Kolossarja 3:5 - O Debleskro Lab 2024 (Sinte-Manouche)

⁵ Ma krenn bouder kova, hoy kran an t'maro phouro djipen: Ma loubrenn trouyel! Ma krenn djoungelo oun vi-ladjedo koova! Ma moukenn čilačo koova an t'maro shero trouyel te djal! Ma nashenn pal i love! Koon pal i love nashella, koleske hi peskre love har leskro devel.

O Debleskro Drom 2021 (Sinte)

⁵ Ma krenn buder kowa, hoi kran an tumaro phuro djipen: Ma lubrenn trujel! Ma krenn djungelo un wi-ladjedo koowa! Ma mukenn tchilatcho koowa an tumaro shero trujel te djal! Ma nashenn pal i lowe! Koon pal i lowe nashella, koleske hi peskre lowe har leskro dewel.

Kolossarja 3:5 Iomraidhean Croise

2. Mose 37:22

Oun kol bloume oun i moussya hi leha khetne kerdo dran yek kotar lačo sonakay.

Mateo 15:19

Dran o mensheskro dji vell o čilačo koova, hoy an leskro shero trouyel djal. Dran leskro dji vell, te dell lo i vavares moulo. Te rhorhell i morsh peskri romyat, vell kova dran leskro dji. Te rhorhell i djouvel peskro romes, vell kova dran lakro dji. Dran o dji vella o vi-ladjedo koova, o čorepen, o rhorhepen, oun o praasepen.

Remarja 1:26

Doleske moukas o Devel len an vi-ladjedo koova te perell. Lengre djouvya kamenn djouvyen oun kek morshen.

Remarja 1:29

Yon hi pherdo čilačepen, djounglepen, ninna bok pal i love. Yon hi čilačo oun zilverenn, čingrenn, rhorhenn, marenn, oun doukrenn i vavaren. Yon rakrenn djoungeles pral i vavarende,

Remarja 6:13

Denn yak, te krenn či t'mare vastentsa, heryentsa, yakentsa oun mouyentsa, hoy krell o čilačepen ap kay phoub zorleder! Djivenn o tselo djiyeha o Debleske, har save, kay his moulo, oun van pale djido. Krenn kova lauter, hoy krell o lačepen zorleder!

Remarja 6:6

Mer djinah, maro phouro djipen vas leha ap o troushel dino oun meras, te vell o čilačepen bouder gar o ray pral mende.

Remarja 7:23

Oun me nay krau les gar. Me dikau, an mande hi i vavar o ray. Kova pandell man oun moukell man gar te krap, hoy kamau. Kova hi o čilačepen, hoy an mande djivella.

Remarja 7:5

Har djivam maro phouro djipen, vas o čilačepen zoreles an mende. O Moseskre laba, hoy menge penan, hoy te kras mer gar, kol laba kran, te vas o bok pal o čilačepen bares an mende. Yaake kram mer kova, hoy an o merepen anella.

Remarja 8:13

Te djivenn t'mer t'maro phouro djipen, merenn t'mer. Te djivenn t'mer yaake, har o Debleskro Dourho kova kamella, oun penenn na-a ap o čilačepen, hoy an t'maro shero hi, palle djivenna.

1. Korintarja 5:1

Me shounom, te hi pash t'mende i morsh, kay peskri dadeskri romyah sovella. Savo čilačo koova shounom me gomme gar pash kolende, kay gar patslo hi.

1. Korintarja 6:11

Hi menshe mank t'mende, kay kran savo koova. Kanna vas t'mari doosh tele thodo. Oun t'mer van erligo kerdo glan o Debleste, oun han čačo glan leskre yaka. Kova lauter kras maro ray, o Yezous Kristo, oun o Debleskro Dourho t'menge.

1. Korintarja 6:13

O rhapen hi koy, te djal lo an o per. Oun o per hi o rhapaske koy. Vell yek dives, kay krell o Devel, te hi o rhapen oun o per bouder gar koy. O Devel kras men gar, te loubras mer trouyel. Mer ham koy o Yezouseske, maro rayeske. Oun yob hi ninna o ray pral maro mass.

1. Korintarja 6:18

Doleske penau t'menge: Ma loubrenn trouyel! Te kreh tou savo koova, čineh tou touke kokres an o mass. Hako vavar čilačepen kreh tou ap i vavarende. Te loubreh trouyel, kreh tou o čilačepen ap toute.

