Jeremia 51:11 - O Debleskro Lab 2024 (Sinte-Manouche)

¹¹ I Babilonarya kran o baro Debleskro kheer paash. Doleske las pes o baro Devel glan, te phagell lo o foro Babilon tele. Yob das i rayende dran o them Media boud zoor an lende, te djan le ap o foro Babilon pre. Činenn t'mare fayle! Lenn t'mare sasterne bečeskre patria an o vast!

O Debleskro Drom 2021 (Sinte)

¹¹ I Babilonarja kran o baro Debleskro kheer paash. Doleske las pes o baro Dewel glan, te phagell lo o foro Babilon tele. Job das i rajende dran o them Media bud soor an lende, te djan le ap o foro Babilon pre. Tchinenn tumare faile! Lenn tumare sasterne betcheskre patria an o wast!

Jeremia 51:11 Iomraidhean Croise

1. Rajengro liil 11:14

Oun o baro Devel čivas o Salomeske yekes an o drom, kay hadas pes pral leste. Kova his o Hadad dran o kheer kol rayendar pral o them Edom.

1. Rajengro liil 11:23

Oun o Devel čivas o Salomeske i vavar morshes an o drom, kay hadas pes pral leste. Kova his o Reson, koleskro dad o Elyada his. Glan i tsiro nashas o Reson peske peskro rayestar, o Hadad-Eser, kova his o ray pral o them Soba.

1. Familjakro liil 5:26

Kote bičras o Israeleskro Devel pral lende o baro rayes dran o them Assour, o Poul, – leskro lab hi ninna Tiglat-Pileser – oun yob moukas i menshen dran o kheer Ruben oun Gad oun i paash familya dran o kheer Manasse pandles krik te anell, oun anas len an i themma troul i forya Hala oun Habor oun Hara oun pash o lengsto pani Gosan. Kote hi le gomme kava dives.

2. Familjakro liil 36:22

An o ersto bersh, kay o Cyrus o baro ray pral o them Persia his, kras o baro Devel, te vas ko lab čačo, hoy lo ap o Yeremia rakras, oun yob i menshenge doureder penas. O baro Devel das o baro rayeske, o Cyrus an o dji, te moukell lo an peskro tselo them vin te kharell oun i lilentsa halauterenge te penell:

Esra 1:1

An o ersto bersh, kay o Cyrus o baro ray pral o them Persia his, kras o baro Devel, te vas ko lab čačo, hoy lo ap o Yeremia rakras, oun kova i menshenge doureder penas. O baro Devel das o baro rayeske, o Cyrus an o dji, te moukell lo an peskro tselo them vin te kharell oun i lilendar halauterenge te penell:

Jesaja 10:26

Palle dau len i čoupniyah, me, o baro Devel, ko ray pral o bolepen oun i phoub, yaake har dom an o phouro tsiro i menshen dran o them Midian pash ko baro bar, hoy kharell Oreb. Oun me hadau miro kasht yaake pral o baro pani, har krom an o them Egiptia.

Jesaja 21:2

Havo pharo koova vas mange siklo! O phoukepaskro phoukrella, oun o randepaskro randella. T'mer lourde dran i themma Elam oun Media, krenn t'men ap o drom, oun čivenn t'men pre troul lo foro Babilon. O baro Devel krell, te hounte rovell bouder kek pral kova, hoy i Babilonarya kran.

Jesaja 21:5

O rhapen hi ap i rhapaskri čiddo, oun i stakepangre hi ap i phoub čiddo, yon rhan oun piyenn. Koy dell yek gole: “Stenn pre, t'mer pralstoune! lenn t'mare shilte an o vast!”

Jesaja 41:25

Me dom i rayes gole, te vell lo peskre lourdentsa foun kotar, kay o kham gar diklo vell. Oun yob vas dran peskro them, hoy kote hi, kay o kham pre djala. Oun yob dell gole ap mande, oun stakrell kol vavar bare rayen khetne, har te vans le čik. oun krell lentsa har ko morsh, kay pirya dran čik rhačell, oun glan kova peskre pirentsa ap ko čik stakrell.

Jesaja 45:1

Kava penell o baro Devel ap o Cyrus, koles yob vin rodas, te vell lo baro ray: Me taprom tiro čačo vast, te vitsrap vavar themma tel tire herya, oun te lap i rhare lengre bare rayendar krik, te venn voudya pre kerdo glan toute, te ačenn foreskre voudya gar pandlo glan toute.

