Jeremia 6:21 - O Debleskro Lab 2024 (Sinte-Manouche)

²¹ Doleske penell o baro Devel: Me kamau kal menshenge boud barra an o drom te čivell, te perenn i morsha oun lengre čave koy pral. Oun ninna kolla, kay djivenn pash lende, oun lengre mala venn maredo.

O Debleskro Drom 2021 (Sinte)

²¹ Doleske penell o baro Dewel: Me kamau kal menshenge bud barra an o drom te tchiwell, te perenn i mursha un lengre tchawe koi pral. Un ninna kolla, kai djiwenn pash lende, un lengre mala wenn maredo.

Jeremia 6:21 Iomraidhean Croise

2. Familjakro liil 36:17

Oun o baro Devel moukas o baro rayes Neboukadnezar dran o them Babilonia pral lende te vell. Leskre lourde maran i terne morshen o rhareha, ninna an o Debleskro kheer. O baro rayes dran Babilonia khaytas kek, gar i terne morsha, vitar gar i terne ča, gar i phoure, ninna te his le nasselo. Halauteren das o baro Devel an leskro vast.

Jesaja 8:14

Pash leste nay khatrenn t'men. Kol vavarenge an Israel oun Youda hi lo har i bar, pral koleste yon perenn, ava, har i baro zorelo bar, pral koleste yon pen rhoyrenn. Oun i menshenge an Yerusalem hi lo har khatede pandle dorya, an kolende yon perenn oun pen taprenn.

Jesaja 8:15

Oun boud lendar doukrenn pen, perenn oun phagenn pen i herya, taprenn pen an i dori, oun venn pandlo.

Jeremia 13:14

Yaake har kol khore phagenn, te venn le khetne dino, yaake krau, te phagell yek ap o vavareste, ninna i dada ap lengre čavende. Yon khaytenn man gar, oun i dji hi man vitar gar lenge, oun rikrau man gar pale, te marap len lauter. Kova penell o baro Devel.

Jeremia 13:16

Hadenn t'maro baro Debles, yaake rah har o dives hi, oun t'men t'mare pire gar an o tamlepen ap i berge doukrenna. Ninna te lourenn t'mer ap koy momeli, anell o baro Devel tamlepen oun kali rat pral t'mende.

Jeremia 18:21

Kanna mouk lengre čaven merell i bokatar, oun mouk len moulo dino te vell o rhareha, te ačenn lengre djouvyenge kek čave oun romma, te venn lengre morsha tapedo o merepastar, oun lengre terne morsha an o kourepen maredo.

Jeremia 18:23

Tou baro Devel, djineh, hoy len mantsa glan hi, kay kamenn le man moulo te dell. Ma biste lenge lengro čilačepen! Ma le lengri doosh lendar krik! Mouk len glan toute khetne te phagell, te vell tiri rholi pral lende!

Jeremia 21:7

Oun koy pal dau me o Sedekya, ko baro rayes pral Youda, an kol vasta o baro rayestar pral Babilonia, o Neboukadnezar, ninna leskre pralstunen oun kol menshen kate an kava foro, kolla, kay gar meran ap o nasslepen, an o kourepen oun i bokatar. Kova penau me, o baro Devel. Me dau t'men an i vasta kolendar, kay kamenn t'men te marell. O Neboukadnezar moukell t'men lauteren o rhareha moulo te dell, oun les khaytell kova gar, oun yob krell peskro dji t'menge pandlo.

Jeremia 8:12

Yon hounte ladjans koleske hoy yon kran, koveha man rhoyran. Kova krenn le gar. Yon ladjenn gar. Hoy ladj hi, djinenn le gar. Doleske venn yon maredo khetne kol vavarentsa. Te vau me, oun dau len i phagi, hounte perenn le, penell o baro Devel.

Ezekiel 3:20

Te djal i lačo mensho peskro lačo dromestar tele, oun krell o čilačepen, oun tou deh les gar trad, krau, te perell lo. Peskri doshake hounte merell lo. Oun ko lačepen, hoy kras lo glan kova, vell bistedo. Ap toute penau me palle: Tout hi doosh ap leskro merepen.

Ezekiel 5:10

I tsiro vell, kay rhan dada pengre čaven mashkral an Yerusalem, oun čave rhan pengre daden. Yaake pharo vell miri phagi, hoy dau t'mende. Oun halauter, kay t'mendar pral ačenn, venn vin tradedo ap hake rigya.

Remarja 11:9

Oun o baro ray David penas lendar: Yon rhačrenn firhen o Debleske oun patsenn, te dikell o Devel lačes ap lende. Yaake hi kova gar. O Devel dikell gar lačes ap lende. Na-a. Vell o dives, kay lenn le pengri phagi.

Remarja 9:33

An o Debleskro lab hi činlo: Dikenn, me čivau i baro bar an o foro Sion. Pral koleste perenn le, oun ap koleste rhoyrenn le pen. Oun kova, kay ap leste patsella, kova hounte ladjell pes gar glan mande.