Jesaja 40:2 - O Debleskro Lab 2024 (Sinte-Manouche)

² “Rakrenn i menshenge an Yerusalem an o dji, oun penenn lenge: Ko tsiro hi trouyel, kay hounte boudran tel douka oun dava. T'mari tseli doosh hi playsedo. O baro Devel das t'men i phagi, hoy his yaake baro, har te lans douy kope i phagi t'maro tselo čilačepaske.”

O Debleskro Drom 2021 (Sinte)

² “Rakrenn i menshenge an Jerusalem an o dji, un penenn lenge: Ko tsiro hi trujel, kai hunte budran tel duka un dawa. Tumari tseli doosh hi plaissedo. O baro Dewel das tumen i phagi, hoi his jaake baro, har te lans dui kope i phagi tumaro tselo tchilatchepaske.”

Jesaja 40:2 Iomraidhean Croise

1. Mose 34:3

Oun yob kamas lat o djiyestar oun rakras lače labentsa ap late.

2. Familjakro liil 30:22

Oun o Hiskiya rakras kamles ap i tsele Levitarya, kay kran le pengri boudi mishto glan o baro Debleste. Efta divessa kran i Israelitarya ko festo. Oun khetne rhan le ko mass kol firhendar, hoy dan le o baro Debleste, oun parkran pen pash leste, ko Devel lengre phourendar.

Debleskri gili 32:1

Laba o Davidestar. Barhtelo hi kova, koleske o čilačepen, hoy ap leste his, krik lino hi, oun leskri doosh bistedo hi.

Debleskri gili 85:3

Tou lal o čilačepen, hoy tire menshe kran, lendar krik! Lengri tseli doosh bistral tou.

2. Mose 22:3

Te čoras lo i firho, – i groumni, i bourika, i bakro, – oun kova vell djides pash leste hatslo, palle hounte dell lo douy kope yaake boud pale.

Sikepaskro 3:4

O ropaske hi yek tsiro, oun o sapaske hi yek tsiro. Dell tsirya, kay rovell maro dji, oun vavar tsirya, kay khelah i barhtyatar.

Jesaja 12:1

I dives vella, kay i menshe an Yerusalem givenna: Me sharau tout, baro Devel! Ava, tou hals rhoyedo ap mande. Kanna hal bouder gar rhoyedo oun rakreh lačes mantsa.

Jesaja 14:3

Oun an ko tsiro lell o baro Devel i Israelitaryen vin dran lengre douka oun lengro ropen oun lengri phari boudi, hoy yon hounte kran.

Jesaja 27:9

Yaake vell o Israelengri doosh krik lino. Oun ap kova sikrell pes, te hi lengri doosh krik lino: Te denn le i pre-čidde barra yaake khetne, kay mangan le i vavar deblen an, te ačell či har čik. Oun te moukenn le kek figure tardo, hoy sikrenn i debletsa Ashera, vitar kek boba, kay lake soungepaskro koova rhačedo vas.

Jesaja 33:24

Oun kek mensho, kay kote djivell, penell bouder: “An mande hi kek zoor.” Oun kol menshe, kay an kava foro djivenn, kolenge hi pengri phagi krik lino.

Jesaja 35:4

Penenn ap kolende, kolen i dareno dji hi: Avenn zorelo! Oun ma darenn! Dikenn, kote hi t'maro Devel! Yob vell, te dell lo t'men t'maro čačepen oun i phagi kolende, kay kran t'menge čilačepen. Yob vell oun lell t'men dran lengre vasta vin.

Jesaja 43:25

Kova hom me, kay thovau o čilačepen toutar tele. Me kokres hom kova, kay nay krell les. Oun bistrau koy doosh, hoy tou ap toute lal.

Jesaja 44:22

Ko čilačo koova, hoy tou kral, lom toutar krik, te hi lo gar bouder. Yaake har i nebla, har i folka krik phourdedo vell, yaake phourdom koy doosh krik, hoy ap toute his. Ab pale pash mande, me playsrom touke, te vess miro.

