Micha 7:12 - O Debleskro Lab 2024 (Sinte-Manouche)

¹² An kol divessa venn t'mare menshe pash t'mende dran o them Assour, oun dran i forya an o them Egiptia, ava, dran o tselo them mank o them Egiptia oun o baro lengsto pani Eufrat, oun yek baro panyestar bis ap o vavar, oun dran i berge, hoy dour krik hi.

O Debleskro Drom 2021 (Sinte)

¹² An kol diwessa wenn tumare menshe pash tumende dran o them Assur, un dran i forja an o them Egiptia, awa, dran o tselo them mank o them Egiptia un o baro lengsto pani Eufrat, un jek baro panjestar bis ap o wawar, un dran i berge, hoi dur krik hi.

Micha 7:12 Iomraidhean Croise

Jesaja 11:11

Oun ap ko dives hadell o Devel peskro vast i douyto kopo, te ginell lo kolen vin, kay peskre menshendar pral ačan an i themma Assour oun Egiptia, Patros, Koush, Elam, Shinar, Hamat, oun an kol panyeskre themma.

Jesaja 11:16

Oun palle dell i drom dran o them Assour vin kolenge, kay leskre menshendar Israel kote djides ačan, yaake har i drom das peskre menshenge ap ko dives, har djan yon dran o them Egiptia vin.

Jesaja 43:6

Ap i rayende pral i themma, hoy hi serves oun čačes toutar, penau: De kay! Ma rike len pale! Anenn mire čaven oun čen foun doural, anenn len dran i palstoune themma i phoubyatar!

Jesaja 49:12

Dikenn, mire menshe venn foun doural: dran i themma, hoy serves oun čačes čiddo hi, oun foun kotar, kay o kham tele djal.

Jeremia 23:3

Oun me lau khetne kolen, kay djido ačan mire menshendar dran i tsele themma, kay tradom len. Me anau len pale khere. Kote djal lenge mishto, oun yon venn pale boud menshe.

Jeremia 3:18

Ap ko dives djan kol menshe dran o kheer Youda pash kol menshende dran o kheer Israel: Oun yon djan khetne khere dran o norden an ko them, hoy dom me t'mare phourende, te ačell kova lengro.

Jeremia 31:8

Ava, me, o baro Devel, anau len dran o them, hoy kote čiddo hi, kay norden hi. Oun anau len khetne dran i tsele themma ap i phoub, ninna kolen, kay korelo, bango oun an vavar koova hi, ninna i terne daya. Kolla lauter hi boud boud menshe, kay venn pale kay.

Jeremia 46:27

Tou, miro boudepaskro Yakob, ma traash! Tou, Israel, ma rob! I dives vell, kay anau tout khere dran vavar themma. Lau tire čaven vin dran ko them, kay le pandles anlo van. O Yakobeskre čave venn pale, oun nay djivenn pale kek kourepah oun kek daryah. Kek te krell lenge traash.

Ezekiel 29:21

An ko tsiro moukau me o kheer Israel pale zoreles te vell. Oun touke, Ezekiel, krau o mouy pre, te rakress mire laba mank lende. Palle dikenn oun hayvenn le, te hom me o baro Devel.

Ezekiel 37:21

Oun pen ap lende: Kava penell o baro Devel, maro ray: Denn yak, me lau i Israelitaryen dran kol tsele themma vin, an kolende yon hounte djan, oun lau len khetne haki rigyatar, oun anau len pale an lengro them.

Hosea 11:11

Ninna dran o them Egiptia venn le trisslepah har čirkle, oun dran o them Assour har taube. Oun me moukau len pale an lengre khera te djivell. Kova penell o baro Devel.