Mateo 8:11 - O Debleskro Lab 2024 (Sinte-Manouche)

¹¹ Boud menshe venna dran boud vavar themma pash o Debleste an o bolepen, oun beshenn pen tele, te rhan le o Abrahameha oun o Isaakeha, oun o Yakobeha khetne.

O Debleskro Drom 2021 (Sinte)

¹¹ Bud menshe wenna dran bud wawar themma pash o Debleste an o bolepen, un beshenn pen tele, te chan le o Abrahameha un o Isaakeha, un o Jakobeha khetne.

Mateo 8:11 Iomraidhean Croise

1. Mose 12:3

Kolla kay penenna, te vell tout boud barht, ap kolende čivau miri barht. Oun kolla, kay penenna, te vell tout bibarht, ap kolende anau ninna bibarht. Koy barht, hoy me tout dau, djal doureder ap i tsele menshende, kay ap i phoub hi.”

1. Mose 22:18

Tou kral, hoy me touke penom. Doleske djal koy barht, hoy dau tire menshende, doureder ap i tsele natsyone, kay ap i phoub hi.”

1. Mose 28:14

Yon venna yaake boud har i čik, hoy ap i phoub hi. Oun krau lengro them baro oun bourhlo ap hake rigya. Oun koy barht, hoy dau toute oun tire čavende, djal doureder ap i tsele menshende, kay ap i phoub hi.

1. Mose 49:10

Hako tsiro vell o baro ray dran o kheer Youda, oun yek leskre menshendar rikrell o rayeskro kasht an o vast yaake rah, bis te vell kova, kay čačepah o baro ray hi. Ap koleste shounenn i natsyone ap i phoub.

Debleskri gili 22:27

Mou rhan i čorvele oun venn čalo! Oun kolla, kay ap o baro Debleste gole denna, mou sharenn les! Lenge te vell i djipen, hoy gar pre-herella!

Debleskri gili 98:3

Yob bistras gar peskro lačepen o khereske Israel, oun rikrell peskro lab, hoy das lo lende. I tseli phoub dikas, har las lo len vin dran o čilačepen.

Jesaja 11:10

Ap ko dives vell i morsh dran o Davideskro kheer, har i tikno rouk dran i draba i tele-dino roukestar, oun vell i sikepen i tsele menshenge ap i phoub. Menshe dran vavar themma poučenn pal leste. Oun leskro foro, kay yob djivell, vell pherdo raylepen.

Jesaja 49:12

Dikenn, mire menshe venn foun doural: dran i themma, hoy serves oun čačes čiddo hi, oun foun kotar, kay o kham tele djal.

Jesaja 49:6

Yob penas: Kova hi gar doha, te hal miro boudepaskro, te čivess o them Israel pale pre, oun aness kolen pale pash mande, kay o Yakobeskre čavendar pral ačan. Na-a, me krau ninna, te vess i momeli i tsele natsyonenge, hoy sikrell halauterenge ap i phoub, kay lau len dran o čilačepen vin.

Jesaja 52:10

Glan i yaka i menshendar an i tsele themma sikrell o baro Devel peskri zoor, kolah yob peskre menshen vin lell dran o pandepen. Ap i tseli phoub dikenn le, har maro Devel peskre menshen khere anell.

Jesaja 59:19

Palle taprell i daar i menshen ap i tseli phoub glan o baro Debleste oun leskro raylepen. Yob vella har i divyo zorelo pani hoy nashella, koles o dourho o baro Deblestar glan peste phourdell.

Jeremia 16:19

Baro Devel, tou deh man zoor oun deh garda ap mande. Pash toute nay vau me oun khatrau man an i bibarht. Dran i tsele themma ap i phoub venn i menshe pash toute, oun penenn: Kol debla mare phourendar hi lauter rhorhepen, či-moldo hi le, oun nay venn gar ap mari rig.

Daniel 2:44

Oun an ko tsiro, kay kol bare raya djivenna, krell o bolepaskro Devel yek them, hoy an kek tsiro paash kerdo nay vell. Kava them vell an kek tsiro vavar menshendar dren lino. Leskro baro ray krell kol vavar rayengre themma paash, oun leskri zoor ačell hako tsireske.

Maleachi 1:11

O baro Devel, ko ray pral o bolepen oun i phoub, penell: Foun kotar, kay o kham pre djala, bis kote kay o kham tele djal, vell miro lab sharedo pash kolende an i vavar themma. An boud gaba oun forya rhačrenn le mange soungepaskro koova oun firhen, hoy hi lačo an mire yaka. Kolla lauter sharenn miro lab.