Jesaja 49:25

Kava hi kova, hoy vell, penell o baro Devel: Ninna ko zorelo morsheske venn leskre pandlen krik lino. Oun kolen, hoy ko zorelo ray randas, venn leske krik tserdedo. Kolla, kay kourenn pen touha, kolentsa kourau me man, oun tire čaven lau dran lengre vasta vin.

Jesaja 51:17

Ste pre! Ste pre! Hade tout, Yerusalem! Tou piyal dran o baro Debleskro khoro, hoy his pherdi leskri rholi. Tou hounte piyal ko khoro vin, bis te či bouder an leste his. Kolestar val har yek, kay hi mato, oun nay vell bouder gar tardo ap peskre herya.

Jesaja 53:5

Mari doosh his kova, kolake yob doukedo vas. Oun koleske, hoy mer čilačes kram, vas yob khetne dino. I phagi his ap leste čiddo, te djas menge mishto. Yob vas doukedo, te vas mer sasto.

Jesaja 53:6

Mer halauter hams har bakre, kay nashan pen. Hakeno djas ap peskro drom. O baro Devel moukas ap leste mari tseli doosh te perell.

Jesaja 54:15

Dik, ninna te djan le ap toute pre, vell kova gar mandar. Koon kourell pes touha, kova vell dino oun perell.

Jesaja 54:17

Kek rharo, hoy kerdo vas, te dell lo tout moulo, nay doukrell tout. Oun hako kopo, kay yek čomone ap toute pre anell, nay sikreh tou, kay yob rhorhras. Kova krau kolenge, kay mange boudrenn. Oun me sikrau, te hi yon an o čačepen, penell o baro Devel.

Jesaja 55:7

Koon kamas či o Deblestar te djinell, kova te djal kanna peskro čilačo dromestar tele! Oun kova, kay čilačo koova an peskro shero hi, yob te moukell savo koova, oun vell pale pash maro baro Debleste, yaake te krell yob peskro dji leske pre, oun lell leskri doosh krik.

Jesaja 6:7

Oun ko kasht, hoy rhačell, rikras lo ap miro mouy, oun penas: “Dik kava vas ap tiro mouy, oun yaake hounte djas tiri doosh toutar krik, oun ko čilačepen, hoy tou kral, hi toutar krik lino.”

Jesaja 61:7

T'mer hidjran bari ladj oun praasepen, doleske lenn t'mer kanna i baro them oun i barht, hoy ačella hako tsireske.

Jesaja 66:13

Ava, yaake har i day peskro čaveske i sva tele khossell, yaake krau me les t'mentsa, oun khossau t'mare sva tele an o foro Yerusalem.

Jeremia 16:18

Yon lenn mandar pengri tseli phagi lengri doshake oun ko čilačepaske, hoy yon kran. Me moukau lenge či. Yon kran miro them pengre moule deblentsa pale-čiddo. Ko them, hoy mange vin rodom, hi pherdo ko koveha, hoy djoungelo glan mire yaka hi.

Jeremia 17:18

Mouk ladj pral kolende te vell, kay man palla lenn, oun gar pral mande! Yon hounte trashenn pen, oun gar me! Mouk ko dives te vell, kay vell koy bibarht ap lende! Oun phage len an kotya!

Jeremia 29:11

Djinau mishto, hoy man t'menge an o shero hi: lačo koova oun gar čilačo koova, te djal t'menge yaake har t'mer kamenna.

Jeremia 51:10

[I Israelitarya penenn:] O baro Devel sikras, kay ham an o čačepen tardo. Avenn, te djas ap i berga Sion, te penas, hoy maro baro Devel lačo koova kras.

Ropaskre gilja 4:22

T'mer an o foro Sion, palle hi t'mari doosh t'mendar krik lino! O baro Devel moukell t'men bouder gar pandles krik te anell. Palle anell yob t'mari doosh, t'mer Edomarya, ap t'mare sherya pale, oun čakrell ko čilačo koova pre, hoy kran.

