Mateo 6:10 - O Debleskro Lab 2024 (Sinte-Manouche)

¹⁰ Te vell ko tsiro sik, kay tou o ray hal pral i tseli phoub! Te krenn i menshe ap i phoub kova, hoy tou kameh, yaake har ninna kolla an o bolepen krenn, hoy tou kameh!

O Debleskro Drom 2021 (Sinte)

¹⁰ Te well ko tsiro sik, kai tu o rai hal pral i tseli phub! Te krenn i menshe ap i phub kowa, hoi tu kameh, jaake har ninna kolla an o bolepen krenn, hoi tu kameh!

Mateo 6:10 Iomraidhean Croise

Nehemia 9:6

Tou, baro Devel hal kokres o Devel! Tou kral o bolepen oun leskre tsele bolepangre momlia, oun i phoub oun lauter, hoy ap late hi, ninna o baro pani oun lauter, hoy an leste hi. Oun tou kral, te djivell kova lauter. Oun i tsele bolepangre an o bolepen vitsrenn pen tele glan toute.

Debleskri gili 2:6

“Ap i berga Sion, kay mange hi, čivom me i baro rayes, koles me vi-rodom.”

Debleskri gili 40:8

Doleske penom touke: Ake hom. Me krau, hoy mandar činlo hi an o liil:

Jesaja 2:2

Vell i tsiro, koy hi koy berga, kay o baro Debleskro kheer tardo hi, bareder har i tsele vavar berge, oun dikell tele ap i tsele tikne berge. Oun i menshe dran boud themma nashenn pash kay berga,

Jeremia 23:5

Ko dives vella, penell o baro Devel, kay moukau dran o Davideskri familya i morsh bares te vell. Kova hi an o čačepen tardo. Yob vell i lačo baro ray, oun rikrell pes ap o Debleskro čačepen, oun krell hoy mishto oun čačo hi an o them.

Daniel 2:44

Oun an ko tsiro, kay kol bare raya djivenna, krell o bolepaskro Devel yek them, hoy an kek tsiro paash kerdo nay vell. Kava them vell an kek tsiro vavar menshendar dren lino. Leskro baro ray krell kol vavar rayengre themma paash, oun leskri zoor ačell hako tsireske.

Daniel 7:13

Oun me dikom an kava dikepen an i rat yekes, kay vi-dikas har i mensho. Kova vas mank i volke bis pash ko phoureste, oun vas glan leste anlo.

Daniel 7:27

Oun kol tsele themma ap i phoub venn kol menshende o pralstouno Deblestar dino. Oun yon venn i raya pral lende, oun len vell i zoor oun penepaske pral lende. Oun o pralstouno Devel ačell o baro ray hako tsireske. Oun kolla lauter, kay pralstoune hi ap kay phoub, hounte mangenn les an oun hounte shounenn ap leste.”

Zakarie 9:9

Ab barhtelo, tou foro Sion! Denn gole i barhtyatar, t'mer menshe an Yerusalem! Dikenn, t'maro baro ray vella pash t'mende! Yob anell o čačepen, oun vell ap t'mari rig. Yob krell pes gar bares, oun klissell ap i bourika, ava, ap i terni bourika.

Mateo 12:50

Kova, kay krella, hoy miro dad an o bolepen kamella, kova hi miro phraal, oun miri pheen, oun miri day.”

Mateo 16:28

Čačepah, me penau t'menge: Mashkral t'mende hi save menshe, kay merenn gar, bis te dikenn le o Menshengro Čaves, har yob o baro ray hi.

Mateo 26:42

Oun palle djas lo i douyto kopo kote, te mangell lo o Debles. Oun yob penas pale: “Mo dad, tou te kameh gar kol douka oun merepen mandar te lell, palle mouk kova te vell, hoy tou kameh!”

