Jesaja 57:5 - O Debleskro Lab 2024 (Sinte-Manouche)

⁵ Tel hako baro rouk loubrenn t'mer trouyel, te sharenn i rhorhene deblen! Oun an i tala mank i bare barra marenn t'mer lenge t'mare čaven, har te vans le firhe.

O Debleskro Drom 2021 (Sinte)

⁵ Tel hako baro ruk lubrenn tumer trujel, te sharenn i chochene deblen! Un an i tala mank i bare barra marenn tumer lenge tumare tchawen, har te wans le vieche.

Jesaja 57:5 Iomraidhean Croise

1. Rajengro liil 14:23

Ap i tsele berge oun tel hako baro rouk kran le penge moulne platse, čivan bare barra pre lengre rhorhene deblenge, ninna figure, hoy i debletsa Ashera sikrenn.

2. Rajengro liil 17:10

Oun ap haki berga oun tel hako baro rouk čivan le bare barra pre pengre deblenge, ninna figure, kay i debletsa Ashera sikrenn.

2. Rajengro liil 17:7

Kava koova vas ap i Israelende doleske, kay djan yon gar ko drom o baro Deblestar, kay lengro Devel hi, oun len vin las dran o them Egiptia, dran o vast o Faraestar, ko rayestar pral o them Egiptia. Oun yon mangan vavar deblen an,

2. Rajengro liil 23:10

O Yosia kras ninna koy platsa pale-čiddo, hoy kharella Tofet, oun hi an i tala Hinnom čiddo. Kova kras lo, te nay rhačrell kek peskro čaves vitar gar peskri čay an i yag o rhorheno debleske Molok.

2. Familjakro liil 28:3

oun rhačras soungepaskro koova an i tala, hoy kharell Ben-Hinnom. Ninna rhačras lo peskre čaven i rhorhene deblenge. Yaake kras lo savo djoungelo koova, har i menshe an vavar themma kran, – save menshe har kolla, kay o baro Devel glan i Israelende dran o them tradas.

2. Mose 32:6

Oun yon stan taysarlakro pre oun maran firhen, oun rhačran len ko debleske, hoy kran le penge. Ninna vavar firhen anan le pashel, te rhan le len khetne. Oun yon beshan pen, te rhan le oun te piyenn le. Oun yon stan pre oun khelan.

Jesaja 1:29

T'mer, kay mangan i bare rouka an, hounte ladjenn t'men koleske. Ava, t'mer venna lolo an o mouy dran ladj pral kol vavar deblen, hoy rodan vin oun mangan len an ap lengre shoukar platse.

Jeremia 17:2

Ninna lengre čave vitsrenn pen tele glan kol rhačepangren oun glan kol figuren, hoy sikrenn i debletsa Ashera, oun hoy le pre čivan tel kol zenele rouka, oun ap i tikne oun bare berge oun ap o them. Me dau t'maro tselo bravlepen oun kouč koova vavarende, te čorenn le kova t'mendar. Koya hi koy phagi ko čilačepaske, hoy t'mer an kava tselo them kran.

Jeremia 2:20

O baro Devel penell: Hako tsiro hadal tout pral mande, oun kamal mange gar palla te djal. Tou penal: Me kamau kek ray pral mande. Oun čival tout koy har i loubni ap i berga tel hako zenelo rouk.

Jeremia 3:13

Tou hounte kress či, har te dikess dren, kay anal doosh ap toute, har hadal tout pre pral o baro Debleste, kay tiro Devel hi. Tou nashal kay te koy trouyel, te mangess vavar deblen an tel hake zenele rouka, oun shounal gar ap mire laba, penell o baro Devel.

Jeremia 3:6

An ko tsiro, kay o Yosia o baro ray his, penas o baro Devel ap mande: Dikal tou, hoy i Israelitarya kran? Yon hi har i djouvel, kay moukas peskro romes, oun djas ap kol tsele berge oun tel hake zenele rouka oun das pes trouyel vavar morshentsa.

