Jeremia 48:41 - O Debleskro Lab 2024 (Sinte-Manouche)

⁴¹ Kal forya oun zorele khera venn dren lino. Ap ko dives hi i djia o čače morshendar an o them Moab yaake dareno, har o dji i djouvyatar, kay anell i ternepen ap kay phoub.

O Debleskro Drom 2021 (Sinte)

⁴¹ Kal forja un sorele khera wenn dren lino. Ap ko diwes hi i djia o tchatche murshendar an o them Moab jaake dareno, har o dji i djuwjatar, kai anell i ternepen ap kai phub.

Jeremia 48:41 Iomraidhean Croise

Jesaja 13:8

Oun yon perenn an pende khetne, tserdenn pen khetne i doukatar har i djouvel, te lell li i ternepen. Yek dikell darenes ap o vavareste, oun lengre mouya hi lolo har yag.

Jesaja 21:3

Hoy shounom, hi yaake djoungelo, kay phagau khetne. Hoy dikom, krell man bari traash. Mire kokale trissenna, douka tapran man har i djouvyat, kay lell i ternepen.

Jeremia 30:6

Poučenn oun dikenn: Nay anenn morsha čave ap i phoub? Har djal kova, te dikau, har rikrenn i tsele morsha pengre vasta ap o per, har djouvya, kay i ternepen lenna? Hoske hi lengre mouya yaake parno?

Jeremia 4:31

Me shounau i gole, har i djouvyatar, kay lell o ersto kopo i ternepen. Kaya hi koy gole o forestar Sion, kay taprell pal dourho, oun peskre vasta pre hadell, oun gole dell: Me hom nashedo! Kolla venna oun denn man moulo!

Jeremia 4:9

O baro Devel penell: Ko dives vella, kay trashenn o baro ray oun i pralstoune pral Israel. O Debleskre rakepangre oun leskre rashaya djinenn gar bouder, hoy te penenn le.

Jeremia 48:24

Keryot, Bozra, oun pral i tsele vavar forya an o them Moab, kolla, kay dour hi, oun kolla kay gar dour hi.

Jeremia 49:22

Dik, yob vella pral o them har i adlari, oun čivell peskre moussya pral o foro Bozra. An ko tsiro hi i djia kol čače morshendar an o them Edom yaake dareno, har ko dji i djouvyatar, kay anell i ternepen ap i phoub.

Jeremia 49:24

I menshe an Damaskus hi dareno oun nashenn penge. Yon trissenna, oun bari traash oun douka hi an lende, har i djouvyat hi, kay anell i ternepen ap i phoub.

Jeremia 50:37

O rharo mou vell pral lengre graya oun lengre kourepaskre vourdya, oun pral hake lourdende, kay venn dran vavar themma, te venn le har djouvya! O rharo mou vell ninna pral lengro bravlepen, kova vell lenge krik lino!

Jeremia 50:43

Te shounell o baro ray an Babilon lendar, perenn leskre vasta ap leskre herya tele. Oun i bari traash vell ap leste har i traash i djouvyatar, kay i ternepen lella.

Jeremia 51:30

Kol zorele kourepangre an o them Babilonia ačenn an lengre zorele khera, oun djan gar an o kourepen. Lengri zoryah hi či bouder, yon van har djouvya. O foreskre voudya hi pre-phagedo, oun i khera rhačenna.

Jeremia 6:24

Mer shounam lendar, oun mare moussya peran menge tele. Oun i bari traash vas ap mende. Men hi bare douka har i djouvel, kay i ternepen lella.

Amos 2:2

Me bičrau i yag an o them Moab, oun rhačrau kol zorele khera tele an o foro Keryot. I menshe an o them Moab merenna an o divyo kourepen pash i gole, hoy i lourde oun i phourdepangre denna.

1. Tessalonikarja 5:3

Te penenn i menshe: “Lauter hi mishto, kek kourepen hi kay, oun men hounte vell kek daar”, palle vell i bibarht pral lende, oun yon nay nashenn gar krik. Koy bibarht vell pral lende yaake sik, har i douka venn pral i djouvyate, kay lell i ternepen.