Mateo 3:2

Oun yob penas i menshenge: “Moukenn t'maro čilačo drom, oun djan ap o Debleskro drom! O tsiro vell sik, kay lell o Devel i menshen dran o čilačepen vin.”

Mateo 4:17

Ap ko tsiro penas o Yezous ap i menshende: “Moukenn t'maro čilačo drom, oun djan ap o Debleskro drom! O tsiro vell sik, kay lell o Devel i menshen dran o čilačepen vin.”

Mateo 7:21

Kolen, kay penenn ap mande Ray, ray lell o Devel gar lauter pash peste an o bolepen. Na-a! Kolla kokres, kay krenna, hoy miro dad an o bolepen kamella, kolen lell lo an o bolepen.

Markus 11:10

Sharas o baro rayes, ko čaves maro dadestar David, kay vella an peskri zoor! Sharas o Debles an o bolepen!”

Markus 3:35

Kova, kay krell, hoy o Devel kamella, kova hi miro phraal, miri pheen, oun miri day.”

Louka 19:11

O Yezous his gar dour o forestar Yerusalem, oun i menshe patsan, kay ko tsiro kanna kay hi, kay o Devel sikrella, te hi lo o ray pral i tseli phoub. Koy penas o Yezous lenge laba, kay i khatedo čačepen dren hi,

Louka 19:38

Oun yon penan: “Sharas ko baro rayes, koles o Devel bičras. O Debleskri barht vell pash mende! Baro hi o Debleskro raylepen an o bolepen!”

Louka 22:42

oun mangas o Debles: “Tata, te kameh tou, mouk kek douka ap mande te vell! Kre gar, har me kamau. Kre yaake, har tou kameh!”

Johanni 4:34

Penas o Yezous lenge: “Me djivau kolestar, te krap, hoy o Devel mandar kamella. Oun leskri boudi krau yaake rah, har yob kamella. Doleske bičras man lo ap i phoub.

Johanni 6:40

Kova kamell miro dad: Hakeno, koon o čaves dikella, oun ap leste patsella, lell o djipen, hoy gar pre-herella. Oun me krau les i moulendar djido ap o palstouno dives.”

Johanni 7:17

Koon kova krella, hoy o Devel kamella, kova hayvella, kay mire laba o Deblestar venna, oun gar mandar.

Bičepangre 13:22

Palle čivas o Devel o Saules ap i rig te ačell lo bouder gar baro ray, oun las peske o Davides, oun kras les baro ray. Kolestar penas yob: Me hatsom i morshes, pral leste hom barhtelo. Yob hi o David, koleskro dad hi o Isay. Me rodom o Davides vin, te krell lo lauter, hoy me leske penau.

Bičepangre 21:14

Hako lab, hoy mer ap o Pauleste rakram, his čičeske. Koy penam mer: “Mou te vell kova yaake, har o Devel kamella.”

Bičepangre 22:14

Palle penas lo ap mande: “Ko Devel mare dadendar rodas tout vin, te djiness tou, hoy yob kamella, oun te dikess tou koles, kay hi kek čilačepen an leste, oun shouness, hoy yob penella.

Remarja 12:2

I menshe ap kay phoub djivenn pal pengro shero. Ma djivenn yaake har yon! Moukenn t'men o Deblestar neves te krell, te hayvenn t'mer, hoy yob kamella: kova, hoy hi lačo oun mishto oun čačo.

Efesarja 6:6

Ma krenn koy boudi yaake, te sharenn t'men i menshe! Na-a, krenn koy boudi o Yezous Kristeske, te sharell yob t'men! Yaake han leskre boudepangre, kay o djiyestar krenna, hoy o Devel kamella.

Kolossarja 1:13

Yob las men vin dran i vasta kolestar, kay hi o ray pral o tamlepen oun o čilačepen, te djivas mer khetne peskro Čaveha, koles yob o djiyestar kamella. Kova hi maro ray,

Kolossarja 1:9

Oun har mer kova shounam, mangam o Debles t'menge, oun moukam gar tele, te mangas lestar, te dell lo an t'mende o gosvepen, hoy dell o Debleskro Dourho, te hayvenn t'mer, hoy o Devel kamella.

