengri phoub bares vas. Kova lauter his i Levitarenge oun i gipangrenge oun kolenge, kay ap o foreskre voudya yak dan oun ninna i rashayenge.

Nehemia 13:9

oun penom zoreles, te krenn le ko kheer djoudjo, oun ninna kol khera, kay pashel his. Oun pal kova anom pale ko tselo koova, hoy i boudjake an o Debleskro kheer hi, ninna o djob rhačepaske, oun o soungepaskro koova.

2. Mose 13:12

aness tou leske i tsele morsh čaven, kay hi i phoureder čave pengre dayendar. Ninna hako morsh firho, hoy hi o phoureder ternepen peskri datar, hi o baro Debleske.

2. Mose 13:2

“Hako morsh čavo, kay hi o phoureder peskri datar pash i Israelitarya, ninna pash lengre firhende, dess tou mange. Kova hi miro.”

3. Mose 23:17

Haki familya anell douy mare, hakeno kerdo dran douy-te-paash kilogramme lačo yarro. Kol douy mare hadell o rashay pre glan o baro Debleste, te sikrell lo, kay kolla leske hi. Kal mare hi peklo yarreha, kay shoutlo yarro dren hi. Kal mare, hoy o baro Debleske anlo venn, hounte venn kerdo dran nevo gib.

Maleachi 3:10

Anenn o deshto kotar halauterestar, hoy dren lan, an miro kheer, te vell doha rhapen an miro kheer. Oun dikenn, hoy me palle t'menge krau: Me krau miri vorhni an o bolepen pre, oun dau t'men boud lačo koova, boudeder har t'men hounte vell. Ko penell o baro Devel, ko ray pral o bolepen oun i phoub.

Maleachi 3:8

Me poučau t'mendar: Hi mishto i menshestar, te čorell lo o Deblestar har t'mer mandar čorenna? Koy pre penenn t'mer: Hoy kram, har čoram toutar? T'mer denn man gar o deshto halauterestar, hoy dren lan, vitar gar kova, hoy hounte dans i rashayende.

4. Mose 18:15

Hako morsh, kay o phoureder čavo peskri datar hi, – pash i menshende, ninna pash i firhende, – koles yon o baro Debleske anenna, hi t'menge. I menshes dess tou pale oun less love leske. Ninna i firho, hoy pale-čiddo hi, dess tou pale oun less love leske.

4. Mose 18:18

Lengro mass hi touke, yaake har ko beč oun koy čači heri, te rhan t'mer kova khetne glan mande.

4. Mose 18:21

Kol Levitaryen dau me ko deshto kotar lauterestar, hoy an o them Israel bares vella. Yon boudrenn ap miro kheer. Doleske lenn yon kova.

Remarja 11:16

Hako bersh vell o djob činlo, oun dell nevo maro. Te denn le i kotar nevo maro o Debleste, hi kova yaake, har te vell o tselo maro o Debleste dino. Yaake hi ninna pash o rouk. Te vas leskro drab o Debleste dino, palle hi ninna leskre kashta o Debleske.

5. Mose 14:22

Hako bersh čivess tou o baro Debleske ap i rig o deshto kotar halauterestar, hoy ap tiri harhetikri phoub bares vas.

5. Mose 18:4

Ninna vell i rashayen hako bersh o nevo djobestar, i nevi molyatar oun o nevo djetestar, hoy t'mer dren anan. Ninna o bakrengro bal, hoy o ersto kopo tele činlo vell, hi lenge.

5. Mose 26:2

palle less tou ko ersto djob, hoy ap tiro phoub bares vas. Oun tou čivess les an i korba oun aness les pash koy platsa, kay yob kamell, te vell lo kote an-mangedo.