Jeremia 32:35

Oun yon kran moulne platse o rhorheno debleske, o Baaleske an o telstouno them, kay kharella Ben-Hinnom, te nay moukenn le pengre čaven oun čen o debleske Molok an i yag te djal. Savo koova penom me lenge gar. Oun an kek tsiro vas mange kova an miro shero dren, te poučoms savo koova lendar. Har yon savo djoungelo koova kran, anan le i doosh ap o tselo them Youda.

Jeremia 50:38

O brishin te vell pale rikedo, te nashenn kek panya bouder an o them! O them Babilonia hi pherdo moule debla, oun lengro patsepen ap kal čilače moule debla kras i menshen narvelo.

Jeremia 51:7

O foro Babilon his har i sonakaskro khoro an o baro Debleskro vast, i khoro, hoy pherdi mool his, kolestar i menshe an i tsele themma piyan oun mato van. Doleske van yon yaake narvelo.

Jeremia 7:31

Oun kran an koy tala Ben Hinnom i rhačepaskri, hoy kharell Tofet, te rhačrenn yon pengre čaven oun čen. Savo koova penom me lenge gar. Oun kova vas mange gar an o shero.

Ezekiel 16:20

Tire čave oun ča, kay hi mire čave, kolen lal tou oun dal len lenge moulo, te rhan le len pre. His touke gar doha, te moukal man?

Ezekiel 20:26

Oun har moukan le pengre phoureder morsh čaven i rhorhene deblenge te rhačrell, rakrom pral lende vin: “T'mer han mange pale-čiddo.” Yaake kamom len bari daar te krell, te hayvenn le, te hom me o baro Devel.

Ezekiel 20:28

Har me len an o them anom, kolestar man sovel dom, te dap les lende, mangan le vavar deblen an. Hako kopo, kay dikan le i tikni berga oder i baro rouk boud patyentsa, rhačran le firhen i rhorhene deblenge, oun kran man rhoyedo koleha, hoy le lenge anan. Yon rhačran soungepaskro koova lenge, oun čoran mool vin lenge.

Ezekiel 20:31

Bis ap kava dives rhačrenn t'mer firhen kol rhorhene deblenge, oun krenn t'men yaake pale-čiddo. Ninna rhačrenn lenge t'mare čave. Oun me moukap man t'mendar dran o kheer Israel, te poučell? Pash miro djipen, penell o baro Devel, maro ray, dau man sovel, te moukau man gar t'mendar te poučell!

Ezekiel 6:13

Palle hi i moulo-dine čiddo mashkral pengre rhorhene deblende, oun troul lengre rhačepangre trouyel ap haki tikni oun bari berga, oun tel hako baro rouk boud patyentsa, oun tel hake vavar zenele rouka, kay mangan le pengre rhorhene deblen an, oun rhačran lenge lačo soungepaskro koova. Oun t'mer dikenn oun hayvenn, te hom me o baro Devel.

3. Mose 18:21

Tou rhačress kek tire čavendar o rhorheno debleske Molok. Sau koova sikrals, te hom me, tiro Devel, touke či moldo. Me hom o baro Devel!

4. Mose 25:6

Oun i tsele Israelitarya his čiddo o ropah glan o Debleskro plarhteno kheer. Koy anas i morsh dran Israel i Midianetsa an o plarhteno kheer peskri familyatar. Oun o Mose oun i tsele israelitarya dikan kova.

5. Mose 12:2

Te vas ko tsiro, kay lan t'mer ko them dren oun tradan kol vavar menshen vin, palle denn kol tsele platse paash, kay yon pengre deblen an-mangan, ap i bare oun tikne berge, ninna tel bare zenele rouka.

Debleskro tsiro 18:3

I Babilon tserdas i menshen an hake themma an bipandlo oun vi-ladjedo koova. Kova his har mool, hoy i menshe piyan. Oun i bare raya ap kay phoub čivan pen lah khetne. Oun i bikepangre oun i parepangre van bravelo dran lakro bravlepen.”