Jesaja 59:6 - O Debleskro Lab 2024 (Sinte-Manouche)

⁶ Kova, hoy t'mer vin krenn, hi čičeske, hi gar boudeder moldo har i ripen kerdo dran i netsa, hoy i spinna kras, oun koleha nay čakreh či tele. Kova hoy t'mer krenn, hi rhorhepen. T'mare vastentsa doukenn oun marenn t'mer.

O Debleskro Drom 2021 (Sinte)

⁶ Kowa, hoi tumer win krenn, hi tchitcheske, hi gar budeder moldo har i ripen kerdo dran i netsa, hoi i spinna kras, un koleha nai tchakreh tchi tele. Kowa hoi tumer krenn, hi chochepen. Tumare wastentsa dukenn un marenn tumer.

Jesaja 59:6 Iomraidhean Croise

1. Mose 6:11

Oun i phoub his bouder gar lačo glan o Debleskre yaka. I menshe kran, kay his i phoub pherdo čilačepen oun midjak koova. Har o Devel ap i phoub dikas, dikas lo, te djan i tsele menshe ap i čilačo drom.

Hiob 16:17

Yaake hi kova, ninna te krom kek čilačepen, oun mangom miro Debles i djoudjo djiyeha an.

Debleskri gili 55:11

hoy kolla krenn, kay djan hako dives oun haki rat trouyel pral ap i barra, hoy djan troul o foro. Oun an o foro hi bibarht oun čorvlepen.

Debleskri gili 58:2

T'mer zorele, rakrenn t'mer čačepah o čačepen vin pral i menshende? Denn t'mer hakeneste peskro čačepen?

Jesaja 30:1

O baro Devel penell: Djungeles djal mire čavenge, kay mandar tele peran, oun kay penge kova glan lan, te krenn le hoy gar mandar vin djas. Yon čivenn pen vavarentsa khetne, har me kova gar kamau. Oun yaake anenn pale te pale le doosh ap pende.

Jesaja 5:7

O kheer Israel hi o drakengro them o baro Deblestar, ko rayestar pral o bolepen oun i phoub. Oun i morsha an o them Youda hi kol drakengre rouka, hoy yob an i phoub čivas oun pral kolende yob barhtelo his. Ap lende dikas lo, te anenn le o lačepen glan. Oun hoy vas, his čilačepen. Yon te dans hakenes peskro čačepen, oun kran, hoy his či har čilačepen.

Jesaja 57:12

Kanna sikrau me, hoy kova moldo hi, hoy tou čačo koova khareh. Ko tselo koova, hoy tou kral, hi touke gar mishto.

Jesaja 58:4

Ap ko dives, kay rhan mange či, čingrenn t'men oun kourenn t'men, oun denn i čilačo vasteha dren. An kava tsiro, kay rhan mange či oun krenn savo čilačo koova, nay venn t'mer gar shounlo an o bolepen.

Jesaja 64:6

Oun koy hi kek, kay tiro lab an-gole dell, kek, kay vell pash toute, te rikrell lo pes ap toute. Čačepah, tou kameh bouder či mendar te djinell, oun moukeh men tapedo an maro čilačepen.

Jeremia 6:7

Yaake har dran i brounna o pani vella, yaake vell dran o foro o čilačepen. I gole kolendar, kay venn zoryah tele rikedo oun doukedo, shounau. Menshe lenn glan mande dava oun venn maredo.

Ezekiel 18:12

oun rikrell i čorvelen zoryah tele, ninna kolen, kolen gar doha djipaske hi, oun lell zoryah peske, hoy gar leskro hi. Te patsas lo love vin, dell lo kova gar pale, hoy das les ko čorvelo ko tsireske, kay les siyaan pash leste hi. Oun yob mangell i rhorhene deblen an, oun krell, hoy glan o Debleske yaka djoungeles hi.

Ezekiel 7:11

Kolla, kay djan čilačes i vavarentsa trouyel, van čilače raya. Či ačell lendar pral. Lengro bravlepen ačell gar, vitar gar lengro raylepen oun an-dikepen.

Ezekiel 7:23

Kre i shello! O tselo them hi pherdo kolendar, kay lan rateskri doosh ap pende. Oun o foro hi pherdo kolentsa, kay rikran i vavaren i zoryah tele.

Ezekiel 9:9

Oun yob penas ap mande: I doosh, hoy i menshe dran o kheer Israel oun dran o kheer Youda ap pende anan, hi yaake boud. Boud marepen hi an o them. Oun an o foro rikrenn i zorele i vavaren zoryah tele. Oun yon penenn: “O baro Devel djas peske dran kava them. Yob dikell men gar!”

Amos 3:10

Yon dikenn gar ap o čačepen, penell o baro Devel. Yon lenn penge bravlepen khetne an pengre khera, hoy čoran le oun lan le zoryah i vavarendar krik.

Amos 6:3

T'mer patsenn, kay hi o čilačo dives dour krik t'mendar. Djinenn: Kova, hoy krenn, moukell ko dives sikeder te vell, kay čilače raya pral t'mende venn.

Micha 2:8

T'mer hadenn pen pral mire menshende! Te djal yek kek daryah ap o drom, tserdenn t'mer leske i baya oun o gad tele, har lourde, kay venn dran o kourepen.

Micha 6:12

I bravele an o foro lenn i čorvelen vin, oun rikrenn len tele. Oun t'mer halauter an o foro han rhorhene oun rakrenn rhorhepen.

Zefanja 1:9

Ninna dau kolen i phagi, kay stenn an o voudar dren, te stakrenn le gar ap o kasht tel o voudar. Ninna kolen dau i phagi, kay anenn an pengro rayeskro kheer savo koova, hoy lan le rhorhepah oun čorepah.

Zefanja 3:1

Djungeles djal ko foreske, kay hadas pes pral o baro Debleste, ko foreske, an koleste čilačepen oun marepen hi!

Maleachi 2:16

Kova kay rhoyrell pes pral peskri romni, oun tradell lat krik, krell i baro djoungelo koova, penell o baro Devel, ko ray pral o bolepen oun i phoub. Doleske denn yak an t'mare djia: Ma phagenn ko lab, hoy lake dan, har penan: Me moukau tout gar.