Jesaja 13:3 - O Debleskro Lab 2024 (Sinte-Manouche)

³ Me, o baro Devel, dom mire zorele kourepangren khetne gole. Kolla, kay hadenn man barhteli golyah, čivom mange ap i rig, te anenn le miri rholi pral lende.

O Debleskro Drom 2021 (Sinte)

³ Me, o baro Dewel, dom mire sorele kurepangren khetne gole. Kolla, kai hadenn man bachteli goljah, tchiwom mange ap i rig, te anenn le miri choli pral lende.

Jesaja 13:3 Iomraidhean Croise

Debleskri gili 149:2

Tou Israel, tiro dji mou bashrell pral koleste, kay kras tout. T'mer menshe dran Sion, givenn i barhtyatar pral t'maro baro rayeste.

Jesaja 23:11

O baro Devel hadas peskro vast pral o baro pani vin, oun anas traash pral i tsele rayengre themma. Yob penas zoreles, te venn i zorele barrengre khera an o them Kanaan paash dino.

Jesaja 5:26

Oun yob bičrell i sikepen i menshenge an i them, hoy dour krik hi. Oun yob sholell, te venn le dran o palstouno i phoubyatar. Dik, kote venn le – yaake sik har djala!

Jeremia 25:9

Doleske moukau kol lourden te vell dran i themma, kay kote čiddo hi, kay norden hi. Lengro pralstouno hi o baro ray, o Neboukadnezar, dran o them Babilonia. Koles rodom vin, te krell yob, hoy kamau. Kolla perenn pral t'mende oun t'maro them, ninna pral kol tsele themma kay trouyel. Kal themma moukau yaake paash te dell, te ačell či har barra pral hako tsireske. Oun i vavar menshenge, kay kova dikenn, ačell o rakepen krik i trashatar, oun yon denn i vasta pral o shero khetne.

Jeremia 51:46

Te shounenn t'mer, hoy an o them rakedo vell, nay darans t'mer, oun nay nashrans t'mare djia pengri zoor. Hako bersh vell vavar djoungelo koova rakedo: Bari zoryah djan le ap i tiknende an kava them, oun yek ray djal ap o vavareste.

Jeremia 51:53

Ninna te stakrals o foro Babilon pral an o bolepen, oun te krans le pengre massurya yaake baro, te nay stakrals kek pral vergel, bičrau me marepangre, kay venn pral lende. Kova penell o baro Devel.

Zefanja 1:7

Ma rakrenn či, te venn glan o baro Debleste, maro rayeste! Ko dives vell sik, kay vell o baro Debleskri rholi pral i menshende. Kava dives hi har i marepaskro dives, kay firhen maredo venn o Debleske oun i rhapen kerdo vell. O baro Devel kras ko rhapen oun das menshen khetne gole, te venn le pash o rhapen.

Debleskro tsiro 18:20

Avenn barhtelo, t'mer, kay djivenn an o bolepen! O baro foro hi paash! Avenn barhtelo, t'mer Debleskre menshe! Avenn barhtelo t'mer, kay han o Yezouseskre bičepangre, ninna t'mer, kay han o Debleskre rakepangre! Kova, hoy o foro čilačes kras ap t'mende, das o Devel ko fores pale.