Mateo 13:38 - O Debleskro Lab 2024 (Sinte-Manouche)

³⁸ Oun ko kotar them, kolla hi i tsele menshe ap i phoub. Oun o lačo djob, kolla hi kol menshe, kay moukenn o Debles pengro ray te vell. Oun ko djoungelo zenlepen, kolla hi i čilače, pral kolende o beng o ray hi.

O Debleskro Drom 2021 (Sinte)

³⁸ Un ko kotar them, kolla hi i tsele menshe ap i phub. Un o latcho djob, kolla hi kol menshe, kai mukenn o Debles pengro rai te well. Un ko djungelo senlepen, kolla hi i tchilatche, pral kolende o beng o rai hi.

Mateo 13:38 Iomraidhean Croise

1. Mose 3:15

Tou oun koy romni, t'men hi rholi yek ap o vavareste. Ninna tire čaven hi rholi ap lakre čavende. Oun lakre čaven hi rholi ap tire čavende. Yek lakre čavendar stakrell tiro shero khetne. Oun tou dandreh les an leskri heri.”

Debleskri gili 22:30

Ninna i bravele ap kay phoub, kolen hako tsiro boudeder hi har doha rhapaske, hounte vitsrenn pen tele glan leste. Ninna hakeno, kay meras oun pale čik vas, hounte perell ap i čanga glan leste.

Jesaja 53:10

O baro Devel kamas kova yaake, te vas lo phagedo. Yob moukas ap leste douka te vell. Pal kova, kay das lo peskro djipen i doshake i menshendar, dikell lo čaven, kay lestar venna, oun djivell i lengsto djipen. Oun kova, hoy o baro Devel peske glan las, vell lestar kerdo.

Hosea 2:23

An ko tsiro, penell o baro Devel, kamau te shounell: Me shounau, hoy o bolepen mandar mangell, oun o bolepen shounell, hoy i phoub lestar mangell.

Mateo 13:19

Ko djob, hoy peras ap o drom, sikrell t'mende yekes, kay shounas ko lab, te dell les o Devel pash peste gole. Oun yob hayvas ko lab gar. Oun o beng vas, oun las ko lab dran leskro dji vin.

Mateo 24:14

Ap i tseli phoub vell i menshenge ko lačo lab penlo, kay o Devel kamell len dran o čilačepen te lell oun kamell lengro ray te vell. I menshe an hake themma hounte shounenn ko lab. Oun palle vell ko tsiro, kay hi o Devel o ray pral lauterende.

Mateo 5:37

Te penenn t'mer: Ava! yaake hounte vell kova ninna: Ava! Oun te penenn t'mer: Na-a! yaake hounte vell kova ninna: Na-a! Hako lab, hoy pral vergel hi, vell o bengestar.

Mateo 8:12

Oun i biboldendar venna boud an i kali rat vin vitsedo. Oun yon rovenna, oun dandrenn i danda i doukatar khetne.”

Louka 24:47

Oun an peskro lab hounte vell i menshenge an hake themma penlo, te moukenn le pengro čilačo drom, oun djan ap o Debleskro drom, yaake kay lell o Devel lengri doosh lendar krik. Penenn kova i menshenge an o foro Yerusalem, oun palle an i vavar themma!

Johanni 12:24

Čačepah, me penau t'menge: Te vell o djob gar an i phoub oun merell tele, anell lo nay kek nevo djob. Te merell lo tele, anell yob boud nevo djob.

Johanni 8:44

T'maro dad hi o beng. Oun t'mer krenna, hoy t'maro dad ninna kamella. Yob hi yek, kay marell i menshen hako tsiro. Oun yob hi gar an o čačepen tardo. O čačepen hi gar an leste. Te rakrell yob o rhorhepen, vell kova dran leste. Yob hi i rhorheno, oun anas o rhorhepen ap kay phoub.

Bičepangre 13:10

oun penas: “Tou bengeskro čavo! Tou hal pherdo čilačepen. Oun rhorhepen hi an toute. Tou kameh gar o čačepen. Oun moukeh gar tele o Debleskre čače dromma banges te krell.

Remarja 10:18

Kanna poučau t'mendar: Shounan i bibolde ko lab gar? Ava! Yon shounan kova lauter. Yaake hi činlo an o Debleskro lab: Ap i tseli phoub shounan le ko rakepen. An i tsele themma vas ko lab penlo.

Remarja 16:26

Kanna vell ko drom diklo. Ko dromestar činan i Debleskre rakepangre an pengre lila, yaake har o baro Devel kamas. Kova djivella hako tsiro, oun kamas i tsele menshendar ap i phoub, te patsenn le oun shounenn le ap leste.

Remarja 8:17

Gar kokres leskre čave ham mer. Mer lah ninna lestar ko tselo lačepen, hoy les menge hi an o bolepen. Kova lah khetne o Yezous Kristeha. Te venn douka ap mende, yaake har van douka ap o Yezous Kristo, palle krell men o Devel ninna baro oun raylo leha.

Kolossarja 1:6

Kava lačo lab vas gar t'menge kokres penlo. Na-a, kava lab vell ap i tseli phoub penlo. Oun boud oun boudeder menshe venna patsle. Yaake hi ninna pash t'mende: T'mer shounan ko lačo lab, oun hayvan čačepah, kay hi o Devel lačes ap t'mende.

Jakobo 1:18

Yob kamas, te vam mer leskre čave. Kolla vam, har menge leskro čačo lab penlo vas. Yaake vam mer o feteder mank lauter, hoy o Devel kras.

Jakobo 2:5

Shounenn, mire kamle phrala! O Devel rodas kolen vin, kay hi čorvelo ap kay phoub, te venn le bravelo an o patsepen. Ko tsiro vella, kay djivenn le leha khetne an o bolepen oun lenn leskro bravlepen. Kova lenna kolla, kay kamenn les o djiyestar. Yaake penas les o Devel.

1. Petro 1:23

T'mer van neves boldo oun han čave yekestar, kay merell gar. Ko nevo djipen lan t'mer, har patsan ap o Debleskro lab, hoy hi djido oun ačella hako tsiro.

1. Johanni 3:2

Lače phrala oun phenya, kanna ham Debleskre čave. Oun hoy mer vah an ko tsiro, hoy vella, djinah gomme gar. Yek djinah: Ap ko tsiro, kay vell o Yezous Kristo pale, dikah les har yob hi, oun mer vah yaake, har yob hi.

Debleskro tsiro 14:6

Oun me dikom i vavar bolepaskres dour pral ap o bolepen. Kova hounte penas i menshenge o lačo lab, hoy ačella oun gar pre-herella. Yob penas les i tsele menshenge, hoy ap i phoub djivenna, haki natsyona, haki harmenatsyona, hako rakepen, oun an hake themma.