1. Tessalonikarja 4:3

O Devel kamell, te djivenn t'mer i djoudjo djipen, te sovell kek rom i djouvyah khetne, kay hi gar peskri romni, oun kek djouvel i morsheha, kay hi gar peskro rom.

1. Tessalonikarja 5:18

Parkrenn t'men pash leste pral halauter! Kova kamell o Devel lauterendar, kay djan ap o Yezouseskro drom.

Hebrearja 1:14

I tsele bolepangre hi leskre boudepangre. Kolen bičras o Devel ap i rig kolendar, kay djan ap o Debleskro drom, te lenn le o Debleskro djipen, hoy gar pre-herella.

Hebrearja 10:36

T'mer hounte venn gar khino an t'mare djia, te krenn kova lauter, hoy o Devel kamella! Palle dell lo t'men peskro bravlepen yaake, har yob penas.

Hebrearja 10:7

Koy penom: Dik, mo Devel, kate hom, te krap, hoy tou mandar kameh, yaake har vas mandar glan i rah tsiro an o Debleskro lab činlo.

Hebrearja 13:21

Mangau o Deblestar, te dell lo t'men i zoor, te krenn lauter kova, hoy lačo hi, yaake har yob kamella. Mou dell lo men i zoor, te djivas yaake, har mishto hi glan leskre yaka. O Yezous Kristo nay krell kova. Sharas o Yezous Kristes kanna oun hako tsiro! Amen.

1. Petro 2:15

O Devel kamell, te krenn t'mer o lačepen. Yaake pandenn t'mer kol dinele menshenge o mouy, kay hayvan gar o čačepen oun rakrenn djoungeles pral t'mende.

1. Petro 4:2

Yaake rah, har kava mensho ap kay phoub hi, krell lo kova, hoy o Devel kamella, oun djivell bouder gar pal peskro shero.

Debleskro tsiro 11:15

Oun ko eftato bolepaskro phourdas an peskri phourdepaskri. Koy his i rakepen an o bolepen, oun boud dan bari gole, oun penan: “Kanna hi o Devel oun leskro čavo, o Yezous Kristo, i raya pral i tsele menshende ap i phoub hako tsireske.”

Debleskro tsiro 12:10

Oun me shounom i zorelo rakepen an o bolepen, hoy penas: Kanna las men maro Devel dran o bengeskro vast vin. Maro Devel sikras peskri zoor, oun vas o ray pral i tsele menshende ap i phoub. Oun yob das peskri tseli zoor koles, kay yob vin rodas, te vell lo o baro ray pral halauter. Tele vitsedo hi ko phoukepaskro, kay anas i doosh ap mare phralende glan o Debleste o dives oun i rati.

Debleskro tsiro 19:6

Koy dan boud menshe gole: “Halleluya!” Koy gole his yaake zorelo, har i baro pani gole della, hoy dour tele perella, oun har koy gole, hoy o bolepen krella, te dell baro brishin oun te dell yag tele karye. Oun yon rakran oun penan: “Maro zorelo Devel vas o ray pral halauter.

Debleskro tsiro 20:4

Oun me dikom kolen, kolenge o shero tele dino vas doleske, kay rikran le zoreles ap o Debleskro lab oun sikran i menshende o Yezouseskro drom. Yon mangan gar ko firhes an, vitar gar ko firhes, hoy i menshendar kerdo vas. Oun yon lan gar o firheskro lab ap pengre shere, vitar gar ap pengre vasta. Kalla lauter van kanna djido. Yon hi beshdo ap i rayengre beshepangre, oun lenn i zoor, te rakrenn le o čačepen vin pral i menshende. Khetne o Yezous Kristeha hi le raya yek zero bersh.