Ezekiel 16:42

Palle djal miri tati rholi pral toute krik, oun miro dji doukrell man bouder gar, oun hom bouder gar rhoyedo pral toute.

Daniel 11:35

Oun mank kol goseve hi save, kay venn maredo, te venn boud vavar zoreles an o patsepen, oun lengre djia djoudjo kerdo o Debleske. Kova djal yaake yek tsireske, bis ko dives vella, kay o tsiro kay phoubyake trouyel hi.

Daniel 12:4

Oun tou Daniel, rike kava lab khatemen. Oun pande i dori troul kava liil oun čip tiro sikepen pre, te nay krell les kek pre, bis ko tsiro vella, kay i phoub bouder gar rah koy hi. Palle rodenn boud koy dren oun hayvenn boud oun boudeder.

Daniel 12:9

Oun yob penas: “Dja koy, Daniel! Kal laba ačenn khatedo oun dre-pandlo, bis te vell ko tsiro, kay i phoub bouder gar rah koy hi.

Daniel 9:12

Oun tou rikral tiro lab oun anal kova, hoy penal, pral mende oun pral mare čačepangre morshende, hoy menge o čačepen vin krenn. Koy bibarht, hoy moukal pral mende te vell, his yaake baro, te vas tel o tselo bolepen sau koova gar diklo har kova, hoy an o foro Yerusalem djas.

Daniel 9:2

An kava ersto bersh, kay yob kote o baro ray his, dom me, o Daniel, yak ap kova, hoy an o Debleskre lila činlo hi, kote kay penell o baro Devel ap peskro rakepaskro, o Yeremia, te ačell o foro Yerusalem 70 (efta-deesh) bersha khetne dino čiddo.

Hosea 2:14

Me krau lakre drakengre rouka paash, ninna lakre faygetikre rouka, kolendar yoy penas: “Kolentsa playsran man mire pirne.” Me krau i divyo veesh dran lende. Oun kol roukengre, hoy pral ačenn, rhan i divye firhe.

Hosea 2:16

Doleske dik, me kamau lat te tserdell, oun kamau lat an o moulo tato them te anell. Oun kote rakrau kamles lah.

Habakuk 2:3

Ko tsiro hi kanna gar koy, te vell kova yaake, hoy sikrom touke. Kova vell čačo ap peskro tsiro. Tou nay djineh čačepah, kay kova yaake vella. An kal laba hi kek rhorhepen. Ninna te vell kova gar yaake sik, de yak, te vell kova. Hi čačo, hoy penau: Kova vella oun ačell gar krik.

Zefanja 3:15

O baro Devel las t'mari phagi t'mendar krik, oun tradas kolen krik, kay rikran t'men tele. O baro Devel hi o baro ray pral Israel, oun hi pash t'mende. T'mer hounte trashenn bouder kek bibarht.

Zakarie 1:13

Oun o baro Devel rakras lače oun kamle laba ap peskro bolepaskro.

Zakarie 1:15

oun man hi i bari rholi pral i pre-phourde themma. Miri rholi ap mire menshende his gar yaake baro, har kova, hoy kol vavar themma lentsa kran.”

Zakarie 9:12

T'mer pandle, avenn pale khere an ko zorelo foro, t'mer, kay djinenn: Mer ačah gar hako tsireske pandle. Kava dives penau t'menge: Me dau t'mende douy kope yaake boud lačepen har kol douka, hoy hounte lan ap t'mende.

Bičepangre 1:7

Koy penas o Yezous: “O tsiro, kay o dad kova krella, hi leskro koova. T'mer hounte djinenn kova gar.

Galatarja 4:4

Har ko čačo tsiro vas, bičras o Devel peskro čaves. Kova vas i mensho, oun pandlo ap o Moseskre laba.

Debleskro tsiro 18:6

Krenn ap late yaake, har yoy ap t'mende kras! Denn lat douy kope yaake boud čilačepen pale, har yoy ap t'mende kras! Denn lat i pipen te piyell, hoy hi douy kope zorleder har kova, hoy yoy das t'mende te piyell!