2. Korintarja 12:21

Me trashau te ladjap man t'menge glan o Debleste ap ko dives, kay vau pale pash t'mende, oun te vell mange ropaske pral boudende, kay kamenn pengro phouro djipen gar pre te dell, oun djivenn an djoungelo oun vi-ladjedo koova oun loubrenn pen trouyel yaake har kran le an ko tsiro, har yon gomme gar patslo his.

Galatarja 5:24

Kolla, kay djivenn o Yezous Kristeha, kolla anan ko tsele čilačo koova, hoy yon kran, pash o Yezouseste. Oun kanna penenn le na-a ap o djoungelo koova, hoy kamell an lengro dji te vell.

Efesarja 4:19

Yon ladjenn bouder gar, te djivenn le i vi-ladjedo djipen, oun rikrenn pen gar pale te krenn le djoungelo koova.

Kolossarja 2:11

Har moukan t'maro phouro djipen pal t'mende, van t'mer o Debleskre menshe. I bibolde van činlo i vastentsa ap pengro mass. T'mer van gar činlo i vastentsa. Na-a! T'mer lan i nevo dji, hoy das t'men o Yezous Kristo.

1. Tessalonikarja 4:3

O Devel kamell, te djivenn t'mer i djoudjo djipen, te sovell kek rom i djouvyah khetne, kay hi gar peskri romni, oun kek djouvel i morsheha, kay hi gar peskro rom.

1. Tessalonikarja 4:5

I rhanč hounte rhal les gar pre, har kova hi pash i menshende, kay prindjrenn o Debles gar.

1. Timoteo 6:10

Koon pal i love hi, perell an hako čilačepen. His menshe koy, kay kaman i love yaake boud, kay peran le o Debleskro dromestar tele, oun doukran pen kokres.

Hebrearja 12:16

Denn garda, te krell kek t'mendar vi-ladjedo koova, vitar gar, te djivell yek har o Esau, koleske o Debleskro lačepen či moldo his! Yob his o phoureder čavo, oun les hi o čačepen, te lell lo peskro dadeskro bravlepen pal koleskro merepen. Vas i dives, kay vas les bok, oun yob bikras ko čačepen, te lell lo i čaro lačo rhapen.

Hebrearja 13:4

Kolla, kay romedino hi, hounte bistrenn gar, te hi yon romedino. O rom hounte vell gar khetne i vavar djouvyah, oun i romni hounte vell gar khetne i vavar morsheha. Djinenn, o Devel dell i phagi kol morshende, kay rhorhenn pengri romyat, oun kol djouvyende, kay rhorhenn pengro romes, ninna lauterende, kay loubrenn trouyel.

Hebrearja 13:5

Ma nashenn i love palla! Kova, hoy tout hi, kova mouk touke doha te vell! O Devel penas: Me bistrau tout gar, oun moukau tout kek tsireske!

Jakobo 4:1

Kay vell o kourepen oun o čingepen mashkral t'mende? Kova vella dran t'mare čilače djia. Hakeno kamell o feteder koova peske kokres.

1. Petro 2:11

Kamle mala, t'mer djinenn, kay han gar khere ap kay phoub. Me mangau t'men, avenn zorelo! Te vell o djoungelo koova an t'mare djia pre, palle penenn: “Na-a!” ap kova oun krenn les gar!

Debleskro tsiro 21:8

Kol vavar djan an i bari yag, hoy zoreles rhačella oun khandella. Kote merenn le o douyto kopo. Yon hi kolla, kay i daryatar gar mantsa djan, kolla, kay phoukran ap pengro patsepen, kolla, kay djoungelo koova kran, kolla, kay maran vavaren, kolla, kay loubran pen trouyel, kolla, kay bengeskro koova kran, kolla, kay mangan vavar koova an har o Debles, oun i tsele rhorhene.

Debleskro tsiro 22:15

Vin hi kolla, kay moukan o Debleskro drom, kolla, kay kran bengeskro koova, kolla, kay loubran trouyel, kolla, kay maran vavaren, kolla, kay mangan vavar koova an har o Debles, oun hakeno, kay kamell oun krell o rhorhepen.