Jesaja 45:5

Me hom o baro Devel oun dell kek vavar. Me kokres hom o Devel. Me dom tout bari zoor, ninna te prindjral man gar,

Jesaja 46:11

Foun kotar, kay o kham pre djal, dau gole i baro čirkleste, kay mass rhal, te vell yob. Kova hi ko morsh, kay krell, hoy mange glan lom. Dran i dour them vell lo. Kova vell yaake, har penom. Hoy mange glan lom, krau ninna.

Jeremia 25:25

i tsele bare raya an i themma Simri, Elam oun Media;

Jeremia 46:3

[O baro Devel moukas o Yeremia te shounell, har i egiptikre pralstoune gole denn:] Lenn t'mare shilte an o vast! Djan an o kourepen!

Jeremia 46:4

Čivenn i grayenge i dorya an o mouy! Klissepangre, beshenn t'men pre! Čivenn i lourdengre stadja ap t'maro shero! Lenn t'mare lengste čourya, oun rivenn t'maro sasterno gad an!

Jeremia 46:9

Mishto, beshenn t'men ap i graya, oulerenn o kourepangre vourdyentsa! Bičrenn t'mare zorele kourepangren vin, kolen dran i themma Etiopia oun Libia, kolen, kay shilte hidjrenna, oun kolen dran Loud, kay bogentsa karye denna!

Jeremia 50:25

O baro Devel kras peskro kourepaskro kheer pre, oun las o marepaskre koola vin, kolentsa yob an peskri rholi ap o them Babilonia pre djal. Yob, o baro Devel, ko ray pral o bolepen oun i phoub, les hi kote boud te krell.

Jeremia 50:3

Lourde venna dran ko them, hoy kote hi, kay norden hi, oun djan an o kourepen lentsa. Kolla krenn, te vell lengro them i moulo them, yaake kay kek nay djivell kote. I Menshe oun i firhe hounte nashenn penge dran ko them.

Jeremia 50:45

Shounenn, hoy o baro Devel peske glan las te krell lo ap o foro Babilon, oun hoy kamell lo te krell i menshentsa an o them Babilonia. Čačepah, yon halauter venn krik tradedo har bakre. Ninna lengre tikne čave venn krik tserdedo. Hakeneske, kay dikell kova, ačell o rakepen krik.

Jeremia 50:9

Shounenn, me bičrau boud lourden dran boud themma, kay foun kotar venna, kay norden hi, te kourenn le pen i menshentsa an Babilon. Yon venna oun lenn ko foro dren. Kal lourde denn mishto karye, oun taprenn hako kopo kova, hoy kamenn le te taprell.

Jeremia 51:12

Hadenn o kourepaskri plarhta pre, te sikrenn, kay djan t'mer an o kourepen o foreha Babilon. Čivenn boud kourepangren troul o foro! Čivenn ninna kol lourden kote koy, kay garda denn! Čivenn ninna lourden khatemen pal o foro, te nay perenn le i Babilonaryen an o doumo. O baro Devel krell, hoy yob pes glan las, oun hoy lo pral i menshende an o foro Babilon rakras.

Jeremia 51:24

Kanna dikenn t'mer, har playsrau o foreske Babilon oun i tsele menshenge, kay an o them Babilonia djivenn, lengro tselo čilačepen pale pale, hoy yon ap i berga Sion kran. Kova penell o baro Devel.

Jeremia 51:36

Doleske penell o baro Devel ap o foro Yerusalem: Dik, me kamau tiro koova an miro vast te lell. Me krau, te vell lengro lengsto pani Eufrat trouk, oun te nashell an lengre vavar panya bouder kek pani.

Daniel 5:30

An kay rat vas o Belsazar, ko baro ray pral o them Babilonia, maredo.

3. Mose 26:25

Me moukau kourepen an t'maro them vin te phagell, oun dau t'men pale, te rikran gar dren, hoy mantsa vin kran. Oun te khatrenn t'mer t'men palle an t'mare forya, palle bičrau i pharo nasslepen mashkral t'mende, oun dau t'men an i vasta kolendar, kay kourenn pen t'mentsa.

Zakarie 14:12

Oun kova hi ko pharo nasslepen, hoy o baro Devel ap kolende čivell, kay djan an o kourepen o foreha Yerusalem: Lengro mass merell tele, har le gomme ap lengre pire tardo hi, lengre yaka an o shero oun lengri čip an o mouy merenn tele oun perenn vin.

Zakarie 14:2

Me lau i lourden dran i tsele themma khetne, te kourenn le pen o foreha Yerusalem. Yon lenn o fores dren, čorenn i khera vin, oun taprenn zoryah i djouvyenge an. Kol menshendar an o foro vell i paash pandles krik anlo. Kolla, kay pral ačan, ačenn nay an o foro.