Mateo 21:41

Penan le ap o Yezouseste: “Yob marell kol čilače morshen. Les khaytenn yon gar. Oun yob dell ko kotar them kol vavarende, kay leske i drake an o čačo tsiro dren anenna.”

Mateo 24:31

Oun yob bičrell peskre bolepangren pral i tseli phoub. Oun kolla phourdenn an i bashepangre, te anenn le dran hako them kolen khetne, kay o Devel peske vin rodas.

Mateo 3:2

Oun yob penas i menshenge: “Moukenn t'maro čilačo drom, oun djan ap o Debleskro drom! O tsiro vell sik, kay lell o Devel i menshen dran o čilačepen vin.”

Mateo 8:10

Har o Yezous kova shounas, kras lo bare yaka, oun penas ap kolende, kay leha djan: “Čačepah, me penau t'menge: Savo patsepen hatsom pash kekeste an o tselo them Israel.

Louka 12:37

Barhtele hi kol boudepangre, kay sovenn gar, te vell lengro ray pale. Me penau t'menge: O ray penell lenge, te beshenn le pen tele, te rhan le. Oun yob pandell peske i damdira trouyel, oun hi lenge koy.

Louka 16:22

O dives vas, kay ko čorvelo meras. Oun i bolepangre anan les an o bolepen, te beshas lo pes pash o Abraham. I tsiro koy pre meras ninna ko bravelo, oun las i shoukar paskepen.

Bičepangre 10:45

Kol patsle biboldenge, kay o Petreha van, ačas o rakepen krik, har yon dikan, kay peras o Debleskro Dourho ninna ap kolende, kay kek bibolde hi.

Bičepangre 11:18

Har yon kova shounan, čingran le bouder gar ap o Petreste. Yon sharan o Debles oun penan: “O Devel sikras ninna kolende peskro drom an o nevo djipen, kay hi kek bibolde. Yon nay moukenn pengro čilačo drom oun venn ap o Debleskro drom.”

Bičepangre 14:22

djan pash i patslende oun dan len zoor an o dji, oun rakran lenge an o dji, te ačenn yon an o patsepen. Oun yon penan ap kol patslende: “Ap maro drom pash o Debleste an o bolepen krenn menge i menshe o djipen phares.”

Bičepangre 14:27

Oun o Paulo oun o Barnabas van kanna pale pale an kava foro. Kote dan le i patslen khetne gole, oun penan lenge, kay o Devel lentsa his, oun har boud koova yob kras, oun har yob ninna kolen, kay kek bibolde hi, pash peste gole das, oun yon ap leskro drom van.

1. Korintarja 15:20

Ko čačepen hi: O Yezous Kristo hi o ersto, koles o Devel i moulendar djido kras.

1. Korintarja 6:9

T'mer hounte djinenn, kolla, kay čilačo koova krenna, venn gar pash o Debleste an o bolepen, oun lenn gar ko lačo koova, hoy o Debles peskre čavenge hi. Ma rhorhenn t'men kokres! Kolla, kay vi-ladjedo koova krenna, venn gar pash o Debleste an o bolepen, vitar gar kolla, kay mangenn vavar koova an har o Debles, vitar gar kol morsha, kay rhorhenn pengri romyat i vavar djouvyah, vitar gar kol djouvya, kay rhorhenn pengro romes i vavar morsheha, vitar gar kol morsha, kay krenn vi-ladjedo koova vavar morshentsa oun čaventsa,

Efesarja 3:6

Yob sikras len, te nay venn ninna kolla o Debleskre čave, kay kek bibolde hi, te djivenn le leha khetne. O lačo lab o Yezous Kristestar hi ninna lenge, yaake har o Devel glan i rah tsiro penas.

Kolossarja 3:11

Kote, kay o Devel i menshen neves kras, kote hi yek yaake boud moldo har o vavar: I bibolde oun kolla, kay kek bibolde hi; kolla, kay ap o mass činlo hi oun kolla, kay gar ap o mass činlo hi; vi-themarya oun divye; raya oun boudepangre. O Yezous Kristo djivell an hakeneste mendar.

2. Tessalonikarja 1:5

Ap kova lauter dikenn t'mer, kay djal o Devel pal o čačepen ap ko dives, kay rakrell lo o čačepen vin pral i menshende. T'mer, kay lan leske boud pharo koova ap t'mende, lell lo pash peste. T'mer han leske moldo, te djivenn leha khetne an o bolepen.