Jesaja 42:11 - O Debleskro Lab 2024 (Sinte-Manouche)

¹¹ Givenn i bari golyah, t'mer an i forya an i moule tate themma, oun t'mer menshe dran Kedar, kay an i gaba djivenn! Givenn bari golyah, t'mer, kay an o foro Sela djivenn! Denn gole i barhtyatar, t'mer, kay pral ap i berge djivenn!

O Debleskro Drom 2021 (Sinte)

¹¹ Giwenn i bari goljah, tumer an i forja an i mule tate themma, un tumer menshe dran Kedar, kai an i gaba djiwenn! Giwenn bari goljah, tumer, kai an o foro Sela djiwenn! Denn gole i bachtjatar, tumer, kai pral ap i berge djiwenn!

Jesaja 42:11 Iomraidhean Croise

1. Mose 25:23

O baro Devel penas ap late: “Tou veh i day douy čavendar. Kol douyendar venna boud menshe, yaake boud, kay hakenestar yek natsyona vella. Ko terneder vell zorleder har ko phoureder oun vell o ray pral leste.”

Debleskri gili 120:5

Havi bibarht hi mange, te hounte djivap mank i vi-themarya, pash i menshende, kay prindjrenn gar miro Debles.

Jesaja 12:5

Givenn gilya o baro Debleske! Raylo koova kras lo. Hakeno ap i phoub te shounell lestar.

Jesaja 16:1

Bičrenn bakre dran Sela an o moulo tato them pash o rayeste an o them Youda ap i berga Sion!

Jesaja 21:16

Yaake rakras o baro Devel, maro ray, ap mande: An yek bersh – kek dives sikeder oun kek dives palla – vell o tselo raylepen dran o them Kedar krik lino.

Jesaja 32:16

Oun an o tselo them djivenn le pal o Debleskre čačepaskre laba, oun an o moulo tato them har an o lačo them krenn le, hoy čačo hi.

Jesaja 35:1

Barhteles vell ko them, hoy kanna tato oun moulo hi. Oun o divyo trouk them sal, oun lauter an leste djivell pre oun anell bloume vin.

Jesaja 35:6

Oun har i vesheskri bouzni stell kova, kay nay nashas gar. Oun kova, kay nay rakras gar, rakrell nay oun dell gole i barhtyatar. An o moulo tato them vell pani vin dran i phoub. Oun an o divyo trouk them nashenn lengste panya.

Jesaja 40:3

Shounenn! Koy dell yek gole: “Krenn o baro Debleske o drom an o moulo tato them, te nay vell lo pash i menshende! Lenn halauter krik, hoy maro Debleske an o drom čiddo hi!

Jesaja 43:19

Dik, me krau nevo koova! Kanna vell kova! Hayvenn oun dikenn les gar? Ava, me krau i drom an o moulo them, oun moukau bare zorele panya te nashell an o tato them.

Jesaja 52:7

Har shoukar hi, te vell kova pral i berge, kay penell menge lačo nevo koova, oun penell: Hi bouder kek kourepen. I lačo tsiro vas. T'mer han bouder gar pandlo. Oun ap mende an Sion penell lo: Tiro Devel hi o baro ray!

Jesaja 60:7

I tsele bakre dran Kedar oun Nebayot venn anlo pash toute, te venn le maredo oun rhačedo o baro Debleske, te dikell lo lačes ap toute. Oun yaake krell o baro Devel peskro raylo kheer gomme shoukeder.

Jeremia 21:13

Denn yak, penell o baro Devel: Kanna vau me pral t'mende, kay djivenn pral i tala ap ko baro bar. T'mer penenn: Kek nay vell pral mende. Kek nay vell an maro kheer.

Jeremia 48:28

T'mer menshe an o them Moab, nashenn vin dran t'mare forya, oun djivenn mank i bare barra! Oun krenn les har i taube, kay krenn pengre khera kote, kay i barra dour tele djan.

Jeremia 49:31

Me, o baro Devel, penom ap i Babilonarya: Djan pre an o kourepen! Kourenn t'men i menshentsa, kay djivenn kek daryah an pengro them, oun kolenge kek čilačepen kamell. Yon djivenn kokres, oun lengre forya, len hi kek massurya, vitar kek voudya.

Ezekiel 27:21

I menshe dran Arabia oun i raya dran o them Kedar paran touha oun dan tout bakre oun bouzya.

Obadja 1:3

Tiro zorelo foro hi tardo ap i bare barra, tou djiveh pral an i berge. Doleske phourdal tou tout pre. Dik, tiro dji rhorhras tout, har lo touke dren rakras: Kek nay vitsrell tout tele ap i phoub.