Jesaja 10:22 - O Debleskro Lab 2024 (Sinte-Manouche)

²² Ninna te vans i Israelitarya yaake boud har i santa pash o baro pani, gar boud lendar ačenn pral, oun venn pale pale ap o Debleskro drom. O merepen vell boudenge. Kova hi i vi-kerdo koova. Yaake vell o čačepen kerdo.

O Debleskro Drom 2021 (Sinte)

²² Ninna te wans i Israelitarja jaake bud har i santa pash o baro pani, gar bud lendar atchenn pral, un wenn pale pale ap o Debleskro drom. O merepen well budenge. Kowa hi i wi-kerdo koowa. Jaake well o tchatchepen kerdo.

Jesaja 10:22 Iomraidhean Croise

1. Mose 18:25

Ko nashte kreh tou gar, te dess kolen temerl, kay kek čilačepen kran – khetne kolentsa, kay čilačo hi. Yaake te djal koleske, kay an o čačepen tardo hi, har koleske, kay čilačo hi. Tou hal o čačepaskro ray pral i tseli phoub. Kameh tou čomone te krell, hoy gar mishto oun čačo hi?”

1. Rajengro liil 4:20

An o them Youda oun Israel djivan yaake boud menshe har santa hi pash o baro pani. Oun yon rhan oun piyan oun moukan les penge mishto te djal.

2. Rajengro liil 19:31

Ava, dran o foro Yerusalem venna pale menshe, kay kolendar venna, kay djido ačan. Oun ap i berga Sion djivenn kolla, kay vin lino van dran o merepen. Yob, o baro Devel, ko ray pral o bolepen oun i phoub, hi, kay kova krell.

Jesaja 37:31

Oun kol menshe, kay pral ačan dran o kheer Youda, venna pale har i zorelo rouk, koleskre draba dour an i phoub djan oun ap koleskre kashta roukengre bares venna.

Jesaja 46:3

T'mer dran o kheer Yakob, t'mer, kay pral ačan dran o kheer Israel, shounenn ap mande, t'mer, kolen rikrom yaake rah har ap i phoub han. Ava, yaake rah har boldo van, hidjrom t'men.

Jesaja 48:19

Tire čave, kay pal toute venn, vans yaake boud har i santa pash o baro pani. Oun lengre laba merans gar vin. Oun kek nay tradans len krik glan mande.

Jesaja 59:20

O baro Devel penell: Mire menshenge an o foro Sion vau, te lap len dran o merepen vin. Kolenge dran o kheer Yakob vau, kay moukan pengro čilačo drom.

Jesaja 6:11

Oun me poučom: “Har rah, ray?” Oun yob penas: “Bis te bouder kek menshe an i forya djivenn, vitar kek mensho an i khera, oun ko harhetikri phoub har i moulo them vas.”

Jesaja 6:13

Ninna te ačell o deshto kotar gomme koy, djal lenge har i tikne kashta, kay venn dran i tele-dino rouk. I yag rhačrell len pre. Ko telstouno kotar o roukestar ačell. Oun dran leste vell nevo djipen, hoy hi o Debleske koy.

Jesaja 60:22

Ninna dran tiri tikneder familya venn yek zero menshe. Oun i familyatar, hoy gar an-diklo hi, vell i zoreli natsyona. Me, o baro Devel, krau kova peskro tsireske sik.

Jesaja 65:8

Kava penell o baro Devel: Yaake har kek harho peskre drake tele dell oun krik vitsrell, kay gomme mool an lende hi, yaake kamau me ninna te krell mire menshentsa, te moukap len gar lauteren te marell. Hi save mank lende, kay mange koy hi.

Jesaja 8:8

Oun yon venna an o them Youda dren, har pani hoy dren phagell, oun hoy bis pash i meen pre djal. O Devel hi pash mende! Leskre moussya hi pral mende yaake dour har o them bourhlo hi.

Jeremia 3:14

Avenn pale, t'mer čave, kay nashan mandar krik, penell o baro Devel. Me hom t'maro ray. Me kamau t'mendar te lell yekes dran hako foro oun douy dran haki familya, oun kamau t'men an Sion te anell.

Jeremia 44:28

Kokres i vast pherdo lendar vell gar maredo o rhareha an Egiptia, oun vell pale an o them Youda. Yaake hayvenn halauter, kay pral ačan dran o them Youda, oun kay an o them Egiptia djan, te djivenn le kote, havo rakepen čačo vas, miro rakepen oder lengro rakepen.

Daniel 9:27

Oun yob krell pes boudentsa khetne efta bershenge. Pal triin-te-paash bersha krell lo, te vell o Debleske bouder kek firho anlo, vitar kek rhapen. Oun i djoungeli čilači figura vell pre-čiddo an o Debleskro kheer oun ačell koy, bis te vell i phagi pral koleste, kay čivas les koy, – i phagi, hoy o Devel leske glan dikas.

Bičepangre 17:31

O Devel djinell ko dives, kay rakrell lo o čačepen vin pral i tsele menshende, oun yob djal pal o čačepen. O Devel rodas i morshes vin, te vell yob čačepaskro ray. Koles kras yob i moulendar djido. Yaake sikras o Devel hakeneste, kay yob kava morshes vin rodas.”

Remarja 2:5

Oun tou kameh gar pash leste te vell. Tiro dji hi har bar. Doleske vell o Debleskri rholi baro oun bareder, hoy ap toute vella ap ko dives, kay hi o Devel o čačepaskro ray oun rakrell o čačepen vin pral i tsele menshende.

Debleskro tsiro 20:8

Oun yob djal vin, te tserdell lo i menshen ap i tseli phoub ap peskro drom. Kolla menshe kharenna Gog oun Magog. Oun yon hi yaake boud, te penell nay kek, kitse yon hi. O beng anell len khetne, te djan le an o kourepen o Debleskre menshentsa.